យន្តហោះ​ដែល​បាត់ដាន អាច​ត្រូវបាន​ចាប់​ជម្រត់ ទៅ​ចុះចត​លើ​កោះ​មួយ ក្នុង​សមុទ្រ​ឥណ្ឌា

Daily News, In Khmer, International News

3/15/2014 02:00:00 PM

យន្តហោះដែលបាត់ដាន អាចត្រូវបានចាប់ជម្រត់ ទៅចុះចតលើកោះមួយ ក្នុងសមុទ្រឥណ្ឌា

ប្រទេសម៉ាឡេស៊ី៖ក្រុមមន្ត្រីរដ្ឋាភិបាលម៉ាឡេស៊ីបានឲ្យដឹងថាអ្នកស៊ើបអង្កេតពាក់ព័ន្ធករណីយន្តហោះដែលបាត់ការទាក់ទងបានសន្និដ្ឋានចុងក្រោយថា

ប្រទេសម៉ាឡេស៊ី ៖ ក្រុមមន្ត្រីរដ្ឋាភិបាលម៉ាឡេស៊ី បានឲ្យដឹងថា អ្នកស៊ើបអង្កេតពាក់ព័ន្ធ ករណីយន្តហោះ ដែលបាត់ការទាក់ទង បានសន្និដ្ឋានចុងក្រោយថា យន្តហោះនោះ អាចត្រូវបានចាប់ជម្រត់ ដោយមនុស្សម្នាក់ ឬលើសនេះ ដែលមានបទពិសោធន៍ហោះហើរ ដ៏ជំនាញ បានប្លន់យន្តហោះម៉ាឡេស៊ី ដែលបានបាត់ទៅ ដោយបិទឧបករណ៍ ទំនាក់ទំនងទាំងអស់ ព្រមទាំងបង្វែរ ទិសដៅហោះហើរ ដើម្បីបង្វែរដាន។

ក្រុមមន្ត្រីបានឲ្យដឹងថា សញ្ញារ៉ាដាដែលថតបាន ដោយយោធាម៉ាឡេស៊ី ទំនងជាបង្ហាញថាយន្តហោះ បានបន្ទាបខ្លួនចុះនៅកំពស់ ៤៥.០០០ ហ្វីត និងបានធ្វើការបត់ ជាខ្លាំងទៅស្តាំនៅមិនយូរប៉ុន្មាន ក្រោយពីវាបាត់ ចេញពីរ៉ាដា។ ទិន្នន័យដដែលបង្ហាញថា យន្តហោះចុះដល់កំពស់ ២៣.០០០ ហ្វីត នៅពេលវាហោះតម្រង់ ទៅកោះប៉េណាំង របស់ម៉ាឡេស៊ី តែបន្ទាប់មកបានឡើងវិញ និងហោះពីលើច្រកសមុទ្រ ម៉ាឡាកា ជារយៈកំពស់មួយដែលពិបាកហោះហើរ។

អាជ្ញាធរគិតថាយន្តហោះ អាចទៅតាមទិសមួយ ក្នុងចំណោមពីរទិស បន្ទាប់ពីវា ឆ្លងកាត់ច្រកសមុទ្រ ម៉ាឡាកា អាចទៅទិសពាយព្យ ឆ្ពោះទៅកាន់ឆកសមុទ្រ បឹងហ្កាល់ និងឆ្នេរឥណ្ឌា ឬក៏ទៅទិសនិរតី ចូលក្នុងមហាសមុទ្រឥណ្ឌា។ យន្តហោះនៅតែត្រូវបាន ហោះហើរជាច្រើនម៉ោងបន្ទាប់ពីការទាក់ទង ចុងក្រោយនៅម៉ោង ១និង០៧ នាទីរំលងអធ្រាត ឈានចូលថ្ងៃទី៨ ខែមីនា នៅពេលយន្តហោះ នៅពីលើឈូងសមុទ្រថៃ។ ការទាក់ទងជាមួយឧបករណ៍ transponderរបស់យន្តហោះ បានឈប់នៅប៉ុន្មាននាទី មុនពេលប្រព័ន្ធបញ្ជូនសារ ឈប់ដំណើរការ។

ក្រុមមន្ត្រីបានបញ្ជាក់ទៀតថា វាអាចថា យន្តហោះនោះ ចុះចតនៅទីណាមួយ ឬកោះណាមួយនៅមហាសមុទ្រឥណ្ឌា ។ ក្នុងពេលជាមួយគ្នា មន្ត្រីអាមេរិកម្នាក់ បាននិយាយថា ពួកអ្នកស៊ើបអង្កេតកំពុងពិនិត្យលទ្ធភាព នៃការបាត់យន្តហោះនេះ ថាជា អំពើចោរចាប់ពង្រត់ ព្រោះប្រព័ន្ធទាក់ទងមួយទៀត នៅលើយន្តហោះបានបន្តភ្ជាប់ ទៅផ្កាយរណបមួយ អស់ពេលប្រមាណ ៤ម៉ោង ក្រោយពីដាច់ការទាក់ទង ជាមួយយន្តហោះ Boeing 777 ដែលនេះជាសញ្ញាបង្ហាញថា យន្តហោះបន្តហោះរាប់ម៉ោង។

នេះជាការបញ្ជាក់ចុងក្រោយ បន្ទាប់ពីការស៊ើបអង្កេតជាច្រើនថ្ងៃ និងការស្វែងរកយន្តហោះ របស់ក្រុមពហុសាសន៍ មិនមានលទ្ធផល។ សារព័ត៌មាន AP ចេញផ្សាយនៅថ្ងៃសៅរ៍នេះ បានឲ្យដឹងថា អ្នកស៊ើបអង្កេតសន្និដ្ឋានថា មនុស្សម្នាក់ឬលើសនេះ ជាមួយបទពិសោធន៍ហោះហើរដ៏ជំនាញ បានប្លន់យន្តហោះម៉ាឡេស៊ី ដែលបាត់ដាន ដោយបិទឧបករណ៍ទាក់ទងទាំងអស់ ព្រមទាំងបង្វែរទិសដៅហោះហើរ។ មន្ត្រីរដ្ឋាភិបាលម៉ាឡេស៊ី ដែលពាក់ព័ន្ធនឹងការស៊ើបអង្កេត ទើបតែនិយាយនៅថ្ងៃសៅរ៍នេះ ដោយសារគាត់មិនត្រូវបានអនុញ្ញាត ក្នុងការនិយាយទៅកាន់ អ្នកសារព័ត៌មាន។

មន្ត្រីបានបញ្ជាក់ថា មិនមានតម្រុយ ដែលត្រូវបានរកឃើញ ហើយមិនច្បាស់ទេថា តើយន្តហោះនៅទីណា រហូតមកដល់ពេលនេះ ប៉ុន្តែបើយោងតាម ការសន្និដ្ឋានចុងក្រោយ គឺយន្តហោះត្រូវបានប្លន់ ដោយសារសញ្ញាទំនាក់ទំនង របស់យន្តហោះ ត្រូវបានបិទដោយចេតនា ហើយទិន្នន័យ បង្ហាញផ្លូវយន្តហោះ និងការចង្អុលបង្ហាញយន្តហោះ ត្រូវបានបង្វែរទៅលើផ្លូវមួយ ដើម្បីចៀសពីការចាប់បាន របស់ប្រព័ន្ធរ៉ាដា។

យន្តហោះម៉ាឡេស៊ី ប្រភេទ Boeing 777 ជើងហោះហើរ MH370 ដឹកអ្នកដំណើរចំនួន ២២៧នាក់ និងអ្នកបម្រើលើយន្តហោះ ១២ នាក់ សរុបទាំងអស់ ២៣៩នាក់ បានចេញដំណើរ ពីទីក្រុងកូឡាឡាំពួ ប្រទេសម៉ាឡេស៊ី ទៅកាន់ទីក្រុងប៉េកាំងប្រទេសចិន កាលពីវេលាម៉ោង ១២យប់ថ្ងៃទី៨ ខែមីនា តែបានបាត់ការទំនាក់ទំនងបន្ទាប់ពីចាកចេញពីព្រលាន ប្រហែល ២ម៉ោង៕