គូស្វាមី ភរិយាថ្មីថ្មោងមួយបានសម្រេចចិត្តចែកផ្លូវគ្នាដោយភាគីខាងស្រីអះអាងថា មកពីការរៀបអាពាហ៍ពិពាហ៍នោះឪពុកម្តាយនាងបង្ខំ ហើយការបែកបាក់គ្នានេះធ្វើឲ្យភាគីខាងប្រុសមិនអស់ចិត្តទាល់តែសោះព្រោះប្រពន្ធធ្លាប់ឱបនឹងដើមទ្រូងបែរជាព្រាត់គ្នាទៅវិញ ។
បុរសឈ្មោះ ណែម សំណាង អាយុ២៣ឆ្នាំ ត្រូវជាស្វាមីរបស់ឈ្មោះ យ៉ាង ស្រីយ៉ា អាយុ២៣ឆ្នាំ បានរៀបរាប់ថា ខ្លួនបានរៀបការនៅភូមិរកា ឃុំស្នោ ស្រុកព្រៃកប្បាស ខេត្តតាកែវ ទើបមានរយៈពេលជាង០៥ខែប៉ុណ្ណោះ«រៀបការនៅថ្ងៃទី០៧ ខែមិថុនា ឆ្នាំ២០១៣» ។ ក្រោយរៀបការរួចភ្លាមគឺដំណើរការក្រេបចន្ទទឹកឃ្មុំបានប្រព្រឹត្តទៅជាធម្មតា ស្រាប់តែប្រពន្ធនិយាយសុំលែងលះធ្វើឲ្យខ្លួនជាប្តីសឹងធ្លាក់ថ្លើមប្រមាត់ ។ ខណៈនោះខ្លួនក៏បានសួរទៅប្រពន្ធថា «តើបងខុសអ្វីបានជាអូនសុំលែង?» ហើយទទួលបានចម្លើយតបពីប្រពន្ធវិញថា «អូនអត់ស្រឡាញ់បងបន្តិចទេ» ដោយសារការៀបអាពាហ៍ពិពាហ៍នេះ គឺធ្វើតាមតែការបង្ខិតបង្ខំពីឪពុកម្តាយប៉ុណ្ណោះ ។
បុរសប្រពន្ធសុំលែងរូបនេះបានបន្តទៀតថា បន្ទាប់ពីប្រពន្ធរបស់ខ្លួននិយាយមិនទាន់ចប់ស្រួលបួលផង នាងក៏រៀបខោអាវចុះចេញពីផ្ទះទៅផ្ទះរបស់នាងវិញដែលឋិតនៅទល់មុខផ្ទះគ្នា ។ ប៉ុន្តែបែកគ្នាមួយរយៈនាងក៏វិលត្រឡប់មកវិញដោយនាងចេះតែបន្តធ្វើរបៀបនេះទៀតជាច្រើនដង ។ លើសពីនេះ នៅថ្ងៃទី៣០ ខែតុលា ឆ្នាំ២០១៣ កន្លងទៅថ្មីៗនេះប្រពន្ធខ្លួនបាននាំប្រុសម្នាក់ជិះម៉ូតូឱបចង្កេះប្រុសនោះយ៉ាងស្អិតមកបញ្ឈឺចិត្តខ្លួន ហើយក្រោយមក ប្រុសដដែលនេះ បានចូលងូតទឹកក្នុងបន្ទប់ជាមួយនាងថែមទៀត ។ តាំងពីមានប្រុសមកដល់ផ្ទះ ប្រពន្ធរបស់ខ្លួនកាន់តែទទូចសុំចែកផ្លូវជាមួយខ្លួនដោយនាងនិយាយថាសុំយកតែគ្រែដេកមួយនិងឆ្នាំងបាយ ។ ដោយទ្រាំតទៅទៀតលែងបានខ្លួនក៏បានសម្រេចចិត្តយល់ព្រមលែងលះគ្នាតាមសំណើរបស់ប្រពន្ធនៅសាលាឃុំនាថ្ងៃទី១៤ ខែវិច្ឆិកា ឆ្នាំ២០១៣នេះ ដោយខ្លួនមិនប្តឹងសុំទាមទារសំណងអ្វីទេដោយចាត់ទុកថា នេះជាផលបុណ្យពីជាតិមុនរបស់ខ្លួនទៅចុះ ។
ដោយឡែក នាងយ៉ាង ស្រីយ៉ា ជាអតីតប្រពន្ធបុរសអភ័ព្វ បានបញ្ជាក់ថា នាងមិនបាននាំប្រុសយកមករស់នៅជាមួយដល់ក្នុងផ្ទះទេ ហើយប្រុសដែលនាងជិះម៉ូតូជាមួយនោះគឺជាពូរបស់នាង ។ រីឯការណ៍ដែលនាងមិនអាចរស់នៅជាមួយប្តីតទៅទៀតបានព្រោះតែប្តីម្នាក់នេះតែងប្រើអំពើហិង្សាលើរូបនាងខ្លាំងពេក តែនាងមិនបានបង្ហាញអំពីរូបភាពនៃអំពើហិង្សានោះឲ្យដឹងទេ ។
អ្នកភូមិរស់នៅក្បែរផ្ទះប្តីប្រពន្ធថ្មីថ្មោងដែលចែកផ្លូវគ្នានេះបាននិយាយថា ប្តីប្រពន្ធមួយគូនេះតាំងពីរៀបការមកមិនដែលឮសូរជម្លោះមាត់កដាក់គ្នាអ្វីទេ តែបញ្ហាដែលខាងស្រីអះអាងថា ប្តីប្រើអំពើហិង្សាទំនងជានាងមិនអាចទ្រាំទ្រដំណេកជាមួយប្តីបាន ។
អាជ្ញាធរមូលដ្ឋានបានបញ្ជាក់ថា អាជ្ញាធរមិនមានសិទ្ធិអំណាចរំលាយចំណងអាពាហ៍ពិពាហ៍របស់ប្តីប្រពន្ធមួយគូនេះទេ លុះត្រាតែស្ថាប័នតុលាការទើបអាចសម្រេចបាន ៕
Source from: www.dtn7.com
Loading...
Post a Comment