អតីតសិស្សចៅក្រមជំនាន់ទី១បីនាក់និងជំនាន់ទី២ពីរនាក់ត្រូវបានតែងតាំងជាប្រធានតុលាការសាលាដំបូងក្នុងរយៈពេលដ៏ខ្លី
អនុលោមតាមព្រះរាជក្រឹត្យលេខនស/រកត/០៤១៤/៤៤៨ ចុះថ្ងៃទី០៩ ខែមេសា ឆ្នាំ២០១៤ ដែលឡាយព្រះហស្តលេខាដោយព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ក្រោយទទួលបានការឯកភាពពីឧត្តមក្រុមប្រឹក្សានៃអង្គចៅក្រម នាសម័យប្រជុំថ្ងៃទី០៨ ខែមេសា ឆ្នាំ២០១៤កន្លងមក បានបង្ហាញឲ្យឃើញថា មានអតីតសិស្សចៅក្រមជំនាន់ទី១ចំនួន៣នាក់ និងអតីតសិស្សចៅក្រមជំនាន់ទី២ចំនួន២នាក់ ត្រូវបានតែងតាំងជាប្រធានតុលាការសាលាដំបូងក្នុងរយៈពេលដ៏ខ្លី ដ៏គួរឲ្យចាប់អារម្មណ៍ ដោយមជ្ឈដ្ឋានខ្លះយល់ថា មកពីអស់លោកចៅក្រមទាំងនោះមានសមត្ថភាព និងមជ្ឈដ្ឋានខ្លះទៀតយល់ថា មកពីអស់លោកចៅក្រមទាំងនោះមានលុយកាក់សូកប៉ាន់ថ្នាក់លើ និងមានបក្ខពួក ព្រមទាំងបម្រើការងារគណបក្សប្រជាជនកម្ពុជាបានល្អ ។
អតីតសិស្សចៅក្រមជំនាន់ទី១ចំនួន៣នាក់ និងអតីតសិស្សចៅក្រមជំនាន់ទី២ចំនួន២នាក់ នៃរាជបណ្ឌិត្យសភាវិជ្ជាជីវៈតុលាការ ដែលទទួលបានការតែងតាំងជាប្រធានតុលាការសាលាដំបូងក្នុងរយៈពេលដ៏ខ្លីនោះ រួមមាន ៖
១-លោកចៅក្រម ហុក វ៉ាន់ធីណា អតីតសិស្សចៅក្រមជំនាន់ទី១ (តាំងស៊ប់ក្នុងក្របខ័ណ្ឌចៅក្រម និងបម្រើការងារជាចៅក្រមសាលាដំបូងខេត្តតាកែវ ដោយព្រះរាជក្រឹត្យលេខនស/រកត/០២០៧/០៦៧ ចុះថ្ងៃទី១៦ ខែកុម្ភៈ ឆ្នាំ២០០៧) អតីតអនុប្រធានសាលាដំបូងខេត្តកណ្តាល ត្រូវបានតែងតាំងជាប្រធានសាលាដំបូងខេត្តកណ្តាល ។
២-លោកចៅក្រម ងួន ណារ៉ា អតីតសិស្សចៅក្រមជំនាន់ទី១ (តាំងស៊ប់ក្នុងក្របខ័ណ្ឌចៅក្រម និងបម្រើការងារជាចៅក្រមសាលាដំបូងខេត្តសៀមរាប ដោយព្រះរាជក្រឹត្យលេខនស/រកត/០២០៧/០៦៧ ចុះថ្ងៃទី១៦ ខែកុម្ភៈ ឆ្នាំ២០០៧) អតីតអនុប្រធានសាលាដំបូងខេត្តកំពត ត្រូវបានតែងតាំងជាប្រធានសាលាដំបូងខេត្តសៀមរាប ។
៣-លោកចៅក្រម អ៊ាក ផល្លា អតីតសិស្សចៅក្រមជំនាន់ទី១ (តាំងស៊ប់ក្នុងក្របខ័ណ្ឌចៅក្រម និងបម្រើការងារជាចៅក្រមសាលាដំបូងខេត្តបន្ទាយមានជ័យ ដោយព្រះរាជក្រឹត្យលេខនស/រកត/០២០៧/០៦៧ ចុះថ្ងៃទី១៦ ខែកុម្ភៈ ឆ្នាំ២០០៧) ត្រូវបានតែងតាំងជាប្រធានសាលាដំបូងខេត្តឧត្តរមានជ័យ ដោយព្រះរាជក្រឹត្យលេខនស/រកត/០៩១០/៧៨៩ ចុះថ្ងៃទី២៤ ខែកញ្ញា ឆ្នាំ២០១០ ។
៤-លោកចៅក្រម ជី សុខ អតីតសិស្សចៅក្រមជំនាន់ទី២ (តាំងស៊ប់ក្នុងក្របខ័ណ្ឌចៅក្រម និងបម្រើការងារជាចៅក្រមសាលាដំបូងខេត្តសៀមរាប ដោយព្រះរាជក្រឹត្យលេខនស/រកត/០២១០/១២៧ ចុះថ្ងៃទី០៤ ខែកុម្ភៈ ឆ្នាំ២០១០) ត្រូវបានតែងតាំងជាប្រធានសាលាដំបូងខេត្តបន្ទាយមានជ័យ ។
៥-លោកចៅក្រម ជា វណ្ណៈ អតីតសិស្សចៅក្រមជំនាន់ទី២ (តាំងស៊ប់ក្នុងក្របខ័ណ្ឌចៅក្រម និងបម្រើការងារជាចៅក្រមសាលាដំបូងខេត្តកំពង់ចាម ដោយព្រះរាជក្រឹត្យលេខនស/រកត/០២១០/១២៧ ចុះថ្ងៃទី០៤ ខែកុម្ភៈ ឆ្នាំ២០១០) ត្រូវបានតែងតាំងជាប្រធានសាលាដំបូងខេត្តបាត់ដំបង ។ មានន័យថា លោក ជា វណ្ណៈ ធ្វើជាចៅក្រមក្នុងរយៈពេលបានចំនួន៤ឆ្នាំ ត្រូវបានតែងតាំងជាប្រធានសាលាដំបូងតែម្តង ៕
Source from: www.dtn7.com
Loading...
Post a Comment