ខេត្តព្រះសីហនុ ៖ បន្ទាប់ពីមានការបែកធ្លាយរឿង បំណុលរាប់ពាន់លានរៀល ដែលម្ចាស់កាស៊ីណូ សណ្ឋាគារ និងម្ចាស់អាជីវកម្មធំៗជាច្រើន បានជំពាក់មិនទាន់ ទូទាត់ថ្លៃអគ្គិសនី ដែលអាចកើតឡើងដោយសារការឃុបឃិតគ្នា រវាងមន្ត្រីអគ្គិសនី និងម្ចាស់ទីតាំងអាជីវក្មទាំងនោះ គេយល់ថា ការស៊ើបអង្កេតឲ្យបានស៊ីជម្រៅ ឬការធ្វើសវនកម្មណាមួយ គួរតែធ្វើឲ្យមានភាពច្បាស់លាស់ និងមានតម្លាភាព ដើម្បីវែកមុខមន្ត្រីពុករលួយ ឬឈ្មួញដែលជំពាក់បំណុលរដ្ឋ នាំយកទៅផ្តន្ទាទោសតាមច្បាប់។
យ៉ាងណាក៏ដោយ ក្រោយពេលបែកធ្លាយរឿងនេះ គេសង្កេតឃើញលោក គី វុឌ្ឍី ជាមេអាជីវកម្មអគ្គិសនីខេត្តព្រះសីហនុ ភ័យស្លន់ស្លោរជាងគេ ហើយបានបញ្ជាឲ្យកូនចៅ ទៅកាត់ភ្លើង ផ្ទះអ្នកកាសែតម្នាក់ ដោះយកកុងទរ័ភ្លើងមកទុក ដោយដាក់ការសង្ស័យជុំវិញរឿង ដែលកាសែតក្នុងស្រុកជាច្រើន បានចុះផ្សាយ រឿងអាស្រូវ ពាក់ព័ន្ធថវិការដ្ឋ រាប់សិបលានរៀល ត្រូវបានគេយកមកធ្វើ ជាប្រយោជន៍បុគ្គល។ ដែលទង្វើរបស់លោក គី វុឌ្ឍី បែបនេះ ត្រូវបានមហាជនរិះគន់ថា ជាការខឹងគោវាយរទេះ ឬយកកំហឹងទល់កំហល់ នាំឲ្យខាតបង់ផលប្រយោជន៍ ហើយអំពើបែបនេះ អាចចាត់ទុកជារឿង មិនសូវឈ្លាសវៃប៉ុន្មានទេ។
មន្ត្រីសាលាខេត្តព្រះសីហនុ បានលើកឡើងថា ភាពមិនប្រក្រតីក្នុងអង្គភាព អគ្គិសនីខេត្តព្រះសីហនុ គឺជារឿងគួរឲ្យចាប់អារម្មណ៍បំផុត និងអាចចាត់ទុកជាព័ត៌មាន ដែលថ្នាក់លើត្រូវចាត់វិធានការ ស៊ើបអង្កេតឲ្យបានស៊ីជម្រៅ។ ជាពិសេសលោក គី វុឌ្ឍី ដែលជាមេអាជីវកម្ម អគ្គិសនីខេត្តព្រះសីហនុ គឺជាអ្នកទទួលខុសត្រូវធំជាងគេ គួរតែពិចារណា រកដំណោះស្រាយលើបញ្ហានេះ មិនមែនមកក្តៅក្រហាយ ជាមួយអ្នកកាសែតបែបនេះទេ។ ព្រោះរឿងបំណុលរាប់ពាន់លានរៀល មិនមែនជារឿងធម្មតាទេ ហើយចំណាត់ការខុសរឿង របស់លោកលោក គី វុឌ្ឍី នាំឲ្យគេសង្ស័យថា គាត់មានរឿងអាថ៌កំបាំង អ្វីម្យ៉ាងហើយ។
សូមបញ្ជាក់ថា ដោយសារតែការបញ្ចេញកំហឹងរបស់លោក គី វុឌ្ឍី កាលពីវេលាម៉ោង ១០ព្រឹក ថ្ងៃទី១៩ ខែតុលា ឆ្នាំ២០១៣ នេះនៅផ្ទះលោក ឈុន សារុំ ជាអ្នកកាសែត ប្រចាំខេត្តព្រះសីហនុ ក្នុងតំបន់ទំនប់រលក មានបុគ្គលិកអគ្គិសនី ចំនួនពីរនាក់ បានមកកាត់ភ្លើង ដោះយកកុងទ័រ ក៏កើតមានរឿងចម្រូងចម្រាស់។ លោក ឈុន សារុំ ដែលជាប្រធាន សាខាសម្ព័ន្ធអ្នកសារព័ត៌មានកម្ពុជា ប្រចាំខេត្តព្រះសីហនុផងដែរនោះ បានអះអាងថា គ្មានមូលហេតុណាមួយ ដែលត្រូវបុគ្គលិកអគ្គិសនី មកកាត់ភ្លើងដោះយកកុងទ័រ របស់គាត់នោះទេ ថ្វីដ្បិតតែគាត់មានការជំពាក់ ថ្លៃជាវអគ្គិសនីបន្តិចបន្តួច ប៉ុន្តែគាត់បានធ្វើកិច្ចសន្យាបង់រំលោះ ជាមួយប្រធានចាស់ ដែលទើបនឹងផ្លាស់ចេញ រួចរាល់ហើយ។
លោក ឈុន សារុំ បានអះអាងថា នឹងមានការប្តឹងតវ៉ាទៅតាមផ្លូវច្បាប់ ប្រសិនបើមានការកាត់ភ្លើង ដោះយកកុងទ័រ ទៅទុកមែននោះ ដោយសំអាងលើកិច្ចសន្យា។ លោក ឈុន សារុំ បានបញ្ជាក់ថា រឿងកាសែតចុះផ្សាយ រឿងអ្វីនោះ វាជារឿងរបស់កាសែត បើកាសែតណាមួយចុះផ្សាយ គ្មានការពិតអគ្គិសនី អាចប្តឹងកាសែតនោះទៅ។ មានការកត់សម្គាល់ថា សម្រាប់លោកលោក ឈុន សារុំ ដែលយល់ដឹងពីច្បាប់ទម្លាប់ អាចតវ៉ាចំពោះ ការប្រព្រឹត្តដោយបំពាន របស់មន្ត្រីអគ្គិសនី ក្រោមបញ្ជាលោក គី វុឌ្ឍី តែចំពោះប្រជាពលរដ្ឋ ក្រីក្រជាច្រើនគ្រួសារ តែងតែទទួលរងគ្រោះ ឬត្រូវគេកោសរូសឲ្យបង់លុយ តាមតែទំនើងចិត្ត ក្រោមរូបភាពមកផ្តាច់ភ្លើង ឬដោះយកកុងទ័រ។
គេនៅចាំបានថា ក្រោយពេលផ្លាស់ប្តូរតំណែង ប្រធានអគ្គិសនី ខេត្តព្រះសីហនុ បញ្ហាបំណុលគឺជារឿងធំបំផុត ដែលលោកលោក ឈឹម សឿន ជាប្រធានថ្មីត្រូវគិតគូរមុនគេ ហើយបានចេញបញ្ជាឲ្យ បិទភ្លើងតាមបណ្តាសណ្ឋាគារ កាស៊ីណូ និងទីតាំងអាជីវកម្មមួយចំនួន ដែលបានជាប់បំណុលអគ្គិសនី ក្នុងទំហំទឹកប្រាក់ រាប់រយលានរៀល។ បន្ទាប់ពីមានបទបញ្ជាបែបនេះ ក៏ស្រាប់តែបែកធ្លាយ រឿងរ៉ាវជាច្រើន ទាក់ទិនលោក គី វុឌ្ឍី ដែលបានបញ្ជាឲ្យ កូនចៅរបស់គាត់ ដើរផ្តាច់ភ្លើងតែតាមកន្លែង រកស៊ីតូចតាច ឬតាមផ្ទះមន្ត្រីរាជការជាដើម ប៉ុន្តែនៅតាមទីតាំងសណ្ឋាគារ កាស៊ីណូធំៗ ជាច្រើនកន្លែង ដែលជំពាក់បំណុល អគ្គិសនីរាប់រយលានរៀល គឺលោក គី វុឌ្ឍី អត់ចេញបញ្ជា ឲ្យកាត់ផ្តាច់ចរន្តអគ្គិសនីទេ មិនដឹងជាមានអាថ៌កំបាំងអ្វី។
ដូចជាករណីម្ចាស់ទីតាំង អាជីវកម្មមួយចំនួន ជំពាក់បំណុលរដ្ឋ រាប់រយលានរៀល គឺលោក គី វុឌ្ឍី មានការយោគយល់ មិនបានកាត់ផ្តាច់ចរន្តអគ្គិសនី ទៅតាមការណែនាំរបស់ ប្រធានអង្គភាពអគ្គិសនីនោះទេ ដូចដែលមន្ត្រីមួយចំនួន បានធ្លោយឲ្យដឹងថា លោក គី វុឌ្ឍី នៅតែបណ្តោយឲ្យ ម្ចាស់ទីតាំងទាំងនោះ បន្តជំពាក់បំណុល ដោយខ្វះការទទួលខុសត្រូវ។ ប៉ុន្តែសម្រាប់ប្រជាពលរដ្ឋសាមញ្ញ គ្រាន់តែយឺតយ៉ាវ ក្នុងការបង់ថ្លៃភ្លើង ត្រូវខាងអគ្គិសនីពិន័យ ឬចុះមកកាត់ភ្លើងដើម្បីកោសរូស ឲ្យបង់លុយ ទើបភ្ជាប់ភ្លើងឲ្យប្រើប្រាស់វិញ សូម្បីតែផ្ទះអ្នកកាសែត ដែលជំពាក់បំណុលតិចតួច គ៏គ្មានការយោគយល់ដែរ៕
Source from: watphnom-news.com
Post a Comment