ផ្លូវ​សំខាន់​មួយ​ចំនួន​ត្រូវ​បាន​បិទ​ ខណៈ​មេ​ដឹក​នាំ​ដង្ហែ​ក្បួន​ មក​ទីលាន​ប្រជា​ធិប​តេយ្យ​

9/14/2013 10:55:00 PM

មេដឹកនាំគណបក្សសង្គ្រោះជាតិទាំងពីរ គឺលោកសម រង្ស៊ី និងលោកកឹម សុខាបានដង្ហែក្បួនបាតុកររបស់ខ្លួនពីទីស្នាក់ការកណ្តាលទាំងពីរផ្សេងគ្នាឆ្ពោះមកទីលានប្រជាធិបតេយ្យ នៅព្រឹកថ្ងៃអាទិត្យនេះ។ ដូច្នេះផ្លូវសំខាន់មួយចំនួនត្រូវបានបិទដោយបារាសបន្លាលួសជាច្រើន។ ទោះយ៉ាងណាក៏ដោយ មេដឹកនាំទាំងនៅតែអាចដឹកនាំក្បួនបាតុករ។

លោកសម រង្ស៊ីបានដឹកនាំក្បួនចេញ ពីទីស្នាក់ការនៅចាក់អង្រែលើតាមផ្លូវមុនីវង្ស ជំនួសអោយផ្លូវនរោត្តម ដែលត្រូវបានបិទតាំងពីស្ពានអាកាសក្បាលថ្នល់។ ចំណែកឯលោកកឹម សុខាវិញ លោកក៏បានដឹកនាំក្បួនចេញពីទីស្នាក់ការនៅត្រឡោកបែកផងដែរ។ ក្បួនទាំងពីរបានមកដល់ទីលានប្រជាធិបតេយ្យនៅម៉ោងជាង៩ព្រឹកនេះ។

នៅលើទីលានប្រជាធិបតេយ្យដែលមន្ត្រីគណបក្សសង្គ្រោះជាតិបានសូត្ររម្លឹកឡើងវិញ ក្រមសីលធម៌ធ្វើមហាបាតុកម្មអហិង្សាប្រាប់អ្នកចូលរួមធ្វើបាតុកម្ម។