ខេត្តកំពង់ចាម៖ក្រុមឈ្មួញទាំងតូចទាំងធំបានសម្រុកដឹកជញ្ជូនឈើមកពីខេត្តស្ទឹងត្រែងនិងខេត្តក្រចេះចេញទៅស្រុកយួនតាមទឹកដីស្រុកមេមត់ខេត្តកំពង់ចាម ៖ ក្រុមឈ្មួញទាំងតូចទាំងធំ បានសម្រុកដឹកជញ្ជូនឈើ មកពីខេត្តស្ទឹងត្រែង និងខេត្តក្រចេះ ចេញទៅស្រុកយួន តាមទឹកដីស្រុកមេមត់ ខេត្តកំពង់ចាម គឺក្រុមឈ្មួញបានប្រើប្រាស់ ច្រកព្រំដែនចំនួន ៣ សម្រាប់ការនាំចេញឈើខុសច្បាប់ គេមិនដែលឃើញសមត្ថកិច្ច និងមន្ត្រីពាក់ព័ន្ធយកចិត្តទុកដាក់បង្ក្រាប ឲ្យមានប្រសិទ្ធភាពម្តងណាឡើយ ដោយហេតុថាសកម្មភាព រកស៊ីដឹកជញ្ជូនឈើខុសច្បាប់នៅតំបន់នោះមានការ ឃុបឃិតបើកភ្លើងខៀវពីលោក ចាន់ សារឹម ជាមេបញ្ជាការ វរៈការពារព្រំដែនលេខ៦១៧ ហើយមន្ត្រីជំនាញ និងសមត្ថកិច្ចដទៃទៀត រង់ចាំបើករបប ឬរាប់ក្បាលឡានដឹកឈើខុសច្បាប់ យកលុយទៅច្រកហោប៉ៅធ្វើ មានធ្វើបានផ្ទាល់ខ្លួន មិនដែលខ្វល់ខ្វាយពីការបង្ក្រាបឲ្យស្របតាម បទបញ្ជារបស់រាជរដ្ឋាភិបាល ម្តងណាឡើយ។
ប្រជាពលរដ្ឋបានរាយការណ៍ថា សមត្ថកិច្ចនិងមន្ត្រីជំនាញ ជាច្រើនស្ថាប័ន បាននាំគ្នាដាក់ប៉ុស្តិ៍ តាមដងផ្លូវសំខាន់ៗ ដែលមានការដឹកជញ្ជូនឈើខុសច្បាប់ ប៉ុន្តែសមត្ថកិច្ចនិងមន្ត្រីអស់ទាំងនោះ បានត្រឹមតែប្រមូលលុយពីក្រុមឈ្មួញ រកស៊ីដឹកឈើខុសច្បាប់ ។ ក្រុមឈ្មួញរកស៊ី ដឹកជញ្ជូនឈើប្រណីត ដ៏មានឥទ្ធិពលមួយចំនួនដូចជា ឈ្មោះយ៉ា ឈ្មោះដួង ឈ្មោះ ជួប ភិរុណ ហៅលាភ ភាគច្រើនបានដឹកជញ្ជូនឈើ មកពីចំណុចស្រុកសៀមប៉ាង និងស្រុកសេសាន នៃខេត្តស្ទឹងត្រែង ដោយឆ្លងកាត់ខេត្តក្រចេះ នាំទៅលក់នៅស្រុកយួន តាមស្រុកមេមត់ ខេត្តកំពង់ចាម យ៉ាងរលូនល្អ ក៏ព្រោះតែក្រុមឈ្មួញ អស់ទាំងនោះ ចេះបែងចែកផលប្រយោជន៍ ឲ្យមន្ត្រីជំនាញ និងសមត្ថកិច្ចពាក់ព័ន្ធ។
មានច្រកព្រំដែនសំខាន់ៗចំនួន៣ ដែលក្រុមឈ្មួញ បាននាំចេញឈើទៅលក់ នៅស្រុកយួនដោយរលូនល្អ គឺទី១ ច្រកច័ន្ទមូល ទី២ច្រកបឹងជ្រោង និងទី៣ គឺច្រកដូង៧ដើម ហើយបើទោះបីជា រដ្ឋាភិបាលបានដាក់ចេញនូវបទបញ្ជាតឹងរ៉ឹង ហាមឃាត់មិនឲ្យ មានការដឹកជញ្ជូនឈើខុសច្បាប់ ក៏គេសង្កេតឃើញក្រុមឈ្មួញមានអំណាច មួយចំនួននៅតែ អាចធ្វើសកម្មភាព ដឹកជញ្ជូនឈើខុសច្បាប់ ចេញតាមច្រកទាំង៣នេះ យ៉ាងរលូនល្អ។ សូម្បីតែលោក ចាន់ សារឹម ជាមេបញ្ជាការនគរបាល វរៈការពារព្រំដែនលេខ៦១៧ ដែលមានភារកិច្ចគ្រប់គ្រងតំបន់នោះ ក៏កំពុងសកម្មបំផុតក្នុងការចាត់ចែង មន្ត្រីក្រោមឱវាទ ឲ្យចុះប្រមូលលុយ ពីក្រុមឈ្មួញរកស៊ី ដឹកជញ្ជូនឈើខុសច្បាប់ ហើយបើគ្មានការសែនព្រេនលោក ចាន់ សារឹម ទេនោះ មិនអាចដឹកជញ្ជូនឈើ ខុសច្បាប់ចេញទៅស្រុកយួនបានទេ។
ជាពិសេសឈ្មោះ ជួប ភិរុណ ហៅលាភ ដែលមានតួនាទីជា អនុប្រធានវរៈការពារ ព្រំដែនលេខ៦១៧ ទទួលបន្ទុកផ្នែកសេនាធិការ បានប្រើស្បែករបស់ខ្លួន ទៅរកស៊ីដឹកជញ្ជូនឈើខុសច្បាប់ យ៉ាង អនាធិបតេយ្យបំផុត ភាគច្រើនឈ្មោះ ជួប ភិរុណ ហៅលាភ បានប្រើប្រាស់រថយន្ត ទំនើបៗដឹកជញ្ជូនឈើ មកពីខេត្តស្ទឹងត្រែង និងចាំប្រមូលទិញឈើគ្រញូង ពីចំណុចស្ពានជ្រីវ ព្រំប្រទល់ខេត្តក្រចេះ និងខេត្តកំពង់ចាម យកទៅស្តុកទុកក្នុងឃ្លាំង ដ៏ធំមួយកន្លែង ស្ថិតក្នុងភូមិដារ ឃុំដារ ទល់មុខវិទ្យាល័យដារ នៃស្រុកមេមត់ ខេត្តកំពង់ចាម។ នៅពេលប្រមូលឈើ បានគ្រប់ចំនួនហើយ លោកជួប ភិរុណ ហៅលាភ បានរៀបចំថ្លឹងឈើគ្រញូង ដើម្បីដឹកតាមរថយន្តនីសាន់ ណាវ៉ារ៉ា និងរថយន្តឡង់គ្រីស័រ ជាច្រើនគ្រឿង ចូលទៅលក់នៅស្រុកយួន តាមច្រកព្រំដែនទាំង៣ ដូចបានរៀបរាប់ពីខាងលើនេះ ព្រោះមន្ត្រីនិងសមត្ថកិច្ចពាក់ព័ន្ធ ដែលប្រចាំការតាមដងផ្លូវ តាមច្រកព្រំដែនសុទ្ធសឹង ជាកូនជឹងរបស់ឈ្មោះ ជួប ភីរុណ ហៅលាភ ។
គេចង់ឃើញរដ្ឋមន្ត្រីក្រសួងកសិកម្ម លោក អ៊ុក រ៉ាប៊ុន ចេញបេសកកម្មទៅកាន់ ភូមិភាគឦសាន ដើម្បីត្រួតពិនិត្យមើល ពីទំហំនៃការកាប់បំផ្លាញព្រៃឈើ នៅតាមតំបន់ ព្រៃអភិរក្ស ឬនៅតាមតំបន់ឧទ្យានជាតិ ជាពិសេសនៅក្នុង ស្រុកសេសានខេត្ត ស្ទឹងត្រែង មានការកាប់បំផ្លាញ ព្រៃឈើទ្រង់ទ្រាយធំ ជ្រកក្រោមរូបភាព ស្តារបាតអាងទំនប់វារីអគ្គិសនី ហើយឈើប្រណីតរាប់រយ រាប់ពាន់ម៉ែត្រគូប ត្រូវបានក្រុមឈ្មួញដ៏មានអំណាច ដឹកជញ្ជូនចេញពីទីនោះ ឆ្លងកាត់ទីរួមខេត្តស្ទឹងត្រែង និងខេត្តក្រចេះ បន្តទៅលក់នៅស្រុកយួន យ៉ាងអនាធិបតេយ្យបំផុត។ វិនាសកម្មព្រៃឈើនៅក្នុងប្រទេសកម្ពុជាច្បាស់ណាស់ដែលថាលោករដ្ឋមន្ត្រី អ៊ុក រ៉ាប៊ុន គឺជាអ្នកទទួល ខុសត្រូវធំជាងគេ សម្រាប់ការធ្វេសប្រហែស និងភាពអសកម្មដែលមន្ត្រីថ្នាក់ក្រោម គិតតែរាប់ក្បាលឡាន ដឹកឈើយកលុយ៕
Source from: watphnom-news.com
Loading...
Post a Comment