កាលពីថ្ងៃទី១៣ ខែវិច្ឆិកា ឆ្នាំ២០១៣ កន្លងទៅនេះ មានករណីចាប់ខ្លួនសិស្សសាលាអាយុ៨ឆ្នាំម្នាក់ដើម្បីជំរិតទារប្រាក់ចំនួន៥ម៉ឺនដុល្លារអាមេរិកពីឪពុកម្តាយសិស្សដែលបង្កឡើងដោយឧក្រិដ្ឋជនចំនួន៣នាក់នៅខេត្តស្ទឹងត្រែង ។
សមត្ថកិច្ចបានប្រាប់ឲ្យដឹងថា មុនពេលកើតហេតុកុមារាឈ្មោះ កោះ ចាន់រស្មី អាយុ៨ឆ្នាំ បានចេញពីសាលារៀនអនុវត្តក្រុងស្ទឹងត្រែងដើម្បីត្រឡប់ទៅផ្ទះវិញ ក៏ត្រូវបានជនសង្ស័យចំនួន៣នាក់ចាប់នាំខ្លួនយកទៅដាក់ក្នុងគម្ពោតព្រៃនាវេលាម៉ោង១១ព្រឹកថ្ងៃទី១៣ ខែវិច្ឆិកា ឆ្នាំ២០១៣ រួចហើយជនសង្ស័យបានទូរស័ព្ទមកកាន់ឈ្មោះ កោះ សុខ អាយុ៥២ឆ្នាំ និង ឈ្មោះ កង នឿន អាយុ៤០ ឆ្នាំ ត្រូវជាឪពុកនិងម្តាយរបស់កុមារារងគ្រោះរស់នៅភូមិស្ពានថ្ម សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង ជំរិតទារប្រាក់ចំនួន៥ម៉ឺនដុល្លារអាមេរិកជាថ្នូរនឹងការដោះលែងកូនប្រុសមកវិញ ។
ក្រុមគ្រួសារកុមារារងគ្រោះបានប្រាប់សមត្ថកិច្ចឲ្យដឹងថា ពេលជនសង្ស័យជំរិតទារប្រាក់គាត់ចំនួន៥ម៉ឺនដុល្លារអាមេរិកនោះ គាត់បានឆ្លើយថា គ្មានលុយដល់កម្រិតចំនួននោះទេ រួចហើយគាត់ក៏តថ្លៃគ្នាជាមួយក្រុមជនចាប់ជំរិតនោះរហូតបានឯកភាពគ្នាត្រឹមចំនួនទឹកប្រាក់៥.០០០ដុល្លារអាមេរិកដោយកំណត់គោលដៅប្រគល់លុយនៅចំណុចស្រែពោធិ៍ សង្កាត់ស្ទឹងត្រែង ក្រុងស្ទឹងត្រែង វេលាម៉ោង១៥ និង៣០នាទីរសៀល ។ ពេលនោះជងសង្ស័យ២នាក់បានចេញមកទទួលប្រាក់ពីគាត់ក៏ត្រូវសមត្ថកិច្ចអាវុធហត្ថខេត្តស្ទឹងត្រែងចាប់ខ្លួនមុខសញ្ញាជនជំរិតទារប្រាក់នោះបានភ្លាមៗដែរ ពីព្រោះគាត់បានប្តឹងទៅសមត្ថកិច្ចមុនរួចជាស្រេចហើយ ។
សមត្ថកិច្ចអាវុធហត្ថខេត្តស្ទឹងត្រែងបានបង្ហាញមុខសញ្ញាឧក្រិដ្ឋជនជំរិតទារប្រាក់ទាំង៣នាក់នោះរួមមាន ៖ ១-ឈ្មោះ ឆាយ ឈួងហេង ភេទប្រុស អាយុ៤០ឆ្នាំ រស់នៅភូមិស្រះព្រីង ឃុំស្វាយលាភ ស្រុកបាធាយ ខេត្តកំពង់ចាម «ជាអ្នកចេញមកទទួលប្រាក់ » ២-ឈ្មោះ ស សុវណ្ណ ភេទប្រុស អាយុ៣០ឆ្នាំ «ជាអ្នកចេញមកទទួលប្រាក់» និង ៣-ឈ្មោះ អ៊ុង ចរិយា ភេទស្រី អាយុ២០ឆ្នាំ «ជាអ្នកនៅចាំយាមកុមារារងគ្រោះក្នុងព្រៃ» ត្រូវជាប្រពន្ធរបស់ឈ្មោះ ស សុវណ្ណ រស់នៅភូមិអូរស្វាយ ឃុំអូរស្វាយ ស្រុកថាឡាបរិវ៉ាត់ ខេត្តស្ទឹងត្រែង ។
ប្រតិបត្តិការបង្ក្រាបក្រុមឧក្រិដ្ឋជនជំរិតទារប្រាក់ទាំង៣នាក់និងរំដោះកុមារារងគ្រោះប្រកបដោយជោគជ័យនេះ ត្រូវបានសមត្ថកិច្ចអាវុធហត្ថខេត្តស្ទឹងត្រែងប្រើប្រាស់រយៈពេលអស់ជិត៤ម៉ោង ហើយជនសង្ស័យត្រូវបានសមត្ថកិច្ចកសាងសំណុំរឿងបញ្ចូនទៅកាន់តុលាការសាលាដំបូងខេត្តស្ទឹងត្រែង បន្តចាត់ការតាមនីតិវិធីនៃច្បាប់ ៕
Source from: www.dtn7.com
Loading...
Post a Comment