សាយ រតនៈ បកស្រាយ​រឿង​ធ្វើ​ឱ្យ​និស្សិត​ស្រី​ម្នាក់​នៅសាលាNUMនោះ មានផ្ទៃពោះ

9/19/2013 12:55:00 AM

លោក សាយ រតនៈ ពិធីករនៅCTN បានចេញមុខបកស្រាយនៅ nob70 ព្រឹកនេះក្រោយពីមានការចុះផ្សាយព្រោងព្រាតនៅលើបណ្ដាញសារព័ត៌មានអនឡាញនៅកម្ពុជា ដោយយោងប្រភពតាមAccount facebookក្លែងក្លាយមួយ (Say Rathanak ) ក្រោមប្រធានបទតែមួយថាពិធីកររូបនេះបានធ្វើឱ្យនិស្សិតនៅសាកលវិទ្យាល័យ NUM ម្នាក់មានផ្ទៃពោះ ហើយបោះបង់នាងចោល។
ខ្ញុំពិតជាសោកស្ដាយខ្លាំងណាស់ពេលបានឃើញព័ត៌មាននេះ វាពិតជាប៉ះពាល់ដល់កេរ្តិ៍ឈ្មោះខ្ញុំ និងគ្រួសារ ខ្ញុំដឹងថាខ្ញុំជាបុគ្គលសាធារណៈជៀសមិនផុតពីមានអ្នកស្រលាញ់ និងអ្នកមិនចូលចិត្តខ្លះនោះទេ“។ រតនៈ ប្រាប់ពីអារម្មណ៍ចំពោះព័ត៌មានទាំងនេះ។

ពិធីករក្នុងកម្មវិធីរាត្រីកម្សាន្តរូបនេះបានបញ្ជាក់យ៉ាងច្បាស់ថា លោកនឹងមិនចាត់វិធានការអ្វីចំពោះអ្នកដែលបានបង្កើតគណនីហ្វេសបុកក្លែងក្លាយ ហើយកាត់តរូបភាពរបស់លោក និងសរសេរបង្ខូចកេរ្តិ៍ឈ្មោះលោកនោះទេ។ “ខ្ញុំយកធម៌ព្រះមកដាក់ខ្លួនចុះបងគឺ ពៀររម្ងាប់ដោយការមិនចងពៀរ“។

ជុំវិញបញ្ហាដែលអ្នកបង្កើតគណនីក្លែងក្លាយបានសរសេរថា លោកមានទំនាក់ទំនងស្នេហា និងបានធ្វើឱ្យនិស្សិតស្រីម្នាក់នៅសាកលវិទ្យាល័យNUM មានផ្ទៃពោះនោះ តារារូបនេះថា គឺមិនពិតសូម្បីកន្លះភាគរយ។ លោកបន្តឱ្យដឹងថា ប្រសិនបើនេះជារឿងពិតមែននោះ នារីដែលបានសរសេរនៅលើហ្វេសបុកនោះនឹងចេញមុខមកដោះស្រាយជាមួយលោកផ្ទាល់មិនខាន មិនមានហេតុផលអ្វីដែលចាំបាច់ត្រូវធ្វើយ៉ាងនេះទេ ព្រោះនាងនឹងមិនបានផលអ្វី។

ក្នុងន័យនេះពិធីកររូបនេះបានលើកឡើងថា “នេះមិនមែនជារឿងពិតទេ គឺបុគ្គលណាម្នាក់ធ្វើឡើងដើម្បីបង្ខូចកេរ្តិ៍ឈ្មោះខ្ញុំតែប៉ុណ្ណោះ បងគិតមើលបើខ្ញុំខុសឆ្គងចំពោះនារីណាម្នាក់មែន នារីនោះត្រូវមករកខ្ញុំផ្ទាល់ដោះស្រាយគ្នាតាមច្បាប់ មានរឿងអីទៅធ្វើរឿងដែលគ្មានលទ្ធផលបែបនេះ?” ឫសគល់ដែលនាំឱ្យមានព័ត៌មាននេះលេចឡើងលោក រតនៈ បានបន្តឱ្យដឹងថា អាចបណ្ដាលមកពីបញ្ហាផ្នត់គំនិតនយោបាយរបស់លោកមិនត្រូវជាមួយនឹងបុគ្គលមួយចំនួន ដូច្នេះហើយគេធ្វើបែបនេះដើម្បីសម្លាប់ប្រជាប្រិយភាពរបស់លោក។ “មនុស្សមានគំនិតខុសគ្នា តែប្រហែលគេមិនពេញចិត្តគំនិតរបស់ខ្ញុំក៏មិនដឹង តែទោះជាយ៉ាងណា ខ្ញុំមិនប្រទូសរ៉ាយតបនឹងទង្វើគ្មានសីលធម៌បែបនេះទេ ខ្ញុំជឿថាគេធ្វើអស់ចិត្តគេនឹងឈប់“។

បើលើកពីអាជីពនៅក្នុងសិល្បៈវិញតារារូបនេះបានបញ្ជាក់ឱ្យដឹងថា លោកមានទំនាក់ទំនងល្អជាមួយមិត្តរួមអាជីព មិនធ្លាប់មានទំនាស់អ្វីនៅក្នុងចំណោមអ្នកសិល្បៈរហូតត្រូវគេធ្វើទង្វើបែបនេះដើម្បីបង្ខូចកេរ្តិ៍ឈ្មោះលោកនោះទេ។

ទាក់ទិនទៅនឹងរូបថត រតនៈ ថា លោកបានបើកទូលាយនៅលើបណ្ដាញទំនាក់ទំនងសង្គមរបស់លោក ដូច្នេះហើយបានជាមានការគូពីរូបរបស់លោកទៅប្រើបានដោយសេរី។ “ដល់ពេលមានបញ្ហាអីចឹង ខ្ញុំយល់ថាមិនមែនតែតារាទេ ដែលត្រូវប្រយ័ត្ន យុវវ័យក៏គួរតែគិតពីបញ្ហាដែលអាចកើតមានឡើងដែរ ដូចឃើញបញ្ហារបស់ខ្ញុំជាគំរូស្រាប់“។

ជាចុងក្រោយពិធីកររូបនេះបានផ្ដាំផ្ញើតាមរយៈ nob70 ថា លោកជាមនុស្សសាមញ្ញ និងប្រកាន់កណ្ដាលម្នាក់ តាមរយៈការមិនប្រទូសតបនេះលោកសង្ឃឹមថា អ្នកដែលកាត់តរូបថតរបស់លោកនិងប្រឌិតរឿងនេះឡើងនឹងបញ្ចប់ ហើយក៏សង្ឃឹមថា ប្រិយមិត្តនៅតែបន្តគាំទ្រលោក និងជឿជាក់ថា រឿងទាំងនោះគឺគេប្រឌិតឡើងទេ៕