ខេត្តព្រះសីហនុ៖មន្ត្រីនគរបាលដែលបម្រើការងារមានអតីតភាពជាង២០ឆ្នាំឬ៣០ឆ្នាំនៅស្នងការដ្ឋានខេត្តព្រះសីហនុកំពុងកើតជំងឺសតិអារម្មណ៍ ខេត្តព្រះសីហនុ ៖ មន្ត្រីនគរបាលដែលបម្រើការងារ មានអតីតភាពជាង ២០ឆ្នាំឬ ៣០ឆ្នាំ នៅស្នងការដ្ឋានខេត្តព្រះសីហនុ កំពុងកើតជំងឺសតិអារម្មណ៍ លែងចង់ចូលប៊ុយរ៉ូធ្វើការហើយ ដោយសារតែអំពើពុករលួយបក្ខពួកនិយម មានការលើកបន្តុបខ្សែទុយោខ្លួនឯង ឲ្យឡើងកាន់ការងារធំៗ កន្លែងខ្លាញ់បង្កព្យុះភ្លៀងតាមតែអំពើចិត្ត ដូចជាករណីលោក តាក សារិទ្ធ ត្រូវជាក្មួយសំណព្វចិត្តរបស់ លោកស្នងការកំពុង ក្តោបក្តាប់ការងារតែម្នាក់ឯង នៅក្នុងការិយាល័យប្រឆាំងបទល្មើស ជិះជាន់សង្កត់សង្កិនដាក់កំហិត លើប្រធានការិយាល័យជំនាញទាំង៣ បង្កើតឲ្យមានភាពអសកម្ម គួរឲ្យព្រួយបារម្ភបំផុត។
មន្ត្រីមួយចំនួនបានលើកឡើងថា លោក តាក សារិទ្ធ ទើបតែចូលធ្វើនគរបាល កាលពីប៉ុន្មានថ្ងៃមុនសោះ មានស័ក្តិ ៤ពាក់លើស្មា និងកាន់តំណែងជាអនុប្រធានការិយាល័យប្រឆាំងបទល្មើស មានសិទ្ធិអំណាចធំធេង គ្រប់គ្រងលើការិយាល័យ ប្រឆាំងបទល្មើសសេដ្ឋកិច្ច ការិយាល័យប្រឆាំងការជួញដូរមនុស្ស និងការិយាល័យប្រឆាំងគ្រឿងញៀន ដែលពេលខ្លះលោក តាក សារិទ្ធ បានប្រើអំណាចរបស់គាត់ទៅបំពានលើការងារ របស់ស្នងការរងដែលជា ប្រធានការិយាល័យផងដែរ។ លោក តាក សារិទ្ធ បានប្រព្រឹត្តអ្វីៗតាមតែអំពើចិត្តហើយអំណាចរបស់គាត់ត្រឹមតែស័ក្តិ ៤សោះ ហ៊ានត្រួតត្រាបញ្ជាដល់ថ្នាក់ដឹកនាំចាស់ៗ ឬមន្ត្រីដែលមានតួនាទីធំជាងខ្លួន ដោយបានប្រើភាសាអសីលធម៌គំរោះគំរើយ ឬជេរប្រមាថចំពោះមន្ត្រីនគរបាល ដែលមានអាយុធ្វើជាជីតារបស់គាត់បាន គ្មានក្រែងញញើតអ្វីឡើយ។
លោក តាក សារិទ្ធ បានចូលធ្វើជានគរបាល មិនដែលចូលសាលាហ្វឹកហាត់លត់ដំ ឬរៀនសូត្រពីវិន័យសីលធម៌ របស់នគរបាលជាតិនោះទេ គឺគាត់បានប្រើប្រាស់សិទ្ធិអំណាចយ៉ាងដាច់បង្ហៀរ ហើយបានយកស្បែកជានគរបាល និងតួនាទីជានាយរង ការិយាល័យប្រឆាំងបទល្មើសទៅប្រព្រឹត្តផ្តេសផ្តាស ក្នុងការប្រមូលលាភសក្ការៈ យកមកច្រកហោប៉ៅធ្វើមានធ្វើបានផ្ទាល់ខ្លួន នាំឲ្យខូចដល់កេរ្តិ៍ឈ្មោះរបស់នគរបាលមួយចំនួនទៀត ដែលព្យាយាមសាងភាពស្អាតស្អំ។ លោក តាក សារិទ្ធ ក៏ជាប់ឈ្មោះជាមន្ត្រីនគរបាល ដែលដៃម្ខាងចាប់ ដៃម្ខាងប្រមូលលុយពីជំនួញគ្រឿងញៀនខុសច្បាប់ បានរាប់ពាន់ដុល្លារក្នុងមួយខែៗ ហើយលោក តាក សារិទ្ធ ក៏មានជំនាញរកស៊ីចងការលុយឲ្យ មេឈ្មួញគ្រឿងញៀនមួយចំនួន គួរឲ្យភ្ញាក់ផ្អើលផងដែរ ព្រោះមេឈ្មួញទាំងនោះ តែងតែយកលុយនិងមកបង់ជូនលោក តាក សារិទ្ធ យ៉ាងទៀងទាត់។
លើសនេះទៅទៀត គេក៏ដឹងផងដែរថា លោក តាក សារិទ្ធ បានប្រើអំណាចរបស់ខ្លួន ទៅបង្កើតក្លឹបល្បែងភ្នាល់បាល់ទាត់ វង់បៀ វង់អាប៉ោង ដ៏ធំមួយកន្លែងនៅក្រោយភោជនីយដ្ឋាន ជាង លីម ក្នុងសង្កាត់លេខ៤ យ៉ាងគឃ្លើនបំផុតគ្មានកោតក្រែងញញើត អភិបាលខេត្តសូម្បីតែបន្តិច។ គេមិនច្បាស់ទេថា តើក្នុងមួយខែៗលោក តាក សារិទ្ធ ដែលបានប្រើប្រាស់ស្បែកជា នគរបាលទៅប្រព្រឹត្តអំពើខុសឆ្គង ដូចជាការបើកបនល្បែងស៊ីសងខុសច្បាប់ ការប្រមូលផលប្រយោជន៍ពីជំនួញគ្រឿងញៀន ជាពិសេសការចងការលុយពីមេឈ្មួញគ្រឿងញៀន បានប៉ុន្មានម៉ឺនដុល្លារនោះទេ ព្រោះលោក តាក សារិទ្ធ បានឡើងធ្វើជាអនុប្រធាន ការិយាល័យប្រឆាំងបទល្មើសតែរយៈពេលខ្លី ប៉ុន្តែគាត់មានទ្រព្យធនធានហូរហៀរ មានលុយចាយមិនខ្វះ ហេតុនេះគប្បីអង្គភាពប្រឆាំងអំពើពុករលួយ ពិនិត្យមើលភាពអសកម្មរបស់លោក តាក សារិទ្ធ ឡើងវិញផង។
មន្ត្រីនគរបាលមួយចំនួនដែលមាន អតីតភាពការងារយូរឆ្នាំ ពេលខ្លះរកតែលុយចាក់សាំងម៉ូតូ មកធ្វើការមិនបានផង ព្រោះប្រាក់ខែប្រមាណ ២០ឬ៣០ ម៉ឺនរៀល ពេលចេញល្បាតត្រូវប្រើប្រាស់ សោហ៊ុយសាំងខ្លួនឯងទៀត ហើយមន្ត្រីខ្លះធ្វើការ តាំងពីដាច់របបខ្មែរក្រហម រហូតមកដល់ឆ្នាំ២០១៣ នេះឡើងស័ក្តិ១ អត់រួចទេ គឺនៅត្រឹមតែ ដោយ៣ជាន់ប៉ុណ្ណោះ ក៏ព្រោះតែពួកគាត់គ្មានខ្សែទុយោ គ្មានលុយសូកប៉ាន់ដើម្បីឡើងស័ក្តិឡើងតួនាទី ខុសពីលោក តាក សារិទ្ធ ដែលមានខ្សែទុយោ ជាអ្នកមានលុយមានអំណាច គាត់ឡើងស័ក្តិ ១ឆ្នាំដល់ទៅ ៣ដង និងអាចមានឱកាសកាន់តំណែងខ្លាញ់ ហើយយកតំណែងនិងតួនាទីរបស់ខ្លួន ទៅប្រព្រឹត្តអំពើល្មើសច្បាប់ ដើម្បីយកលុយមកច្រកហោប៉ៅ គ្មានក្រែងញញើតវិធានការរឹតបន្តឹងរបស់ថ្នាក់លើ ឬច្បាប់ទម្លាប់អ្វីទេ។
កន្លងមកមន្ត្រីនគរបាលតូចតាចជាច្រើន ខឹងសម្បាចំពោះលោក ស្នងការ តាក វណ្ណថា ក៏ព្រោះតែភាពខុសឆ្គងរបស់លោក តាក សារិទ្ធ ដែលជាក្មួយសំណព្វចិត្តនោះឯង សមល្មមដល់ពេលដែលលោកស្នងការ តាក វណ្ណថា ពិនិត្យមើលភាពអនាធិបតេយ្យ ក្មួយសំណព្វចិត្តឡើងវិញហើយ។ ប្រជាពលរដ្ឋក៏បានសម្តែង ភាពក្តៅក្រហាយយ៉ាងខ្លាំង ចំពោះវត្តមានរបស់លោក តាក សារិទ្ធ ដែលឧស្សាហ៍នាំកម្លាំងនគរបាលចំនួន ៦នាក់ ចុះល្បាតតាមមូលដ្ឋានជាច្រើន ប៉ុន្តែមិនដែលមានមុខទៅ បង្ក្រាបជំនួញគ្រឿងញៀន ដែលកំពុងរីកដុះដាលយ៉ាងអនាធិបតេយ្យនោះទេ ដូចជាមេឈ្មួញនៅសង្កាត់លេខ៤ ឈ្មោះ រិទ្ធ មានប្រពន្ធឈ្មោះ ចន្ធូ បានរកស៊ីចែកចាយគ្រឿងញៀនយ៉ាងឆ្វេចឆ្វាច ស្រដៀងនឹងការលក់ស្ករគ្រាប់ គឺមិនដែលមានការបង្ក្រាបទេ ក៏ព្រោះតែពួកគេមានទំនាក់ទំនងល្អ ជាមួយលោក តាក សារិទ្ធ៕
Source from: watphnom-news.com
Loading...
Post a Comment