ខេត្តព្រះសីហនុ៖លោកតាកសារិទ្ធជានាយរងការិយាល័យប្រឆាំងបទល្មើសនិងត្រូវជាក្មួយសំណព្វចិត្តរបស់លោកស្នងការខេត្តព្រះសីហនុ ៖ លោក តាក សារិទ្ធ ជានាយរងការិយាល័យប្រឆាំងបទល្មើស និងត្រូវជាក្មួយសំណព្វចិត្តរបស់ លោកស្នងការ តាក វណ្ណថា កំពុងប្រើឥទ្ធិពលអំណាចរបស់ខ្លួន ទៅប្រមូលផលប្រយោជន៍ពីជំនួញគ្រឿងញៀន ហើយមានព័ត៌មានដ៏គួរឲ្យភ្ញាក់ផ្អើលមួយ គឺទាក់ទិននឹងករណីដែលលោក តាក សារិទ្ធ បានរកស៊ីចងការលុយ ឲ្យក្រុមអ្នករកស៊ីជួញដូរគ្រឿងញៀន ដើម្បីសងរំលស់ប្រចាំខែ ដូចជាគេដើររាប់លុយតាមផ្សារអញ្ចឹង មិនដឹងជាថ្នាក់លើបានដឹងរឿងនេះឬក៏អត់ ហើយនៅពេលរឿងនេះ ត្រូវបានទម្លាយជាសាធារណៈ គេរំពឹងទុកថា ថ្នាក់លើនឹងមិនព្រងើយកន្តើយនោះទេ។
មន្ត្រីនគរបាលមួយចំនួនបានលើកឡើងថា លោក តាក សារិទ្ធ បានប្រើស្បែកជានគរបាល ដៃម្ខាងធ្វើការបង្ក្រាបបទល្មើស ហើយដៃម្ខាងទៀត ក៏សកម្មក្នុងការប្រមូលលុយ ពីបទល្មើសយកទៅច្រកហោប៉ៅ ធ្វើមានធ្វើបានផ្ទាល់ខ្លួន គ្មាននរណាហ៊ានហើបមាត់ទេ។ ជាក់ស្តែងទីតាំងចែកចាយ គ្រឿងញៀននៅខេត្តព្រះសីហនុ ចំនួន ៥កន្លែងធំៗ កំពុងធ្វើចរាចរណ៍គ្រឿងញៀន យ៉ាងអនាធិបតេយ្យ ក៏ព្រោះតែលោក តាក សារិទ្ធ បានផ្តល់ភ្លើងខៀវឲ្យពួកគេផងដែរ ព្រោះក្រៅពីការប្រើស្បែកជា នគរបាលទៅបង្ក្រាបគ្រឿងញៀន ក៏លោក តាក សារិទ្ធ មានទំនាក់ទំនងល្អ ជាមួយមេឈ្មួញរកស៊ី គ្រឿងញៀនធំៗមួយចំនួនផងដែរ។
យោងតាមប្រភពដែលធ្លាយចេញពីក្រោមក្លៀកលោក តាក សារិទ្ធ បានឲ្យដឹងថា មេឈ្មួញចែកចាយគ្រឿងញៀន មួយចំនួនធ្លាប់ទំនាក់ទំនងពឹងអាស្រ័យ សុំចងការលុយពីលោក តាក សារិទ្ធ ហើយសងរំលស់ប្រចាំថ្ងៃ ដូចគេរាប់លុយនៅក្នុងផ្សារត្រីអញ្ចឹង ដូចជាមេឈ្មួញចែកចាយគ្រឿងញៀន ជនជាតិយួនម្នាក់ឈ្មោះ ឡុង ក៏បានចងការលុយ ១ម៉ឺនដុល្លារពីលោក តាក សារិទ្ធ ផងដែរ។ គេមិនច្បាស់ទេថា តើរូបភាពនៃការចងការលុយនេះ គ្រាន់តែជាការបង្វែងដាន នៃអំពើសូកប៉ាន់ដែលក្រុមឈ្មួញ រកស៊ីចែកចាយគ្រឿងញៀនទាំងនោះ ធ្វើឡើងដើម្បីបន្លំភ្នែកមន្ត្រីដទៃទៀត ឬក៏យ៉ាងណានោះទេ។
ទីតាំងនៃការចែកចាយគ្រឿងញៀនធំៗ ចំនួន ៥កន្លែងដែលក្រុមឈ្មួញ កំពុងតែធ្វើដោយរលូនល្អ និងត្រជាក់ចិត្តនោះ មាននៅចំណុចភ្នំខៀវ តំបន់ឧតុនិយម តំបន់ភូមិថ្មី តំបន់ក្រោយសណ្ឋាគារ អូគីណាវ៉ា និងតំបន់កោះរ៉ុង ដែលទីតាំងទាំង ៥ន្លែងនេះ មានមេឈ្មួញគ្រឿងញៀនឈរជើង តាមតំបន់នីមួយៗ ហើយក៏ត្រូវជាប់កាតព្វកិច្ច បង់លុយប្រចាំខែ ប្រចាំថ្ងៃឲ្យលោក តាក សារិទ្ធ ដែលក្នុងមួយកន្លែងៗ មានចំនួនរាប់ពាន់ដុល្លារ។ គេមិនច្បាស់ថា តើផលប្រយោជន៍ដែលលោក តាក សារិទ្ធ ប្រមូលបានត្រូវបានបែងចែក ទៅថ្នាក់លើណាខ្លះទេ ទើបមិនដែលមានការ ដាក់ពិន័យលើលោក តាក សារិទ្ធ។
ជារៀងរាល់យប់គេសង្កេតឃើញលោក តាក សារិទ្ធ ដឹកនាំកម្លាំងនគរបាលចំនួន ៦នាក់ ចេញល្បាតក្នុងរូបភាពតាមដាន និងបង្ក្រាបការចែកចាយ និងប្រើប្រាស់គ្រឿងញៀន ប៉ុន្តែមែនទែនទៅ មិនដែលឃើញមានស្នាដៃអ្វីទេ គឺសកម្មបំផុតក្នុងការដឹកនាំកម្លាំង ចុះទៅប្រមូលលុយប្រចាំខែ និងកោសរូសឈ្មួញមួយចំនួន ដែលមិនទាន់បង់លុយ ឲ្យចូលខ្លួនមកបង់លុយតាមការកំណត់។ បើមិនដូច្នេះទេ ត្រូវលោក តាក សារិទ្ធ បញ្ជាឲ្យកូនចៅចាប់យកទៅគោះលុយ ហើយដោះលែងស្ងាត់ៗ ប៉ុន្តែសម្រាប់ទីតាំងចែកចាយ គ្រឿងញៀនដែលបានបង់លុយរួចហើយនោះ គេមិនដែលឃើញលោក តាក សារិទ្ធ ទៅក្បែរទេ៕
Source from: watphnom-news.com
Loading...
Post a Comment