[ News ] កម្ពុជាអាចប្រឈមនឹងវិបត្តិការងារកាន់តែធ្ងន់ពេលពលកររាប់ម៉ឺននាក់ត្រឡប់ពីថៃ - Daily News, business | www.sronuk.com - Be Khmer, Khmer News, Daily update news, Hot new in cambodia

6/19/2014 06:56:00 PM

ការផ្គត់ផ្គង់កម្លាំងពលកម្មជំនាញនៅប្រទេសកម្ពុជា មិនអាចឆ្លើយតបនឹងទីផ្សារចង់បាន ដោយសារតែការតម្រង់ទិសរបស់គ្រឹះស្ថានឧត្ដមសិក្សា និងក្រសួងអប់រំ មានកម្រិតតិចតួច។ បន្ថែមលើនេះ ប្រទេសកម្ពុជា អាចប្រឈមនឹងវិបត្តិការងារកាន់តែធ្ងន់បន្ថែមទៀត ស្របពេលដែលកម្លាំងពលកម្មយ៉ាងច្រើនសន្ធឹកសន្ធាប់ ត្រឡប់ពីប្រទេសថៃ មកប្រទេសកម្ពុជា វិញ។

សហគ្រាសផលិតកម្ម ឬក្រុមហ៊ុននានា ធ្លាប់បានអះអាងថា ប្រទេសកម្ពុជា នៅខ្វះធនធានមនុស្ស ដើម្បីឆ្លើយតបទៅកំណើននៃអាជីវកម្មដែលបានវិនិយោគទឹកប្រាក់រាប់លានដុល្លារអាមេរិក រៀងរាល់ឆ្នាំ។ ប៉ុន្តែ យុវជនដែលទើបចេញពីការសិក្សា បានអះអាងផ្ទុយពីនេះ ដោយពួកគេព្រួយបារម្ភអំពីទីផ្សារការងារចង្អៀត ដែលកំពុងកើតឡើងនៅប្រទេសកម្ពុជា។

បច្ចុប្បន្ន ភាពគ្មានការងារធ្វើជាបញ្ហាក្ដៅគគុក ដែលប្រជាពលរដ្ឋ និងរដ្ឋាភិបាល ត្រូវដោះស្រាយឲ្យបាននៅរយៈពេលចំពោះមុខ។ បញ្ហាសំខាន់នោះ គឺត្រូវផ្ដល់ការងារសម្រាប់យុវជនដែលចេញពីសាលា និងកម្លាំងពលកម្មដែលប្រទេសថៃ បានបញ្ជូនមកកម្ពុជា វិញរាប់សែននាក់។

តាមការប៉ាន់ស្មាន យុវជនកម្ពុជា ប្រមាណ ៣០ម៉ឺននាក់រៀងរាល់ឆ្នាំ និងប្រជាពលករកម្ពុជា ជាង ២០ម៉ឺននាក់ បានចូលទៅក្នុងទីផ្សារពលកម្ម ប៉ុន្តែផលពីកំណើនសេដ្ឋកិច្ចកម្ពុជា បច្ចុប្បន្ន បានបង្កើតការងារថ្មីប្រមាណ ៦ម៉ឺននាក់ប៉ុណ្ណោះក្នុងមួយឆ្នាំ។ បញ្ហាទាំងអស់នេះ បានក្លាយជាក្ដីបារម្ភរបស់យុវជន រាជរដ្ឋាភិបាល សង្គមស៊ីវិល អំពីភាពគ្មានការងារធ្វើដែលកំពុងកើតឡើងនៅប្រទេសកម្ពុជា។

បន្ថែមលើនេះ របាយការណ៍របស់ក្រសួងអប់រំ យុវជន និងកីឡា បានបង្ហាញថា បច្ចុប្បន្នក្នុងចំណោមយុវជនដែលបញ្ចប់ថ្នាក់បរិញ្ញាបត្រ ហើយកំពុងស្វែងរកការងារធ្វើមានប្រមាណ ៣០% ប៉ុណ្ណោះ ដែលទទួលបានការងារធ្វើ។ និស្សិត ៧០% ផ្សេងទៀត អាចជាអ្នកមានការងារធ្វើមិនពេញលេញ ឬគ្មានការងារធ្វើ។

ក្រៅពីនេះ ប្រទេសកម្ពុជា ទទួលស្គាល់ថា យុវជនដែលចូលនៅក្នុងកម្លាំងពលកម្មថ្មីប្រមាណជាង ២សែននាក់រៀងរាល់ឆ្នាំ បានក្លាយជាបន្ទុករបស់រដ្ឋាភិបាល ដើម្បីផ្ដល់ការងារសម្រាប់ពួកគេ។ ស្របពេលដែលកម្ពុជា កំពុងដោះស្រាយបញ្ហាការងារសម្រាប់យុវជន បញ្ហាផ្សេងទៀតក៏បានលេចឡើងដែរ គឺពលកម្មរាប់សែននាក់ដែលកំពុងវិលត្រឡប់មកពីប្រទេសថៃ។

ប្រធានអង្គការខារ៉ាមកម្ពុជា លោក យ៉ា ណាវុធ មានប្រសាសន៍ថា ពលករចំណាកស្រុកដែលត្រឡប់មកកម្ពុជា វិញ នឹងក្លាយជាបន្ទុករបស់រដ្ឋាភិបាលកម្ពុជា ដើម្បីជួយសង្គ្រោះជាបន្ទាន់ ក្នុងនោះរួមមាន ការផ្ដល់ការងារ និងការដោះស្រាយបញ្ហាផ្លូវចិត្តរបស់ពលករចំណាកស្រុកទាំងនោះ។

«សំឡេង»

លោក យ៉ា ណាវុធ មានប្រសាសន៍បន្ថែមទៀតថា ប្រសិនបើរដ្ឋាភិបាលដោះស្រាយមិនបានសមរម្យនោះទេ អាចនាំឲ្យមានតវ៉ាប្រឆាំងនានាកើតឡើងនៅពេលដ៏ខ្លីខាងមុខនេះ។

ឆ្លើយតបទៅនឹងបញ្ហានេះ រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ លោក អុំ មាន មានប្រសាសន៍យ៉ាងខ្លីថា ក្រសួង និងថ្នាក់ដឹកនាំទាំងអស់ កំពុងចាត់វិធានការជួយពលករចំណាកស្រុកកម្ពុជា ដែលទើបត្រឡប់ពីប្រទេសថៃ មកវិញ ដូចជា ការផ្ដល់វគ្គបណ្ដុះបណ្ដាល ជាដើម។

ទោះជាយ៉ាងណាក៏ដោយ ប្រសិនបើកម្ពុជា មានពលកម្មច្រើនជាឱកាសសម្រាប់អភិវឌ្ឍ ប៉ុន្តែបើពលកម្មនោះនៅទំនេរ អាចប៉ះពាល់ដល់សេដ្ឋកិច្ច និងបង្កភាពចលាចលនៅក្នុងសង្គមទៅវិញ។

រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារុន មានប្រសាសន៍ថា ដើម្បីកាត់បន្ថយគម្លាតរវាងការផ្គត់ផ្គង់ពលកម្ម និងតម្រូវការការងារ គឺត្រូវបង្វែរមូលដ្ឋានអភិវឌ្ឍន៍សេដ្ឋកិច្ច ទៅចាប់យកសេដ្ឋកិច្ចបែបឧស្សាហកម្មវិញ ដែលជាឧស្សាហកម្មគាំទ្រដល់ការបង្កើតការងារសម្រាប់ប្រជាពលរដ្ឋកម្ពុជា។

ប៉ុន្តែ ធនាគារពិភពលោក បានអះអាងផ្ទុយពីនេះដោយគេបានក្រើនរំឭកដល់ប្រទេសកម្ពុជា ឲ្យកែប្រែគោលនយោបាយ ដើម្បីផ្ដល់ការងារសម្រាប់យុវជន ព្រោះថា ការអនុវត្តគោលនយោបាយមិនបានល្អ នឹងជំរុញឲ្យយុវជនជាច្រើននាក់ទទួលបានការងារដោយគ្មានការគាំពារ ការងារមិនផ្លូវការ ឬគ្មានការងារធ្វើ។ ជាក់ស្ដែង បើផ្ដោតលើមូលដ្ឋានយុវជនដែលចូលក្នុងទីផ្សារ និងការបង្កើតការងារវិញ កម្ពុជា មានអត្រាយុវជន ៨០% ស្ថិតនៅក្នុងចំណោមអ្នកដែលគ្មានការងារធ្វើរៀងរាល់ឆ្នាំ។

របាយការណ៍របស់ធនាគារពិភពលោក ប្រចាំឆ្នាំ២០១៤ បានបញ្ជាក់ថា ប្រទេសជាច្រើននៅលើពិភពលោក រួមទាំងកម្ពុជា ផង កំពុងអនុវត្តគោលនយោបាយបង្កើតការងារសម្រាប់ប្រជាពលរដ្ឋមានប្រសិទ្ធភាពតិចតួច ដោយសារការអនុវត្តគោលនយោបាយលម្អៀងទៅក្រុមឈ្មួញ និងបំភ្លេចចោលក្រុមអ្នកងាយរងគ្រោះ ដែលបានប៉ះពាល់ដល់ទីផ្សារការងារ មិនស៊ីចង្វាក់នឹងការផ្គត់ផ្គង់កម្លាំងពលកម្ម។

ជាក់ស្ដែង ប្រទេសកម្ពុជា បានប្រើប្រាស់គោលនយោបាយស្ទើរតែទាំងស្រុង ទាក់ទាញអ្នកវិនិយោគធំដើម្បីបង្កើតការងារជូនប្រជាពលរដ្ឋ ប៉ុន្តែគោលនយោបាយនេះ មិនអាចបង្កើតការងារឲ្យបានពេញលេញឡើយសម្រាប់យុវជនកម្ពុជា ដែលកំពុងហូរចូលទីផ្សារយ៉ាងច្រើនសន្ធឹកសន្ធាប់។

ទោះបីជាមានការរកឃើញបែបនេះក៏ដោយ ប៉ុន្តែប្រទេសមួយចំនួនមិនយកចិត្តទុកដាក់ឡើយ។ ជាងនេះទៅទៀត អត្រាភាពគ្មានការងារធ្វើជាក់លាក់ ត្រូវបានគេលាក់បាំង ព្រោះវាជាបញ្ហារសើបខ្លាំងក្នុងការបង្ហាញទៅសាធារណៈ។ ប៉ុន្តែការលាក់បាំងនេះ អាចបង្កជាអសន្តិសុខនានា ប៉ះពាល់ដល់ស្ថិរភាពសង្គម និងកំណើនសេដ្ឋកិច្ចនាពេលអនាគត។

តាមការស្រាវជ្រាវមួយចំនួនបានបង្ហាញថា ប្រជាពលរដ្ឋនៅកម្ពុជា មានយុវជនប្រមាណ ២០% ប៉ុណ្ណោះ បានទទួលការងារធ្វើនៅពេលបញ្ចប់ការសិក្សានៅសាកលវិទ្យាល័យ។ ក្រៅពីនេះ ប្រជាពលរដ្ឋប្រមាណជាង ៧០% ផ្សេងទៀតនៃប្រជាពលរដ្ឋកម្ពុជា សរុប ស្ថិតនៅក្នុងក្រុមអ្នកងាយរងគ្រោះពីភាពក្រីក្រ និងភាពគ្មានការងារធ្វើ៕

------------

Source from: rfa.org/khmer