ធី​ សុវណ្ណ​ថា​ ៖​ ប្រទេស​សិង្ហ​បុរី​តូច​ តែ​ថ្នាក់ដឹកនាំ​មានគំនិត​ធំ​,​ ប្រទេស​កម្ពុជា​ធំ​ តែ​ថ្នាក់ដឹកនាំ​មានគំនិត​តូច​

11/10/2013 05:00:00 AM

មិនមែនជាអ្នកនយោបាយទេ ហើយក៏មិនមែនជាអ្នកសិល្បការិនីអ្វីដែរ ប៉ុន្តែកញ្ញា ធី សុវណ្ណថា ដែលអ្នកលេង Internet ធ្លាប់ស្គាល់នាងថា ជាយុវតីគាំទ្រកម្មវិធីនយោបាយគណបក្សសង្គ្រោះជាតិ មានឯកឧត្តម សម រង្ស៊ី ជាប្រធាន យ៉ាងសកម្មនោះ មានកេរ្តិ៍ល្បីល្បាញគ្រាន់បើនៅក្នុងបណ្តាញសង្គម Facebook ដ្បិតកញ្ញាអតីតជា Admin នៃ Page ដ៏ធំមួយឈ្មោះ I Love Cambodia Hot News និងកញ្ញាក៏មាន Page ផ្ទាល់ខ្លួនឯងផងដែរ ដែលមានអ្នក Like Page ចំនួន 35.561Likes ។

ក្រុមអ្នកលេង Facebook ធ្លាប់បានសម្តែងនូវការគាំទ្រចំពោះទស្សនៈរបស់កញ្ញា ធី សុវណ្ណថា ដែលបាន Post នៅក្នុងបណ្តាញសង្គម Facebook កាលពីថ្ងៃទី០១ ខែវិច្ឆិកា ឆ្នាំ២០១៣ថា "ខ្ញុំចង់ប្រាប់ថា ខ្ញុំគាំទ្រគណបក្សសង្គ្រោះជាតិដោយសារគោលនយោបាយសង្គ្រោះជាតិ តែសម្រាប់កិច្ចការសង្គម ការស្រឡាញ់មិត្តភាព ការជួយគ្នា គឺមិនត្រូវរើសអើងឡើយ ហើយទោះពួកគាត់ឋិតនៅក្នុងនិន្នាការនយោបាយខុសគ្នាក៏ដោយ ។ ខ្ញុំចង់ប្រាប់ថា យើងគឺជាខ្មែរ បងប្អូនជនរួមឈាមត្រូវតែសាមគ្គីគ្នា ។ ការជ្រើសរើសគាំទ្រគណបក្សនយោបាយ គឺជាសិទ្ធិរបស់ប្រជាពលរដ្ឋគ្រប់រូបដែលគ្រប់អាយុបោះឆ្នោត ដើម្បីជ្រើសរើសយកមេដឹកនាំល្អដែលគិតពីផលប្រយោជន៍ជាតិជាធំ ត្រូវគាំទ្រដោយឆន្ទៈ ដោយគ្មានការបង្ខិតបង្ខំ គោរពលើសេចក្តីសម្រេចបុគ្គល ដោយមានមនសិការជាតិជាធំ ។ " ។

ពីប្រទេសសិង្ហបុរី ក្នុងដំណើរបេសកកម្មរបស់នាង កញ្ញា ធី សុវណ្ណថា បាន Post នូវទស្សនៈមតិខ្លីមួយ តែមានន័យខ្លឹមសារយ៉ាងជ្រាលជ្រៅគួរឲ្យពិចារណានៅក្នុង Page របស់នាងនារាត្រីថ្ងៃទី០៩ ខែវិច្ឆិកា ឆ្នាំ២០១៣នេះថា "ប្រទេសសិង្ហបុរីតូច តែថ្នាក់ដឹកនាំមានគំនិតធំ, ប្រទេសកម្ពុជាធំ តែថ្នាក់ដឹកនាំមានគំនិតតូច" ។

កញ្ញា ធី សុវណ្ណថា ត្រូវបានមនុស្សជាច្រើននាក់ ជាពិសេសស្រទាប់យុវជន យុវតីដែលគាំទ្រគណបក្សសង្គ្រោះជាតិទទួលស្គាល់ថា នាងជាយុវតីមានសម្រស់ស្អាតបាត ជាកូនអ្នកមានជីវភាពធូរធារម្នាក់ ដែលរស់នៅក្នុងសង្គមពោរពេញទៅដោយភាពរើសអើង និន្នាការគណបក្សនយោបាយ ប៉ុន្តែកញ្ញាបែរជាមានសេចក្តីក្លាហានយ៉ាងមោះមុតចូលប្រឡូកក្នុងកិច្ចការសង្គមយ៉ាងសកម្ម ដោយស្ម័គ្រចិត្តចូលរួមគាំទ្រកម្មវិធីនយោបាយរបស់គណបក្សនយោបាយប្រឆាំងថែមទៀត ។ នាងមានកេរ្ត៍ឈ្មោះល្អនៅក្នុងបណ្តាញសង្គម Facebook ទោះបីមានអ្នកលេង Facebook ខ្លះប្រឹងធ្វើការបរិហាររិះគន់ទៅលើរូបនាងយ៉ាងណាក៏ដោយ ប៉ុន្តែនាងនៅតែមិនរើសអើង មិនច្រឡោតប្រកាន់ខឹងតបទៅអ្នករិះគន់ទាំងនោះវិញទេ ដែលទីបំផុតធ្វើឲ្យកញ្ញាក្លាយជា"អ្នកឈ្នះ" ៕