ខេត្តស្ទឹងត្រែង ៖ មិនថារដូវទឹកជំនន់ ឬរដូវប្រាំងនោះទេ សកម្មភាពដឹកជញ្ជូនឈើខុសច្បាប់ នៅក្នុងខេត្តស្ទឹងត្រែង កើតឡើងយ៉ាង អនាធិបតេយ្យបំផុត គេមិនដែលឃើញលោក អ៊ីវ ឯកសាវត្តី ជានាយខណ្ឌរដ្ឋបាលព្រៃឈើខេត្តស្ទឹងត្រែង ចាត់វិធានការលុបបំបាត់ ឲ្យមានប្រសិទ្ធភាពម្តងណាឡើយ ដែលករណីនេះគេសង្ស័យថា ក្រុមឈ្មួញរកស៊ី ដឹកជញ្ជូនឈើខុសច្បាប់សុទ្ធតែបានបែងចែក ផលប្រយោជន៍ជូនមន្ត្រី ជំនាញរដ្ឋបាលព្រៃឈើ ដើម្បីកុំឲ្យរំខាន ជំនួញរកស៊ីដឹកជញ្ជូនឈើ ខុសច្បាប់របស់ពួកគេ។
សេចក្តីរាយការណ៍ ពីខេត្តស្ទឹងត្រែងបានឲ្យដឹងថា ក្នុងរដូវទឹកដំឡើងនេះ ឈ្មួញជាច្រើនបានដឹកជញ្ជូន ឈើប្រណីតតាមទូក មកពីស្រុកសេសាន និងស្រុកសៀមប៉ាង ឆ្លងកាត់ទីរួមខេត្តស្ទឹងត្រែង ចូលមកក្នុងខេត្តក្រចេះ និងខេត្តកំពង់ចាម យ៉ាងរលូនល្អបំផុត ។ មន្ត្រីជំនាញរដ្ឋបាលព្រៃ ឈើតាំងពីថ្នាក់សង្កាត់ រហូតដល់ថ្នាក់ខណ្ឌ ក្នុងខេត្តស្ទឹងត្រែង បានផ្លាស់ប្តូរជីវភាពថ្មី យ៉ាងឆាប់រហ័ស ដោយសារអំពើពុករលួយ នៃការឃុបឃិតឲ្យក្រុមឈ្មួញ កាប់បំផ្លាញព្រៃឈើ និងដឹកជញ្ជូនឈើខុសច្បាប់ មិនដែលខ្វល់ខ្វាយពីច្បាប់ទម្លាប់ ឬការរឹតបន្តឹងរបស់ អង្គភាពប្រឆាំងអំពើ ពុករលួយម្តងណាឡើយ។
ឈ្មួញមួយចំនួនបានលើកឡើងថា ជំនាញរដ្ឋបាលព្រៃឈើរបស់លោក អ៊ីវ ឯកសាវត្តី បានយកបទបញ្ជាលេខ០១ ទៅធ្វើជាមូលប្បទានបត្រ ដើរទារលុយពីក្រុមឈ្មួញ រកស៊ីដឹកជញ្ជូនឈើខុសច្បាប់ យ៉ាងអនាធិបតេយ្យបំផុត។ ក្រុមឈ្មួញជាច្រើន មានមោទនភាពយ៉ាងក្រៃលែង ដោយសារតែភាពអសកម្មរបស់លោក អ៊ីវ ឯកសាវត្តី ដូចដែលឈ្មួញខ្លះ បានអះអាងថា ឲ្យតែមានលុយបង់ឲ្យ មន្ត្រីជំនាញរដ្ឋបាលព្រៃឈើ ទោះជាដឹកជញ្ជូនឈើខូងផ្លូវ ក៏មិនដែលមាន នរណាហ៊ានហើបមាត់ គឺទាមទារឲ្យលោក អ៊ុក រ៉ាប៊ុន ជារដ្ឋមន្ត្រីក្រសួងកសិកម្ម ដែលទើបឡើងតំណែងថ្មីថ្មោង មេត្តាពិនិត្យមើលបញ្ហានេះ ឡើងវិញផង។
ឈ្មួញធំៗជាច្រើន ដូចជាឈ្មោះ លឹម ប៊ុណ្ណា ហៅខ្នា ដែលមានឈ្មោះ សាន ចយ ជាមេការក៏កំពុងសកម្មបំផុត ក្នុងការកាប់បំផ្លាញព្រៃឈើ ក្នុងស្រុកសេសាន ដោយជ្រកក្រោមអាជ្ញាប័ណ្ណ ស្តារបាតអាងទំនប់វារីអគ្គិសនី សេសាន២ ដែលនៅទីនោះ មានការកាប់បំផ្លាញឈើប្រណីត និងឈើប្រភេទលេខ២ រាលដាលដល់ក្រៅ តំបន់បាតអាងទំនប់វារីអគ្គិសនី។ សូម្បីតែលោក អ៊ីវ ឯកសាវត្តី មិនដឹងជាមានអាថ៌កំបាំងអ្វីទេ បានជារក្សាភាពស្ងៀមស្ងាត់ មិនដែលឮមាត់ឮក ពីការកាប់បំផ្លាញព្រៃឈើ របស់មេឈ្មួញ លឹម ប៊ុណ្ណា ហៅខ្នា នោះឡើយ ។
និយាយពីយាយព្រឿង ឯណោះវិញ ក៏ជាមេឈ្មួញរកស៊ី ដឹកជញ្ជូនឈើខុសច្បាប់ ឡើងដុះស្លែទៅហើយប្រចាំខេត្តស្ទឹងត្រែង ប៉ុន្តែបច្ចុប្បន្ននេះ យាយព្រឿងបានឲ្យ ចែហុង ជាប្អូនស្រីរបស់គាត់ និងក្មួយរបស់គាត់ ជាអ្នកចេញមុខជំនួស ប៉ុន្តែយាយព្រឿង នៅតែមានឥទ្ធិពល រត់ការបង់លុយជូន សមត្ថកិច្ចពាក់ព័ន្ធដដែល។ ពេលខ្លះយាយព្រឿង បានបំបែករូបភាព នៃការរកស៊ីដឹកជញ្ជូនឈើខុសច្បាប់ ដោយចាត់ចែងឲ្យឈ្មួញតូចតាច មួយចំនួនជាអ្នកចេញមុខរត់ការ ដោយគាត់មិនសូវចេញមុខដោយផ្ទាល់ទេ ហើយសមត្ថកិច្ច និងមន្ត្រីជំនាញទាំងអស់ ឲ្យតែដឹងថា ជាឈើរបស់យាយព្រឿង ម្នាក់ៗញញឹមញញែម ហើយស្កាត់ទៅជួបយាយព្រឿង ដើម្បីបើកលុយ។
សូម្បីតែឈ្មួញតូចតាចមួយចំនួន កំពុងតែប្រមូលទិញឈើ ពីស្រុកសេសាន និងស្រុកសៀមប៉ាង ដឹកជញ្ជូនតាមទូកអេវ ឆ្លងកាត់ខេត្តស្ទឹងត្រែង ក្នុងមួយយប់ៗជាច្រើនទូក ក៏លោក អ៊ីវ ឯកសាវត្តី មិនដែលឈឺក្បាលវិលមុខ ចាត់វិធានការបង្ក្រាប សកម្មភាពដឹកជញ្ជូនឈើ ដ៏អនាធិបតេយ្យទាំងនោះ ដោយសារតែបញ្ហា ផលប្រយោជន៍តែម្តង។ គេចង់ឃើញលោក ឆេង គឹមស៊ុន ជាប្រធានរដ្ឋបាលព្រៃឈើ និងលោក អ៊ុក រ៉ាប៊ុន ជារដ្ឋមន្ត្រីក្រសួងកសិកម្ម ទើបឡើងតំណែងថ្មីថ្មោង មេត្តាពិនិត្យមើលភាពអនាធិបតេយ្យ នៃការដឹកជញ្ជូនឈើ នៅក្នុងខេត្តស្ទឹងត្រែង ឡើងវិញជាបន្ទាន់ ព្រោះជំនាញរដ្ឋបាលព្រៃឈើរបស់លោក អ៊ីវ ឯកសាវត្តី ត្រូវក្រុមឈ្មួញទិញទឹកចិត្ត ឲ្យជួយសម្របសម្រួល ជំនួញឈើខុសច្បាប់ ដែលជាការផ្គើនបំផុត ទៅនឹងបទបញ្ជាលេខ០១ របស់រាជរដ្ឋាភិបាល ៕
Source from: watphnom-news.com
Loading...
Post a Comment