ខេត្តបន្ទាយមានជ័យ ៖ ទំនងជាអ្នកបើកបរងងុយដេក បានបើករថយន្តក្រុង ធ្លាក់ទឹកដែលនៅអមសងខាងផ្លូវ កាលពីម៉ោង ១០យប់ថ្ងៃទី១១ ខែវិច្ឆិកា ឆ្នាំ២០១៣ លើផ្លូវជាតិលេខ៥ ត្រង់ចំណុចក្បែរខ្លោងទ្វារ និងសាលាឆទាន ចូលវត្តភូមិគោកពង្រ ឃុំឈ្នួរមានជ័យ ស្រុកព្រះនេត្រព្រះ ហើយអាចចាត់ទុកជា សំណាងល្អ ដែលអំឡុងពេលកើតហេតុ មិនមានអ្នកដំណើរ ជិះនៅក្នុងរថយន្ត។
អ្នកបើកបរមានឈ្មោះ ស៊ុំ សារ៉ាន ភេទប្រុស អាយុ ៤៦ឆ្នាំ លំនៅភូមិ-សង្កាត់បឹងព្រលិត ខណ្ឌ៧មករា រាជធានីភ្នំពេញ។ ឯរថយន្តក្រុងរបស់ឯកជនម៉ាក Hyundai ពាក់ស្លាកលេខ ភ្នំពេញ 3C 1660។ មុនពេលកើតហេតុ រថយន្តបើកបរពី ទិសកើតទៅលិច គឺពីខេត្តសៀមរាប ទៅក្រុងប៉ោយប៉ែត។
ស្រាប់តែរថយន្តក្រុង បានរេចង្កូតទៅគន្លងខាងឆ្វេងដៃ រួចបុកស្លាកគណបក្សហ្វ៊ុនស៊ិនប៉ិច ហើយបញ្ឆិតនឹងស្លាកគណបក្សប្រជាជនកម្ពុជា ជ្រុលធ្លាក់ក្នុងស្នាមភ្លោះត្រាំទឹក រហូតដល់ថ្ងៃត្រង់ថ្ងៃទី១២ វិច្ឆិកា ទើបស្រង់ឡើងគោក។ នៅពេលកើតហេតុ រថយន្តនេះពុំមានដឹកភ្ញៀវទេសចរ និងអ្នកដំណើរទេ ទើបមិនបង្កអោយមានមនុស្សគ្រោះថ្នាក់៕
Source from: watphnom-news.com
Loading...
Post a Comment