ករណីជនសង្ស័យប្រើប្រាស់គ្រឿងញៀនដែលតុលាការដោះលែង តែចៅហ្វាយខេត្តបញ្ជាឲ្យចាប់ខ្លួនមកវិញក្លាយជាប្រធានបទក្តៅនៅខេត្តពោធិ៍សាត់
ប្រិយមិត្តអ្នកអាននឹងអាចនៅចងចាំបាននូវព្រឹត្តិការណ៍យ៉ាងកក្រើកក្នុងស្ថាប័នតុលាការ កាលពីដើមឆ្នាំ២០០៥កន្លងទៅ ដែលរាជរដ្ឋាភិបាលកម្ពុជាមានសម្តេចអគ្គមហាសេនាបតីតេជោ ហ៊ុន សែន ហៅបុរសខ្លាំង ជានាយករដ្ឋមន្ត្រី បានប្រើកណ្តាប់ដៃដែកបញ្ជាឲ្យសមត្ថកិច្ចនគរបាលយុត្តិធម៌តាមចាប់ខ្លួនឧក្រិដ្ឋជនមួយចំនួនមកវិញ បន្ទាប់ពីត្រូវបានដោះលែងរួចហើយ ដោយស្ថាប័នសាលាដំបូងរាជធានីភ្នំពេញ(អតីតតុលាការក្រុងភ្នំពេញ) ធ្វើឲ្យចៅក្រម-ព្រះរាជអាជ្ញាមួយចំនួនជ្រួលច្របល់រត់ចែកជើងគ្នា ខ្លះត្រូវទទួលរងការផ្តន្ទាទោស ខ្លះត្រូវលុបឈ្មោះចេញពីក្របខ័ណ្ឌចៅក្រម និងខ្លះទៀតត្រូវជាប់ទណ្ឌកម្មវិន័យផ្លាស់ប្តូរប៉ុស្តិ៍ធ្វើការ ឬបញ្ឈរជើងដោយបង្ខំ ។ ឥឡូវ ករណីស្រដៀងគ្នានេះ កំពុងកើតមានឡើងយ៉ាងគគុក ដោយជនសង្ស័យទាក់ទងនឹងការប្រើប្រាស់គ្រឿនញៀន ដែលសមត្ថកិច្ចនគរបាលយុត្តិធម៌ចាប់ខ្លួន និងបញ្ជូនទៅស្ថាប័នតុលាការ តែត្រូវសាលាដំបូងខេត្តពោធិ៍សាត់ មានលោកចៅក្រមដល់អាយុចូលនិវត្តន៍ តែមិនព្រមចូលនិវត្តន៍ ថោង អុល ជាប្រធាន ធ្វើការដោះលែង ជាហេតុនាំឲ្យឯកឧត្តមអភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពខេត្តពោធិ៍សាត់ ចេញបញ្ជាឲ្យតាមចាប់ខ្លួនជនសង្ស័យទាំងនោះយកមកវិញ ។
ប្រភពព័ត៌មានពីខេត្តពោធិ៍សាត់បានឲ្យដឹងថា ជនសង្ស័យពាក់ព័ន្ធនឹងការប្រើប្រាស់គ្រឿងញៀនចំនួន២នាក់ គឺឈ្មោះ នួន បញ្ញា ភេទប្រុស អាយុ២១ឆ្នាំ និងឈ្មោះ ម៉ុត រ៉ាឌី ភេទប្រុស អាយុ៣២ឆ្នាំ រស់នៅក្រុងពោធិ៍សាត់ ខេត្តពោធិ៍សាត់ ត្រូវបានកងកម្លាំងនគរបាលក្រុងពោធិ៍សាត់ចាប់ខ្លួនកាលពីវេលាព្រឹក នាថ្ងៃទី១៩ ខែមិថុនា ឆ្នាំ២០១៤ និងបញ្ជូនសំណុំរឿងទៅសាលាដំបូងខេត្តពោធិ៍សាត់ ខណៈដែលជនសង្ស័យទាំង២នាក់នោះសមត្ថកិច្ចធ្វើតេស្តត្រួតពិនិត្យទឹកនោមឃើញមានផ្ទុកសារធាតុញៀន ប៉ុន្តែនារសៀលថ្ងៃដដែលត្រូវបានតុលាការធ្វើការដោះលែងវិញ ។ ក្រោយមក ទើបឯកឧត្តម ម៉ៅ ធនិន អភិបាលនៃគណៈអភិបាល និងជាប្រធានគណៈបញ្ជាការឯកភាពខេត្តពោធិ៍សាត់ ចេញបញ្ជាឲ្យសមត្ថកិច្ចនគរបាលយុត្តិធម៌តាមស្វែងរកចាប់ខ្លួនជនសង្ស័យទាំង២នាក់ ដែលតុលាការធ្វើការដោះលែងនោះមកវិញ ។
លោកឧត្តមសេនីយ៍ត្រី សារុន ចាន់ធី ស្នងការនគរបាលខេត្តពោធិ័សាត់ បានមានប្រសាសន៍ប្រាប់បណ្តាញព័ត៌មានកាលពីថ្ងៃទី២០ ខែមិថុនា ឆ្នាំ២០១៤ម្សិលមិញនេះថា ក្នុងចំណោមជនសង្ស័យទាំង២នាក់ដែលឯកឧត្តមប្រធានគណៈបញ្ជាការឯកភាពខេត្តបញ្ជាឲ្យចាប់ខ្លួនមកវិញនោះ គឺសមត្ថកិច្ចចាប់បានម្នាក់ហើយ ដោយឡែកម្នាក់ទៀតបានគេចខ្លួនបាត់ពីមូលដ្ឋាន ប៉ុន្តែសមត្ថកិច្ចនឹងស្វែងរកចាប់ខ្លួនបន្តទៀត ។
មជ្ឈដ្ឋានអ្នកច្បាប់ឯករាជ្យនៅកម្ពុជា បានលើកឡើងថា ប្រសិនបើការស៊ើបអងេ្កតរកឃើញថា ការដោះលែងជនសង្ស័យទាំង២នាក់ពាក់ព័ន្ធនឹងការប្រើប្រាស់គ្រឿងញៀនដូចសមត្ថកិច្ចនគរបាលអះអាងនោះ មានភាពមិនប្រក្រតីចេញពីស្ថាប័នតុលាការប្រាកដមែន គឺអាជ្ញាធរត្រូវតែបន្តបើកការស្រាវជ្រាវទៅលើចៅក្រម និងព្រះរាជអាជ្ញាដែលសម្រេចដោះលែងជនសង្ស័យទាំង២នាក់ឲ្យដល់ឫសគល់ ដូចដែលបុរសខ្លាំងធ្លាប់បានប្រើកណ្តាប់ដៃដែកវាយទៅលើស្ថាប័នតុលាការ កាលពីអំឡុងដើបឆ្នាំ២០០៥កន្លងមក ។ ផ្ទុយទៅវិញ បើស្រាវជ្រាវរកឃើញថា ការដោះលែងជនសង្ស័យដោយស្ថាប័នតុលាការមានភាពត្រឹមត្រូវនោះ គឺឯកឧត្តម ម៉ៅ ធនិន ត្រូវតែទទួលទោសទណ្ឌវិញពីបទជ្រៀតជ្រែក និងរំលោភលើការសម្រេចរបស់ស្ថាប័នតុលាការ ដូចមានចែងក្នុងក្រមព្រហ្មទណ្ឌនែព្រះរាជាណាចក្រកម្ពុជា ។
គួររំលឹកជូនថា កាលពីខែមីនា ឆ្នាំ២០០៥ យោងតាមរបាយការណ៍ចុះខែកុម្ភៈ ឆ្នាំ២០០៥ របស់ក្រសួងមហាផ្ទៃ បុរសខ្លាំងជានាយករដ្ឋមន្ត្រី បានបញ្ចេញកណ្តាប់ដៃដែកបង្គាប់បញ្ជាឲ្យសមត្ថកិច្ចតាមស្វែងរកចាប់ខ្លួនទណ្ឌិតមួយចំនួនដែលត្រូវបានតុលាការដោះលែងមានភាពមិនប្រក្រតី ទាក់ទងនឹងផលប្រយោជន៍ផ្ទាល់ខ្លួនមកវិញ និងបានបង្គាប់ឲ្យឧត្តមក្រុមប្រឹក្សានៃអង្គចៅក្រមធ្វើការដាក់វិន័យ ព្រមទាំងប្តឹងផ្តល់ទៅលើចៅក្រម-ព្រះរាជអាជ្ញាជាច្រើននាក់ដែលប្រព្រឹត្តខុសឆ្គងទៅស្ថាប័នតុលាការ ដោយចាត់ទុកថា ជាផ្នែកមួយនៃកំណែទម្រង់ច្បាប់ និងប្រព័ន្ធយុត្តិធម៌ ៕
Source from: www.dtn7.com
Post a Comment