ប្រិយមិត្តអ្នកលេង Facebook ប្រតិកម្មយ៉ាងកក្រើកតបទៅនឹង Page របស់ CNN ដែលសរសេរថា ប្រាសាទអង្គរវត្តជារបស់ថៃ
កាលពីថ្ងៃទី១៧ ខែមិថុនា ឆ្នាំ២០១៤កន្លងទៅថ្មីៗនេះ ទូរទស្សន៍ CNN ដ៏ល្បីរបស់សហរដ្ឋអាមេរិកបាន Post អត្ថបទមួយចុះផ្សាយក្នុង Website អំពីតំបន់ទេសចរណ៍ជាប់ជាសម្បត្តិបេតិកភណ្ឌពិភពលោកទាំង១០ នៅក្នុង Page ដ៏ធំរបស់ខ្លួននៃបណ្តាញព័ត៌មានសង្គម Facebook ដ៏ពេញនិយម ដែលមានអ្នក Like Page ចំនួនជាង 6M(ជាង៦លាន)នោះ សរសេរ(មិនដឹងជាចេតនា ឬអចេតនា?)ថា Thailand´s Angkor Wat is only no.6- so what´s the world´s top landmark ? "ប្រាសាទអង្គរវត្តរបស់ថៃជាប់លេខ៦ ។ ដូច្នេះ តើសម្បត្តិបេតិកភណ្ឌពិភពលោកណាជាប់លេខ១?" ធ្វើឲ្យមានការភ្ញាក់ផ្អើលយ៉ាងខ្លាំងដល់បណ្តាប្រិយមិត្តអ្នកលេង Facebook និងអ្នកដែលស្គាល់អំពីអត្តសញ្ញាណប្រាសាទអង្គរវត្តច្បាស់លាស់ទាំងឡាយ ។
ក្រោយការសរសេរខុសឆ្គង ឬភ័ន្តច្រឡំអំពីកម្មសិទ្ធិប្រាសាទអង្គរវត្តក្នុង Page របស់ខ្លួនរួចមក ទូរទស្សន៍ CNN ត្រូវបានប្រិយមិត្តអ្នកលេង Facebook ប្រតិកម្មរិះគន់យ៉ាងកក្រើក និងបានបញ្ចេញមតិកែតម្រូវភ្លាមៗដែរ ដោយបានបញ្ជាក់ថា Angkor Wat is in Cambodia ទើបធ្វើឲ្យ Admin របស់ Page ឈ្មោះ CNN International សម្រេចកែតម្រូវពីពាក្យសរសេរខុសឆ្គងថា "Thailand" មកជាពាក្យសរសេរត្រឹមត្រូវវិញថា "Cambodia" ។ លើសពីនេះ Page របស់ទូរទស្សន៍ CNN ក៏បានថ្លែងអំណរគុណចំពោះការបញ្ចេញមតិឲ្យមានការកែតម្រូវនោះផងដែរ ។ មានន័យថា ទូរទស្សន៍ CNN បានទទួលស្គាល់ឡើងវិញថា ប្រាសាទអង្គរវត្តជារបស់កម្ពុជា ។
តាមពិតទៅ ខ្លឹមសារអត្ថបទខាងក្នុងទាំងស្រុងរបស់ Website ទូរទស្សន៍ CNN បានសរសេរថា ប្រាសាទអង្គរវត្ត ឋិតនៅខេត្តសៀមរាបរបស់កម្ពុជាជាប់លំដាប់លេខរៀងទី៦ និងប្រាសាទបាយ័ន ឋិតនៅខេត្តសៀមរាបរបស់កម្ពុជា ជាប់លំដាប់លេខរៀងទី៧ ។ ផ្ទុយពីនេះ នៅពេលយកអត្ថបទមក Post ក្នុង Page របស់ខ្លួន បែរជា Admin សរសេរពាក្យជាចំណងជើងខាងលើមានការខុសឆ្គងថា ប្រាសាទអង្គរវត្តជារបស់ថៃទៅវិញ ធ្វើឲ្យប្រិយមិត្តអ្នកលេង Facebook ប្រតិកម្មរិះគន់យ៉ាងចាស់ដៃ ។
សន្ទុះប្រតិកម្មភ្លាមៗស្នើឲ្យមានការកែតម្រូវទៅលើកំហុសឆ្គងរបស់ Admin Page ទូរទស្សន៍ CNN ក្នុង Facebook ទទួលបាននូវប្រសិទ្ធភាពទាន់ហេតុការណ៍បែបនេះ ធ្វើឲ្យមជ្ឈដ្ឋានអ្នកវិភាគព្រឹត្តិការណ៍នយោបាយនៅកម្ពុជានឹកឃើញទៅដល់របៀបរបបធ្វើការរបស់អង្គភាពព័ត៌មាននិងប្រតិកម្មរហ័សរបស់ទីស្តីការគណៈរដ្ឋមន្ត្រី នៃរាជរដ្ឋាភិបាលកម្ពុជា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន ហៅបុរសខ្លាំងជានាយករដ្ឋមន្ត្រី្ឯណោះវិញ គឺយ៉ាប់ និងយឺតជាងកៅស៊ូទៅទៀត ទោះបីអនុក្រឹត្យរបស់រាជដ្ឋាភិបាលបានសម្រេចបង្កើតអង្គភាពព័ត៌មាន និងប្រតិកម្មរហ័សចំណុះទីស្តីការគណៈរដ្ឋមន្ត្រីឡើង ដើម្បីការងារព័ត៌មាននិងប្រតិកម្មចំពោះរាល់ខ្លឹមសារនៃរូបភាពបណ្តាញព័ត៌មានជាតិ អន្តរជាតិ និងមតិរបស់មជ្ឈដ្ឋាននានា ដែលមានចរិតអវិជ្ជមាន ដើម្បីរក្សានិងការពារកិត្យានុភាពរបស់រាជរដ្ឋាភិបាល សំដៅលើកកម្ពស់អត្តសញ្ញាណជាតិក៏ដោយ ។
ព័ស្តុតាងមួយចំនួនក្នុងចំណោមព័ស្តុតាងជាច្រើនទៀតធ្លាប់បានបង្ហាញឲ្យឃើញរូចហើយថា កាលពីអំឡុងពេលមុនបោះឆ្នោតជ្រើសតាំងតំណាងរាស្ត្រនីតិកាលទី៥ ថ្ងៃទី២៨ ខែកក្កដា ឆ្នាំ២០១៣មកដល់ ព័ត៌មានចរចាមអារាមពេញ Facebook ថា សម្តេចអគ្គមហាធម្មពោធិសាល ជា ស៊ីម ប្រធានគណបក្សប្រជាជនកកម្ពុជា និងជាប្រធានព្រឹទ្ធសភានព្រះរាជាណាចក្រកម្ពុជា ទទួលមរណភាព អូសបន្លាយពេលដល់ជាង១សប្តាហ៍ គ្មានឃើញប្រតិកម្មបំភ្លឺតបបញ្ជាក់ការពិតអ្វីទាល់់តែសោះពីគណបក្សប្រជាជនកម្ពុជា ពីស្ថាប័នព្រឹទ្ធសភា ឬពីអង្គភាពព័ត៌មាន និងប្រតិកម្មរហ័ស នាំឲ្យមានការភ័ន្តច្រឡំអស់រយៈពេលយូរបង្គួរ ។ នាដើមខែមិថុនា ឆ្នាំ២០១៤កន្លងទៅថ្មីៗនេះទៀត ព័ត៌មានចចាមអារាមក្នុង Facebook លេចចេញព្រោងព្រាតថា បុរសខ្លាំងជាអនុប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃព្រះរាជាណាចក្រកម្ពុជាមានជំងឺជាទម្ងន់ រហូតដល់ដាច់សរសៃឈាមខួរក្បាល ទទួលមរណភាពនៅមន្ទីរពេទ្យប្រទេសសិង្ហបុរី ខណៈពេលព័ត៌មានចរចាមអារាមនោះលេចចេញ គ្មានការបំភ្លឺតបឲ្យច្បាស់លាស់ភ្លាមៗទេ ធ្វើឲ្យមានការភ័ន្តច្រឡំអស់រយៈពេលពី២ទៅ៣ថ្ងៃ រហូតដល់ថ្ងៃបុរសខ្លាំងចេញមុខប្រកាសដោយផ្ទាល់នៅស្រុកឈូក ខេត្តកំពត តែម្តងទើបស្ងប់ស្ងាត់ ។
ដូច្នេះ បើធ្វើការប្រៀងធៀបគ្នាទៅ គឺប្រតិកម្មរបស់ប្រិយមិត្តអ្នកលេង Facebook មានល្បឿនលឿនទាន់ហេតុការណ៍ និងមានប្រសិទ្ធភាពជាងអង្គភាពព័ត៌មាននិងប្រតិកម្មរហ័សរបស់បុរសខ្លាំងទៅទៀត ក្នុងការតបតបញ្ជាក់ទៅនឹងព័ត៌មានរបស់ទូរទស្សន៍ CNN ដ៏ល្បីរបស់អាមេរិកសរសេរខុសឆ្គងថា ប្រាសាទអង្គរវត្តជារបស់ថៃនោះ ខណៈមន្ត្រីរបស់រាជរដ្ឋាភិបាលបុរសខ្លាំងកំពុងសម្រាន្តលក់យ៉ាងស្កប់ស្កល់ មិនខ្ចីខ្វល់នឹងកិត្យានុភាពរបស់ជាតិឡើយ ៕
Source from: www.dtn7.com
Loading...
Post a Comment