មួយថ្ងៃក្រោយពីការស្លាប់បាត់បង់ជីវិតយុវជនម្នាក់ ដោយការបាញ់ប្រហារនឹងគ្រាប់កាំភ្លើង គណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោតបានហៅឧប្បទ្ទវហេតុប៉ះទង្គិចគ្នា កាលពីល្ងាចថ្ងៃទី១៥ ខែកញ្ញាថា ជាបង្កឡើងដោយក្រុមជនឱកាសនិយមមួយក្រុមធំ ដែលបានធ្វើសកម្មភាពបំផ្លិចបំផ្លាញរបាំងរាំងផ្លូវរបស់សមត្ថកិច្ច។
នេះបើយោងតាមសេចក្តីប្រកាសព័ត៌មាន របស់គណៈបញ្ជាការសន្តិសុខអចិន្ត្រៃយ៍ សម្រាប់ ការបោះឆ្នោត ចុះថ្ងៃទី១៦ កញ្ញានេះ។
ចំនែកគណបក្សសង្គ្រោះជាតិវិញ ក៏បានហៅហេតុការណ៏នោះ ស្រដៀងគ្នាដែរថា បង្កឡើងដោយក្រុមបង្កចលាចលមួយក្រុមដែលមិនមែនជាក្រុមបាតុកររបស់ខ្លួន។គណបក្សសង្គ្រោះជាតិបានចេញសេចក្តីថ្លែងការណ៏ ២ដងហើយ.
លើកទី១គឹ នៅពេលមានហេតុការណ៍ហិង្សាផ្ទុះឡើងភ្លាមៗ និង ជាថ្មីម្តងទៀតនៅថ្ងៃទី១៦នេះគណសង្គ្រោះជាតិបានថ្កោលទោសយ៉ាងដាច់អហង្ការ ចំពោះការប្រើអំពើហិង្សាបាញ់ប្រហារ លើប្រជាពលរដ្ឋរហូតដល់បាត់បង់ជីវិត និងរងរបួសនេះ។
ដោយឡែកក្រុមអង្គការសង្គមស៊ីវិលមួយចំនួន ដូចជាប្រធានមជ្ឈមណ្ឌលសិទ្ធិមនុស្សកម្ពុជាបានចាត់ទុកថា អំពើនេះ គឺជាការរំលោភសិទ្ធិសេរីភាពរបស់ប្រជាពលរដ្ឋ។
លោកអ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាបានបញ្ជាក់ថា ហេតុការណ៏នៅយប់នោះ គឺមិនជាប់ពាក់ព័ន្ធ នឹងការធ្វើបាតុកម្ម របស់គណបក្សប្រឆាំងនោះទេ។ លោកក៏បានអំពាវនាវ ឲ្យមានការស៊ើបអង្កេត ឲ្យបានច្បាស់លាស់ ដើម្បីស្វែងរក ជនដៃដល់មកផ្តន្ទាទោសតាមច្បាប់។
សំលេងៈ
លោកអំ សំអាត មន្ត្រីរបស់អង្គការលីកាដូ ក៏បានថ្កោលទោសយ៉ាងខ្លាំងៗចំពោះហេតុការណ៏នេះផងដែរ។ ថ្កោលទោសត្រង់ថា សមត្ថកិច្ចបានប្រើប្រាស់អាវុធ និងកម្លាំងហួសប្រមាណ ដោយមិនមានការអាធ្យាស្រ័យគ្នា រហូតធ្វើឲ្យប្រជាពលរដ្ឋស្លូតត្រង់ស្លាប់ និង រងរបួសជាច្រើននាក់។
លោកអំ សំអាត បានបន្តទៀតថា សុខសន្តិភាពអាចកើតឡើងបាន បើយើងបញ្ចៀសរាល់ការប្រើអាវុធជាតិផ្ទុះ និងប្រើកម្លាំងទល់នឹងកំហឹង។
សំលេងៈ
ការចេញសេចក្តីប្រកាសព័ត៌មានរបស់គណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោត និងសេចក្តីថ្លែងការណ៏ថ្កោលទោសជាបន្តបន្ទាប់ពីគណបក្សសង្គ្រោះជាតិ និងអង្គការសង្គមស៊ីវិលនានាបានកើតឡើង បន្ទាប់ពីហេតុការណ៏ផ្ទុះអាវុធរវាងសមត្ថកិច្ច និងក្រុមបាតុករ កាលពីថ្ងៃទី១៥កញ្ញា បានបណ្តាលឲ្យប្រជាពលរដ្ឋម្នាក់ស្លាប់បាត់បង់ជីវិតនិងជាច្រើននាក់ផ្សេងទៀតរងរបួស។ ហេតុការណ៏ប៉ះទង្គិចហិង្សានេះបានកើតឡើងនៅថ្ងៃទីមួយនៃការធ្វើមហាបាតុកម្មលើកទី២ របស់គណបក្សសង្គ្រោះជាតិ៕(ដោយៈឆេង សូរិយា)
Source from: Vayofm
Loading...
Post a Comment