លោក សម រង្ស៊ី​៖​គណបក្ស​សង្គ្រោះ​ជាតិ មិន​ចូលរួម​ប្រជុំ​សភា​ទេ​

9/18/2013 11:55:00 PM

ប្រធានគណបក្សសង្គ្រោះជាតិលោក សម រង្ស៊ី បានប្រកាសនៅថ្ងៃទី១៩ ខែកញ្ញានេះ ថា តំណាងរាស្ដ្រជាប់ ឆ្នោតទាំង៥៥រូប របស់គណបក្សសង្គ្រោះជាតិ នឹងមិនចូលរួមប្រជុំសភាលើកដំបូងឡើយ និងមិនចូលរួមបង្កើត រដ្ឋាភិបាលអណ្ណត្ដិទីជាមួយគណបក្សប្រជាជនកម្ពុជានោះដែរ ប្រសិនបើមិន ទាន់មានដំណោះស្រាយ ប្រកបដោយ យុត្តិធម៌ជូនម្ចាស់ឆ្នោត អំពីភាពមិនប្រក្រតី នៃការបោះឆ្នោតនោះ។

លោក សម រង្ស៊ី បានសរសេរនៅលើទំព័រហ្វេសប៊ុកផ្ទាល់ខ្លួន របស់លោក ថា សូមបងប្អូនជនរួមជាតិកុំព្រួយបារម្ភ ពីគោលជំហររបស់គណបក្សសង្គ្រោះជាតិ គណបក្សសង្គ្រោះជាតិ ប្រកាន់គោលជំហរដ៏រឹងមាំដដែល។

មេបក្សប្រឆាំងរូបនេះ បានបន្ដ ថា ការជួបពិភាក្សាជាមួយគណបក្សប្រជាជនកម្ពុជា មិនមែនមានន័យ ថា ចូលរួមប្រជុំសភា ឬចូលរួមបង្កើតរដ្ឋាភិបាលថ្មីជាមួយគណបក្សប្រជាជនកម្ពុជានោះទេ។

លោកសម រង្ស៊ី បញ្ជាក់ ថា ជួបគ្រាន់តែជាការបង្ហាញពីសុជីវធម៌ និងពីជំហរអហិង្សារបស់យើង ដែលតម្រូវឲ្យរកដំណោះស្រាយចំពោះរាល់បញ្ហា ដោយសន្តិវិធី។

នៅថ្ងៃនេះដែរ គណបក្សប្រជាជនកម្ពុជា បានចេញសេចក្តីថ្លែងការណ៍មួយ ដោយប្រកាសដង្ហែតាមព្រះរាជ តម្រិះរបស់ព្រះមហាក្សត្រ ហើយបេក្ខជនជាប់ឆ្នោតតំណាងរាស្ត្រទាំង៦៨រូបរបស់ខ្លួន បានត្រៀមខ្លួនរួចរាល់ ដើម្បីចូលរួមប្រជុំរដ្ឋសភា នាថ្ងៃទី២៣ ខែកញ្ញា ឆ្នាំ២០១៣ តាមការកោះអញ្ជើញរបស់ព្រះមហាក្សត្រ។

គួរបញ្ជាក់ ថា ព្រះមហាក្សត្រ នៃព្រះរាជាណាចក្រកម្ពុជាព្រះករុណាព្រះបាទសម្ដេចព្រះបរមនាថ នរោត្ដម សីហមុនី បានបដិសេធលិខិតស្នើសុំរបស់គណបក្សសង្គ្រោះជាតិ ដែលសុំពន្យារពេលប្រជុំសភាលើកដំបូង ដែលគ្រោងបើកនៅថ្ងៃទី២៣ ខែកញ្ញាខាងមុខ និងបានស្នើសុំក្រុមតំណាងរាស្ត្រជាប់ឆ្នោត របស់គណបក្សសង្គ្រោះជាតិទាំងអស់ចូលរួមក្នុងសម័យប្រជុំដំបូងនៃរដ្ឋសភាដើម្បីបង្ហាញនូវការរួបរួមនិងឯកភាពជាតិ៕(ដោយៈឃួន សុភ័ក្រ)

Source from: Vayofm