រាជធានីភ្នំពេញ៖ស្ត្រីអ្នកលក់បាយម្នាក់ក្នុងចំណោមអ្នកត្រូវរបួសដែលបានដឹកបញ្ជូនទៅសង្គ្រោះបន្ទាន់បានស្លាប់ពេលទៅដល់មន្ទីរពេទ្យដោយសាររងបួសចំរាជធានីភ្នំពេញ ៖ ស្ត្រីអ្នកលក់បាយម្នាក់ ក្នុងចំណោមអ្នកត្រូវរបួស ដែលបានដឹកបញ្ជូន ទៅសង្គ្រោះបន្ទាន់ បានស្លាប់ពេលទៅដល់មន្ទីរពេទ្យ ដោយសាររងបួសចំ ក្រោមដោះខាងស្តាំ នៅក្នុងហេតុការណ៍ដែលសមត្ថកិច្ច បាញ់ប្រហារលើហ្វូងបាតុកររោងចក្រ SL កាលពីព្រឹកថ្ងៃទី១២ ខែវិច្ឆិកា ឆ្នាំ២០១៣ ទន្ទឹមពេលដែលអគ្គស្នងការដ្ឋាននគរបាលជាតិ បានបញ្ជាក់ថា សមត្ថកិច្ចបានចាត់វិធានការ សមស្របក្នុងការបង្ក្រាបបាតុករ ។
ស្ត្រីជនរងគ្រោះមានឈ្មោះ ហេង សុខុម អាយុ ៤៩ ឆ្នាំ ជាអ្នកលក់បាយ នៅម្តុំស្ពានស្ទឹងមានជ័យ បានស្លាប់ភ្លាមៗពេលត្រូវបាន បញ្ជូនមកដល់មន្ទីរពេទ្យរុស្ស៊ី ហើយខាងមន្ទីរពេទ្យ បានប្រគល់សាកសពទៅឲ្យក្រុមគ្រួសារយកទៅធ្វើបុណ្យ។ យ៉ាងណាក៏ដោយ ស្វាមីស្ត្រីជនរងគ្រោះ បានប្រាប់អ្នកសារព័ត៌មានថា ក្រោយពីរៀបចំបុណ្យសពប្រពន្ធរួចហើយ គាត់នឹងដាក់ពាក្យប្តឹង រកយុត្តិធម៌ឲ្យប្រពន្ធរបស់គាត់ ដែលត្រូវសមត្ថកិច្ចបាញ់ប្រហារ មកលើកម្មករ SL ហើយត្រូវប្រពន្ធរបស់គាត់។
បើតាមសេចក្តីរាយការណ៍បានឲ្យដឹងថា ពលរដ្ឋរងរបួសផ្សេងទៀត កំពុងទទួលការព្យាបាល ដោយមាន ៩ នាក់នៅមន្ទីរពេទ្យរុស្ស៊ី និង ២ នាក់ទៀតនៅមន្ទីរពេទ្យ ព្រះកុសុមៈ ហើយជនរងគ្រោះទាំងនោះ មានអ្នកខ្លះមិនមែនជាកម្មករទេ ហើយខ្លះទទួលរងរបួសធ្ងន់។ អ្នកតាមដានហេតុការណ៍នេះ យល់ថា ការប៉ះទង្គិចគ្នា ដែលបណ្តាលឲ្យភាគី កម្មករនិងសមត្ថកិច្ច រងរបួស កើតឡើងដោយសារ តែកំហុស និងការមិនយកចិត្តទុកដាក់ របស់ស្ថាប័នពាក់ព័ន្ធ ក្នុងការដោះស្រាយបញ្ហារបស់កម្មករ។
ការតវ៉ារបស់កម្មករ គឺដើម្បីទាមទារឲ្យដក ប្រធានរដ្ឋបាលរោងចក្រ លោក មាស សុថា ដែលមានងារជាឧកញ៉ាផងនោះ សុំឲ្យដកកម្លាំងសមត្ថកិច្ចចម្រុះ ចេញពីបរិវេណរោងចក្រ និងផ្តល់ប្រាក់ឈ្នួល ដល់កម្មករអំទ្បុងបាតុកម្មរយៈ ៣ ខែជាដើម។ កាលពីថ្ងៃទី២២ ខែតុលា ឆ្នាំ២០១៣ កម្មកររោងចក្រនេះ បានហែក្បួនមកផ្ទះសម្តេចនាយករដ្ឋមន្ត្រី ហ៊ុន សែន ដើម្បីសុំអន្តរាគមន៍។ ប៉ុន្តែពួកគេត្រូវបានកម្លាំងសមត្ថកិច្ចវាយបង្ក្រាប បណ្តាលឲ្យស្ត្រីមួយចំនួនរងរបួស។
ដោយឡែកសេចក្តីថ្លែងការណ៍ របស់គណបក្សសង្គ្រោះជាតិ ចេញផ្សាយនៅថ្ងៃអង្គារនេះ ឲ្យដឹងថា គណបក្សសង្គ្រោះជាតិ សោកស្តាយចំពោះ ព្រឹត្តិការណ៍នៃការប្រើហិង្សា ពីសំណាក់អាជ្ញាធរ ដោយគ្រាន់តែកម្មករ ដង្ហែក្បួនបាតុកម្មដោយសន្តិវិធី ដើម្បីទាមទារថៅកែរោងចក្រ គោរពច្បាប់ការងារ និងអនុវត្តកិច្ចសន្យា ដែលបានព្រមព្រៀងកន្លងមក។ គណបក្សសង្គ្រោះជាតិ អំពាវនាវឲ្យអាជ្ញាធរ ស្វែងរកដំណោះស្រាយដោយសន្តិវិធី។
សេចក្តីថ្លែងការណ៍របស់ អគ្គស្នងការដ្ឋាននគរបាលជាតិ ចេញផ្សាយនៅថ្ងៃអង្គារនេះ បានឲ្យដឹងថា ក្នុងព្រឹត្តិការណ៍នៃការប៉ះទង្គិចនោះ ជនឱកាសនិយមមួយក្រុម ដែលមិនមែនជាកម្មករ បានឆ្លៀតញុះញង់បញ្ឆេះបង្កឲ្យមានអំពើហិង្សា លើសមត្ថកិច្ចដោយគប់ដុំថ្ម បាញ់ទឹកចំពាមគ្រាប់ដែក និងវាយដុតបំផ្លាញមធ្យោបាយ ព្រមទាំងហ៊ុំព័ទ្ធ ចាប់ខ្លួនកងកម្លាំងសមត្ថកិច្ចចំនួន ៥នាក់ នៅវត្តស្ទឹងមានជ័យ។ សេចក្តីថ្លែងការណ៍បន្តថា ស្ថិតក្នុងស្ថានភាពបែបនេះ ចាប់បង្ខំឲ្យកងកម្លាំងមានសមត្ថកិច្ច ត្រូវប្រើប្រាស់វិធានការសមស្រប ដើម្បីការពារខ្លួន រាំងស្កាត់អំពើហិង្សា កុំឲ្យរីករាលដាល និងការពារសន្តិសុខ សុវត្ថិភាពជូនកម្មករ ដែលធ្វើបាតុកម្មដោយសន្តិវិធី។
អគ្គស្នងការដ្ឋាននគរបាលជាតិបន្តថា កម្លាំងសមត្ថកិច្ច រងរបួសធ្ងន់ និងស្រាលមានចំនួន ៤៧នាក់ ស្លាប់ពលរដ្ឋ ១នាក់ របួសធ្ងន់ស្រាល ៩នាក់ ខូចខាតរថយន្ត ២គ្រឿង ម៉ូតូ២ គ្រឿងរបស់កម្លាំងសមត្ថកិច្ច ដោយសារការដុតបំផ្លាញ និងធ្វើឲ្យបែកកញ្ចក់រថយន្តអគ្គិភ័យ ២គ្រឿង។ អគ្គស្នងការដ្ឋាននគ របាលជាតិ សូមសម្តែងការសោកស្តាយជាទីបំផុតចំ ពោះហេតុការណ៍ ដែលបានកើតឡើង ហើយអគ្គស្នងការដ្ឋាននគរបាលជាតិ កំពុងចាត់វិធានការយ៉ាងសកម្ម ដើម្បីស្រាវជ្រាវ ស៊ើបអង្កេតទៅតាមនីតិវិធី៕
Source from: watphnom-news.com
Loading...
Post a Comment