យុវវ័យមួយចំនួនមានការផ្អើលតាម Facebook អំពីសារធាតុគីមី ដែលមាននៅក្នុងតែគុជ ថាអាចប៉ះពាល់ដល់សុខភាពបណ្ដាលឲ្យមានជំងឺស្អិតពោះវៀន ខូចក្រពេះ និងជំងឺមហារីកជាដើម។
បញ្ហានេះត្រូវបានអ្នកប្រើប្រាស់បណ្តាញសង្គម Facebook ចែករំលែកតៗគ្នារាប់ពាន់នាក់ ព្រមទាំងបានសម្តែងក្តីព្រួយបារម្ភ ពីផលប៉ះពាល់ដល់សុខភាពរបស់ពួកគេផងដែរ។
អ្នកប្រើប្រាស់Facebook ម្នាក់ ឈ្មោះ ដារ៉ា បានសរសេរនៅលើបណ្តាញសង្គមរបស់ខ្លួនថា នេះគឺជាករណីដ៏គួរឲ្យព្រួយបារម្ភ និងចង់ឲ្យមន្រ្តីពាក់ព័ន្ធធ្វើការស្រាវជ្រាវពីផលប៉ះពាល់ជាបន្ទាន់។
ទន្ទឹមគ្នានេះដែរ សុវណ្ណ អ្នកប្រើប្រាស់បណ្តាញសង្គម Facebook ម្នាក់ទៀត ក៏បានយល់ដូចដារ៉ាដែរ។ សុវណ្ណ និយាយថា៖ “មិនដឹងម៉េចទេ ខ្ញុំធ្លាប់ញ៉ាំដែរ! សូមអាជ្ញាធរជួយត្រួតពិនិត្យផង”។
លោក ស៊ុំ ចម្រើន រដ្ឋបាលនៅហាងលក់តែបៃតង ដែលមានឈ្មោះថា Dé-Like-Milk បាននិយាយថា នៅហាងរបស់លោកមានគម្រោងដាក់លក់តែគុជដែរ តែដោយសារមានលេចលឺព័ត៌មានមិនល្អពីអតិថិជន ដែលភាគច្រើនជាយុវជន លោកបានលុបចោលគម្រោងតែម្តង។
ម្ចាស់ហាងតែគុជមួយទៀតឈ្មោះ Pink bule Tea បាននិយាយថា ផលិតផលតែគុជ ដែលលោកនាំយកមកលក់ មិនមានផលប៉ះពាល់ដល់សុខភាពទេ ព្រោះជារបស់ក្រុមហ៊ុននាំចូលស្របច្បាប់។ ប៉ុន្តែថ្មីៗនេះហាងរបស់លោកបានផ្អាកលក់តែគុជជាបណ្តោះអាសន្ន ដោយសារក្រុមហ៊ុននាំចូលអស់ទំនិញពីស្តុក។
ទោះយ៉ាងណាម្ចាស់ហាងរូបនេះ បានយល់ស្របថា ផលិតផលតែគុជមួយចំនួនអាចធ្វើឲ្យប៉ះពាល់ដល់សុខភាពអ្នកញ៉ាំព្រោះធ្លាប់មានអ្នកលក់បោះដុំមួយចំនួនបានដើរលក់តាមផ្ទះ និងហាងខ្លះ មានតម្លៃទាបជាងទីផ្សារ ដែលសង្ស័យជាផលិតផលក្លែងក្លាយ។
លោក ម៉ក់ ពេជ្ររិទ្ធិ អគ្គនាយក នៃនាយកដ្ឋានកាំកុងត្រូល ក្រសួងពាណិជ្ជកម្មបានថ្លែងថា លោកនៅមិនទាន់ទទួលបានសេចក្តីរាយការណ៍ជុំវិញបញ្ហានេះនៅឡើយទេ ។ លោកថា លោកនឹងស្រាវជ្រាវជុំវិញបញ្ហានេះ៕
អត្ថបទ៖មៃ សុខលីម
រូបភាព ៖Facebook
Loading...
Post a Comment