ប្រិយមិត្តអ្នកអានទាំងឡាយទំនងជាអាចចងចាំបាននៅឡើយនូវព្រឹត្តិការណ៍គ្រោះថ្នាក់ចរាចរណ៍មួយដ៏សែនរន្ធត់កើតឡើងកាលពីថ្ងៃទី២០ខែកក្កដា ឆ្នាំ២០១៣វេលាម៉ោង១៧និង៣៤នាទីល្ងាចបង្កដោយបុរសវ័យក្មេងម្នាក់ឈ្មោះប៊ុនប្រិយមិត្តអ្នកអានទាំងឡាយ ទំនងជាអាចចងចាំបាននៅឡើយនូវព្រឹត្តិការណ៍គ្រោះថ្នាក់ចរាចរណ៍មួយដ៏សែនរន្ធត់កើតឡើងកាលពីថ្ងៃទី២០ខែកក្កដា ឆ្នាំ២០១៣ វេលាម៉ោង ១៧និង៣៤នាទីល្ងាច បង្កដោយបុរសវ័យក្មេងម្នាក់ឈ្មោះ ប៊ុន រតនៈ ត្រូវជាកូនប្រុសរបស់លោក ប៊ុន សេរី មន្ត្រីកាន់លុយនៅសាលារាជធានីភ្នំពេញ បើករថយន្តទំនើបម៉ាក Range Rover បុករះបណ្តាលឲ្យស្ត្រីចំនួន៣នាក់កំពុងជិះម៉ូតូធ្វើដំណើរតាមផ្លូវស្លាប់ភ្លាមៗនៅកន្លែងកើតហេតុនិងមនុស្សប្រមាណ១០នាក់ផ្សេងទៀតរងរបួសធ្ងន់-ស្រាល នៅចំណុចមុខវត្តចម្ប៉ា បណ្តោយផ្លូវជាតិលេខ១ ភូមិជ្រោយអម្ពិល សង្កាត់ក្បាលកោះ ខណ្ឌមានជ័យ រាជធានីភ្នំពេញ។
ក្រោយហេតុការណ៍គ្រោះថ្នាក់ចរាចរណ៍ដ៏សែនរន្ធត់នេះភ្លាមៗមានលេចចេញដំណឹងថា ក្រុមគ្រួសារជនបង្កបានជះទឹកលុយទៅលើក្រុមគ្រួសារជនរងគ្រោះដែលស្លាប់បាត់បង់ជីវិតក្រោមរូបមន្តសម្រុះសម្រួល ដើម្បីបានរួចខ្លួនពីសំណាញ់ច្បាប់ ហើយដំណឹងនេះត្រូវបានសារព័ត៌មានជាច្រើន ចុះផ្សាយយ៉ាងព្រោងព្រាត។
បន្ទាប់មក នៅថ្ងៃទី២២ខែកក្កដា ឆ្នាំ២០១៣ លោកឧត្តមសេនីយ៍ឯកជួន សុវណ្ណ អគ្គស្នងការរងនគរបាលជាតិនិងជាស្នងការនគរបាលរាជធានីភ្នំពេញ បានចេញមុខអះអាងថានឹងមិនឲ្យជនបង្កក្នុងករណីនេះបានរួចខ្លួនឡើយ ហើយការអះអាងរបស់លោកមេប៉ូលិសជួន សុវណ្ណ នេះបានធ្វើឲ្យមជ្ឈដ្ឋាននានាសម្តែងនូវការគាំទ្រមួយរយភាគរយ។
ប៉ុន្តែ អ្វីៗវាមិនដូចទៅនឹងការអះអាងរបស់លោកឧត្តមសេនីយ៍ប៉ូលិស ជួន សុវណ្ណ ដែលធ្វើឲ្យមនុស្សម្នារំភើបចិត្តមួយភែ្លតនោះទេ គឺជនបង្កឈ្មោះ ប៊ុន រតនៈ ដែលជាកូនសេដ្ឋីកាន់លុយនៅសាលារាជធានីភ្នំពេញឈ្មោះ ប៊ុន សេរី នោះត្រូវបានតុលាការសម្រេចដោះលែងឲ្យមានសេរីភាពវិញហើយតាមនីតិវិធីរបស់ពួកគេកាលពីថ្ងៃទី២០ខែកញ្ញា ឆ្នាំ២០១៣ កន្លងមកថ្មីៗនេះ ខណៈដែលក្រុមគ្រួសារជនរងគ្រោះទទួលបានប្រាក់សំណងពីជនបង្កសម្រាប់យកទៅចាត់ចែងធ្វើបុណ្យទានឲ្យអ្នកស្លាប់បាត់បង់ជីវិត។
ប្រភពព័ត៌មានមួយចំនួនបានបង្ហើបប្រាប់ឲ្យដឹងថា ចន្លោះពេលពីថ្ងៃទី២០ ខែកក្កដា ដែលជាថ្ងៃកើតហេតុគ្រោះថ្នាក់ចរាចរណ៍ដ៏សែនរន្ធត់ មកដល់ថ្ងៃទី២០ ខែកញ្ញា ឆ្នាំ២០១៣ ជនបង្កឈ្មោះ ប៊ុន រតនៈនោះទំនងជាមិនត្រូវបានឃុំខ្លួនពិតប្រាកដនោះទេ គឺគ្រាន់តែសម្តែងឲ្យឃើញពីខាងក្រៅប៉ុណ្ណោះ ពីព្រោះឪពុករបស់ជនបង្កដែលជាអ្នកមានទ្រព្យសម្បត្តិមហាសាលដោយសារកាន់លុយដុះស្លែនៅសាលារាជធានីភ្នំពេញបានប្រឹងប្រែងចំណាយទឹកប្រាក់ច្រើនសម្បើមណាស់ ដើម្បីជួយកូនប្រុសជាទីស្រឡាញ់របស់ខ្លួនឲ្យរួចផុតពីការជាប់គុកច្រវាក់។
អនុលោមតាមមាត្រា៨២នៃច្បាប់ស្តីពីចរាចរណ៍ផ្លូវគោក គឺបានចែងថា ជនណាបើកបរដោយបង្កឲ្យស្លាប់ដល់អ្នកដទៃដោយអចេតនា ត្រូវផ្តន្ទាទោសដាក់ពន្ធនាគារពី១ឆ្នាំទៅ៣ឆ្នាំឬ/និងផ្តន្ទាទោសពិន័យជាប្រាក់ពី២លានរៀលទៅ៦លានរៀល។ត្រូវផ្តន្ទាទោសដល់កម្រិតអតិបរមាក្នុងករណីបណ្តាលឲ្យមានរបួសមនុស្សច្រើននាក់និងរត់គេចខ្លួនពីកន្លែងកើតហេតុក្នុងគោលបំណងគេចវេះពីការទទួលខុសត្រូវ។
គួររម្លឹកជូនថា បុរសឈ្មោះ ប៊ុន រតនៈអាយុ៣០ឆ្នាំ បានបើករថយន្តទំនើបម៉ាក Range Rover បុករះបណ្តាលឲ្យមនុស្សស្លាប់ចំនួន៣នាក់និងរងរបួសធ្ងន់-ស្រាលប្រមាណចំនួន១០នាក់និងព្យាយាមបើករថយន្តរត់គេចខ្លួន ប៉ន្តែដោយសារថយន្តបែកកង់ទៅមុខលែងរួច បន្ទាប់ពីបើករត់បានចម្ងាយប្រមាណជិត១គីឡូម៉ែត្រ ទើបសមត្ថកិច្ចឃាត់ខ្លួនបាន «សូមចូលអានគេហទំព័រសារព័ត៌មានដើមត្នោតចុះផ្សាយថ្ងៃទី២៣ខែកក្កដា ឆ្នាំ២០១៣បន្ថែម»។
នេះ គឺជាព័ស្តុតាងមួយបង្ហាញអំពីវប្បធម៌នៃការមិនអនុវត្តន៍ច្បាប់និងវប្បធម៌និរទណ្ឌភាពនៅព្រះរាជាណាចក្រកម្ពុជាទី២នៃយើង៕
Source from: www.dtn7.com
Loading...
Post a Comment