អគ្គាធិការក្រសួងហិរញ្ញវត្ថុជាកូនប្រុសឯកឧត្តម ឯក សំអុល រងការចោទប្រកាន់ថាក្រៅពីពុករលួយបានប្រើប្រាស់មន្ត្រីលម្អៀងថែមទៀត
មន្ត្រីរាជការបម្រើការនៅអគ្គាធិការដ្ឋានក្រសួងសេដ្ឋកិច្ចនិងហិរញ្ញវត្ថុ បាននិងកំពុងធ្វើការចោទប្រកាន់ទៅលើឯកឧត្តមបណ្ឌិត ឯក វីរដេដ្ឋ ជាអគ្គាធិការថា ក្រៅពីបានប្រព្រឹត្តអំពើពុករលួយលើការរៀបចំដំឡើងឋានន្តរស័ក្តិមន្ត្រីរាជការក្នុងអគ្គាធិការដ្ឋាន ចាប់ពីថ្នាក់អនុប្រធានការិយាល័យ រហូតដល់ថ្នាក់អគ្គាធិការរង ត្រូវចាយលុយក្នុងរង្វង់ពី១៧.០០០ដុល្លារអាមេរិក ទៅ៦០.០០០ដុល្លារអាមេរិក តាមកម្រិតនៃឋានៈនិងមុខតំណែង ព្រមទាំងប្រមូលប្រាក់ចំនួនប្រមាណ៨.៦០០ដុល្លារអាមេរិក ដោយអះអាងថា យកទៅរត់ការនៅក្រសួងមុខងារសាធារណៈ ដើម្បីឲ្យមានការទទួលស្គាល់មុខតំណែង តួនាទី និងកាំប្រាក់បៀវត្សរ៍មន្ត្រីនោះ គឺបានប្រើប្រាស់អំណាចរបស់ខ្លួនចាត់ចែងឲ្យមន្ត្រីក្រោមឱវាទចុះបំពេញបេសកកម្មតាមបណ្តាខេត្តមានភាពលម្អៀង អនុលោមតាមបក្ខពួកនិយមថែមទៀត ។
ក្រុមមន្ត្រីបានបង្ហើបប្រាប់ឲ្យដឹងថា នៅក្នុងអគ្គាធិការដ្ឋានក្រសួងសេដ្ឋកិច្ចនិងហិរញ្ញវត្ថុទាំងមូល គឺមានមនុស្សតែ២នាក់គត់ដែលឯកឧត្តមអគ្គាធិការ ឯក វីរដេដ្ឋ ប្រើប្រាស់ឲ្យដឹកនាំប្រតិភូចុះបំពេញបេសកកម្មនៅតាមបណ្តាខេត្តនានាក្នុងនាមជាប្រធាន និងអនុប្រធានប្រតិភូ ជាអាទិ៍ លោក ឈឹម សំណាង ជាអគ្គាធិការរង និងលោក ទូច ស្រេង ជាប្រធាននាយកដ្ឋានអធិការកិច្ចហិរញ្ញវត្ថុថ្នាក់ជាតិ ហើយក៏មនុស្ស២នាក់នេះដែរដែលដើរតួយ៉ាងសកម្មជំនួសឯកឧត្តមអគ្គាធិការខាងរករឿង និងគំរាមកំហែងទៅលើមន្ត្រីរូបណាដែលបាននិយាយបកអាក្រាតអំពើពុករលួយរបស់ឯកឧត្តម ឯក វីរដេដ្ឋ ។
រឿងពាក់ព័ន្ធនឹងការប្រមូលប្រាក់យកទៅរត់ការនៅក្រសួងមុខងារសាធារណៈ ដើម្បីឲ្យមានការទទួលស្គាល់មុខតំណែង តួនាទី និងកាំប្រាក់មន្ត្រីនៅក្នុងអគ្គាធិការដ្ឋានក្រសួងសេដ្ឋកិច្ចនិងហិរញ្ញវត្ថុ ត្រូវបានក្រុមមន្ត្រីបញ្ជាក់ឲ្យដឹងដូចខាងក្រោម ៖
១-អគ្គាធិការរងចំនួន៣នាក់ ដោយក្នុងម្នាក់ៗត្រូវបង់លុយចំនួន៣០០ដុល្លារអាមេរិក គឺសរុបចំនួន៩០០ដុល្លារអាមេរិក ។
២-ប្រធាននាយកដ្ឋានចំនួន៣នាក់ ដោយក្នុងម្នាក់ៗត្រូវបង់លុយចំនួន៣០០ដុល្លារអាមេរិក គឺសរុបចំនួន៩០០ដុល្លារអាមេរិក ។
៣-អនុប្រធាននាយកដ្ឋានចំនួន១០នាក់ ដោយក្នុងម្នាក់ៗត្រូវបង់លុយចំនួន៣០០ដុល្លារអាមេរិក គឺសរុបចំនួន៣.០០០ដុល្លារអាមេរិក ។
៤-ប្រធានការិយាល័យចំនួន១២នាក់ដោយក្នុងម្នាក់ៗត្រូវបង់លុយចំនួន១៥០ដុល្លារអាមេរិក គឺសរុបចំនួន១.៨០០ដុល្លារអាមេរិក។
៥-អនុប្រធានការិយាល័យចំនួន២០នាក់ ដោយក្នុងម្នាក់ៗត្រូវបង់លុយចំនួន១០០ដុល្លារអាមេរិក គឺសរុបចំនួន២.០០០ដុល្លារអាមេរិក ។
ដូច្នេះ សរុបទឹកប្រាក់ដែលឯកឧត្តម ឯក វីរដេដ្ឋ ត្រូវប្រមូលពីមន្ត្រីក្រោមឱវាទ ដើម្បីយកទៅរត់ការនៅក្រសួងមុខងារសាធារណៈ គឺមានចំនួន៨.៦០០ដុល្លារអាមេរិក ។
ក្រុមមន្ត្រីរាជការនៃអគ្គាធិការដ្ឋានក្រសួងសេដ្ឋកិច្ចនិងហិរញ្ញវត្ថុ បានសំណូមពរចំពោះឯកឧត្តមបណ្ឌិត ឱម យ៉ិនទៀង ប្រធានអង្គភាពប្រឆាំងអំពើពុករលួយ និងឯកឧត្តមបណ្ឌិត អូន ព័ន្ទមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មេត្តាបើកការស៊ើបអង្កេតស្រាវជ្រាវ និងមានវិធានការទៅលើអំពើអសកម្មរបស់ឯកឧត្តម ឯក វីរដេដ្ឋ ដ៏មហិមានោះផង ពីព្រោះបើបណ្តែតបណ្តោយឲ្យអគ្គាធិការក្រសួងសេដ្ឋកិច្ចនិងហិរញ្ញវត្ថុមានលទ្ធភាព និងមានឱកាសប្រព្រឹត្តអំពើពុករលួយទៅហើយនោះ គឺក្រសួងសេដ្ឋកិច្ចនិងហិរញ្ញវត្ថុទាំងមូលនឹងក្លាយជាស្ថាប័នពុករលួយទាំងស្រុងតែម្តង ។
ឯកឧត្តម ឯក វីរដេដ្ឋ អគ្គាធិការនៃអគ្គាធិការដ្ឋានក្រសួងសេដ្ឋកិច្ចនិងហិរញ្ញវត្ថុ គេហទំព័រសារព័ត៌មានដើមត្នោតមិនអាចសុំការបំភ្លឺបញ្ជាក់អំពីរឿងអាស្រូវពុករលួយ និងការចោទប្រកាន់របស់មន្ត្រីក្រោមឱវាទបាននៅឡើយត្រឹមថ្ងៃទី២៤ ខែមិថុនា ឆ្នាំ២០១៤នេះ ពីព្រោះទូរស័ព្ទមិនអាចទំនាក់ទំនងបាន ។
សូមបញ្ជាក់ជូនថា ឯកឧត្តម ឯក វីរដេដ្ឋ គឺជាកូនប្រុសរបស់ឯកឧត្តម ឯក សំអុល ជាសមាជិកអចិន្ត្រៃយ៍នៃគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមប្រឹក្សាធម្មនុញ្ញ ត្រូវបានតែងតាំងជាអគ្គាធិការនៃអគ្គាធិការដ្ឋានក្រសួងសេដ្ឋកិច្ចនិងហិរញ្ញវត្ថុបន្ថែមលើមុខងារបច្ចុប្បន្ន ដោយព្រះរាជក្រឹត្យលេខនស/រកត/១១១៣/១០៤៧ ចុះថ្ងៃទី២៤ ខែតុលា ឆ្នាំ២០១៣ ។
ដោយសារឯកឧត្តមបណ្ឌិត ឯក វីរដេដ្ឋ ជាកូនប្រុសរបស់ឯកឧត្តម ឯក សំអុល ហើយឯកឧត្តមបណ្ឌិត ឱម យ៉ិនទៀង និងឯកឧត្តមបណ្ឌិត អូន ព័ន្ធមុនីរ័ត្ន ជាសមាជិកគណៈកម្មាធិការកណ្តាលគណបក្សប្រជាជនកម្ពុជា ឋិតក្រោមឥទ្ធិពលអំណាចរបស់ឯកឧត្តម ឯក សំអុល ក្នុងក្របខ័ណ្ឌគណបក្ស ទើបធ្វើឲ្យអំណាចឯកឧត្តមបណ្ឌិត ឯក វីរដេដ្ឋ នៅក្នុងក្រសួងសេដ្ឋកិច្ចនិងហិរញ្ញវត្ថុ គឺមហិមា របៀប"ជិះសេះលែងដៃ"តែម្តង ៕
Source from: www.dtn7.com
Post a Comment