Googleអះអាងថា យន្តហោះBoeing របស់ម៉ាឡេស៊ី មានជើងហោះហើរMH370ដែលបាត់ខ្លួនមិនឋិតក្នុងផែនទីGoogle Mapទេ
តាមការចុះផ្សាយរបស់គេហទំព័របរទេសមួយកាលពីថ្ងៃទី១២ ខែមីនា ឆ្នាំ២០១៤កន្លងមកបានឲ្យដឹងថា យន្តហោះដឹកអ្នកដំណើរប្រភេទBoeing 777-200 ផ្ទុកមនុស្សចំនួន២៣៩នាក់ របស់ក្រុមហ៊ុនអាកាសចរណ៍ម៉ាឡេស៊ី មានជើងហោះហើរMH370 ដែលបាត់ខ្លួននាថ្ងៃទី០៨ ខែមីនា ឆ្នាំ២០១៤ ប្រមាណចូល១សប្តាហ៍មកហើយនោះ មិនមានទិន្នន័យចង្អុលបង្ហាញក្នុងផែនទី Google Mapឡើយ ខណៈដែលអាជ្ញាធរប្រទេសចិនអះអាងតាមរយៈការប្រើប្រាស់ប្រព័ន្ធផ្កាយរណបចំនួន១០របស់ខ្លួន ថា បានរកឃើញបំណែកមួយចំនួនសង្ស័យថា ជាបំណែករបស់យន្តហោះ បាត់ខ្លួននេះក៏ដោយ ។
ក្រុមហ៊ុនGoogle បានអះអាងថា ស្របពេលដែលយន្តហោះ ដឹកអ្នកដំណើររបស់ក្រុមហ៊ុនអាកាសចរណ៍ម៉ាឡេស៊ី បាត់ការទាក់ទងនិងចេញផុតពីរ៉ាដា រយៈពេល២ម៉ោង បន្ទាប់ពីហោះហើរចេញពីទីក្រុងគូឡាឡំពួរ ប្រទេសម៉ាឡេស៊ី ឆ្ពោះទៅទីក្រុងប៉េកាំង ប្រទេសចិននោះ គឺក្រុមហ៊ុន មិនបានឃើញស្រមោលយន្តហោះម៉ាឡេស៊ី ដែលបាត់ខ្លួនក្នុងទិន្នន័យរបស់Googel Mapឡើយ ។
ក្រុមហ៊ុនGoogle បានឲ្យដឹងទៀតថា គ្មានលទ្ធភាពណាមួយបង្ហាញអំពីការហោះហើរនិងការបាត់ដានហោះហើររបស់យន្តហោះឡើយ ទាំងទិន្នន័យជាតួលេខ ទាំងគោលដៅ នៃការហោះហើររបស់យន្តហោះ ហើយមូលហេតុដែលនាំឲ្យយន្តហោះនេះ មិនឋិតក្នុងការតាមដានរបស់Google គឺមកពីអាកាសធាតុមានការផ្លាស់ប្តូរ និងទីតាំងយន្តហោះ ក៏មិនមានការបង្ហាញនូវចំណុចច្បាស់លាស់ណាមួយដែរ ។
ពាក់ព័ន្ធនឹងករណីបាត់ខ្លួនយន្តហោះ Boeing 777-200 របស់ម៉ាឡេស៊ី ជាមួយនឹងមនុស្សចំនួន២៣៩នាក់ កាលពីថ្ងៃទី០៨ ខែមីនា ឆ្នាំ២០១៤ នោះ ត្រូវបានមន្ត្រីស្រាវជ្រាវវៀតណាមបញ្ជាក់ថា បានបាត់ស្រមោលពីរ៉ាដា របស់វៀតណាម នាវេលាម៉ោង០២ និង៤០នាទីព្រឹក ។ លើសពីនេះ មន្ត្រីស្រាវជ្រាវរបស់វៀតណាមបានកំណត់មុខសញ្ញាថា យន្តហោះម៉ាឡេស៊ីនោះ អាចធ្លាក់ចូលក្នុងដែនសមុទ្រវៀតណាម ។
លោក Mike Mckay ជាជនជាតិអូស្ត្រាលី បម្រើការងារនៅក្នុងការដ្ឋានបូមប្រេង Songa Mecur ភាគអាគ្នេយ៍ ប្រទេសវៀតណាម បានអះអាងថា គាត់ពិតជាបានឃើញយន្តហោះ១គ្រឿង ហើយអាចជាយន្តហោះ ម៉ាឡេស៊ី ដែលបាត់ខ្លួននោះ ផ្ទុះឆេះ និងធ្លាក់ចូលក្នុងសមុទ្រកាលពីថ្ងៃសៅរ៍ ទី០៨ ខែមីនា ឆ្នាំ២០១៤កន្លងមក ។ បុរសរូបនេះ ក៏បានEmail ការអះអាងរបស់ខ្លួនជូនទៅមន្ត្រីអាជ្ញាធរប្រទេសវៀតណាមនិងប្រទេសម៉ាឡេស៊ីផងដែរ ។
កាលពី២ថ្ងៃមុននេះ តាមរយៈការដាក់ពង្រាយផ្កាយរណបចំនួន១០របស់ខ្លួនដើម្បីតាមស្វែងរកយន្តហោះ ម៉ាឡេស៊ី បាត់ខ្លួនតាមការអះអាងរបស់មន្ត្រីស្រាវជ្រាវវៀតណាមដែលថា អាចធ្លាក់ក្នុងសមុទ្រវៀតណាមនោះ បានបញ្ជាក់ថា ខ្លួនបានរកឃើញ បំណែកមួយចំនួនអណ្តែកនៅក្នុងសមុទ្រដែលសង្ស័យថា ជាបំណែករបស់យន្តហោះ ម៉ាឡេស៊ីដែលបាត់ខ្លួនហើយបានធ្លាក់ចូលក្នុងសមុទ្រ ។
ដោយឡែកមន្ត្រីយោធាជើងទឹកសហរដ្ឋអាមេរិកឯណោះវិញ បានប្រាប់សារព័ត៌មានបរទេសថា មានតម្រុយ អំពីយន្តហោះ ម៉ាឡេស៊ីដែលបាត់ខ្លួននេះអាចធ្លាក់នៅក្នុងមហាសមុទ្រឥណ្ឌា តាមរយៈរលកសញ្ញា អេឡិចត្រូនិកបញ្ជូនចេញពីយន្តហោះ ទៅកាន់ផ្កាយរណប Inmarsat ដែលក្រុមហ៊ុនផលិតយន្តហោះ Boeing ដាក់បំពាក់ឲ្យយន្តហោះ ។ ដោយសារមានតម្រុយនេះ នាវាចម្បាំងUSS Kidd របស់សហរដ្ឋអាមេរិក ក៏បានធ្វើដំណើរឆ្ពោះទៅកាន់មហាសមុទ្រឥណ្ឌាតាមច្រកMadacca ដើម្បីស្វែងរកយន្តហោះ ម៉ាឡេស៊ីបាត់ខ្លួន ។
ទោះយ៉ាងណាក៏ដោយ អស់រយៈពេល១សប្តាហ៍ហើយ ក្រុមបណ្តាប្រទេសដែលជួយសង្គ្រោះ និងរុករកចំនួនជាង១០ប្រទេស ដោយប្រើឧបករណ៍ទំនើបៗផង មិនទាន់អាចស្វែងរកឃើញ យន្តហោះម៉ាឡេស៊ី ជាមួយនឹងមនុុស្សចំនួន២៣៩នាក់ ដែលបាត់ខ្លួននោះនៅឡើយ ខណៈដែលក្រុមគ្រួសារ សាច់ញាតិរបស់អ្នកដំណើរដែលបាត់ខ្លួន កំពុងរង់ចាំយ៉ាងអន្ទះសា ចង់ដឹងអំពីវាសនា សាច់ញាតិរបស់ពួកគេជាប្រចាំ ។
សរុបសេចក្តីមក រហូតមកទល់នឹងពេលនេះ ការបាត់ខ្លួនយន្តហោះ Boeing777-200 របស់ក្រុមហ៊ុនអាកាសចរណ៍ម៉ាឡេស៊ី ជាមួយនឹងមនុស្សចំនួន២៣៩នាក់ ក្នុងយន្តហោះនោះ នៅតែឋិតក្នុងសភាពអាថ៌កំបាំង ធ្វើឲ្យក្រុមមន្ត្រីជំនាញរុករកវិលក្បុងនៅឡើយ ព្រមជាមួយនឹងសំណួរដែលត្រូវចោទសួរថា តើយន្តហោះធ្លាក់ឬក៏មិនធ្លាក់ ហើយបើធ្លាក់តើធ្លាក់នៅទីណា ? មកពីមូលហេតុអ្វី ពិតប្រាកដ ? បើមនុស្សក្នុងយន្តហោះ ទាំង២៣៩នាក់ ជួបប្រទះនឹងរឿងអកុសល តើសាកសពរបស់ពួកគេនៅឯណា ខណៈដែលមានរយៈពេល១សប្តាហ៍ទៅហើយ ?៕
Source from: www.dtn7.com
Loading...
Post a Comment