ក្រុម​ហ៊ុន ស៊ី​​អ​​ឌី របស់​លោក សាំ​ង ចន្ថា និង​​ក្រុម​ហ៊ុន ហេង​​ប្រា​​ឌ័​រ របស់​​ឧក​ញ៉ា រ័ត្ន សុ​ខន ប្រ​មូល​​ទិញ​​ឈើ​​​ខុស​ច្បាប់ នាំ​​ទៅ​​លក់​​នៅ​​វៀត​ណាម​

12/18/2013 08:00:00 AM

ខេត្តរតនគិរី៖សកម្មភាពកាប់បំផ្លាញព្រៃឈើនៅក្នុងស្រុកអូរយ៉ាដាវនិងស្រុកវ៉ឺនសៃខេត្តរតនគិរីជាប់តំបន់ដែនជម្រកសត្វព្រៃលំផាត់

ខេត្តរតនគិរី ៖ សកម្មភាពកាប់បំផ្លាញព្រៃឈើ នៅក្នុងស្រុកអូរយ៉ាដាវ និងស្រុកវ៉ឺនសៃ ខេត្តរតនគិរី ជាប់តំបន់ដែនជម្រក សត្វព្រៃលំផាត់ កំពុងកើតឡើងយ៉ាងអនាធិបតេយ្យ ប្រព្រឹត្តដោយក្រុមហ៊ុនចំនួន៣ ជាសាខារបស់ក្រុមហ៊ុនវៀតណាម ដ៏ធំមួយ ឈ្មោះ ហុងអាញ់យ៉ាឡាយ ដែលទទួលបានដី សម្បទានជាង៥ម៉ឺនហិកតា។ នៅក្នុងតំបន់នោះ គេសង្កេតឃើញឧកញ៉ា មហាសេដ្ឋីម្នាក់ឈ្មោះ រ័ត្ន សុខន បានធ្វើជាខ្នងបង្អែក និងឃុបឃិតឲ្យមានការ បំផ្លាញព្រៃឈើយ៉ាងអនាធិបតេយ្យ ដែលមានឈ្មោះ សាំង ចន្ថា ជាមេការរបស់ក្រុមហ៊ុន ស៊ីអឌី ជាអ្នកអុងអាត់ខ្លាំងជាងគេ ដូច្នេះរាជរដ្ឋាភិបាលកម្ពុជា គួរតែពិនិត្យមើលភាពអនាធិបតេយ្យ នៃការកាប់បំផ្លាញព្រៃឈើ និងការដឹកជញ្ជូនឈើខុសច្បាប់ នៅដែនជម្រកសត្វព្រៃលំផាត់ ឡើងវិញផង។

សេចក្តីរាយការណ៍ព័ត៌មាន ពីខេត្តរតនគិរីបានឲ្យដឹងថា ក្រុមហ៊ុនចំនួន៣ ដែលជាសាខារបស់ក្រុមហ៊ុន ហុងអាញ់យ៉ាឡាយ ជាប់ពាក់ព័ន្ធនឹងសកម្មភាព កាប់បំផ្លាញព្រៃឈើធ្វើអាជីវកម្ម ដោយមិនបានបង់ពន្ធជូនរដ្ឋ និងនាំឈើប្រណីត ចេញទៅលក់នៅវៀតណាម ផ្ទុយពីកិច្ចព្រមព្រៀង ជាមួយក្រសួងពាក់ព័ន្ធ រួមមានក្រុមហ៊ុន ហុងអាញ់អូរយ៉ាដាវ ក្រុមហ៊ុន ស៊ីអឌី ដែលមានលោក សាំង ចន្ថា ជាមេការ និងក្រុមហ៊ុន ហេង ប្រាឌ័រ របស់ឧកញ៉ា រ័ត្ន សុខន ជាទីប្រឹក្សារបស់សម្តេច ហេង សំរិន។ នៅក្នុងតំបន់ជម្រកសត្វព្រៃលំផាត់ មានសកម្មភាពកាប់បំផ្លាញព្រៃឈើ យ៉ាងវិនាសហិនហោច ហើយលោក សាំង ចន្ថា និងឧកញ៉ា រ័ត្ន សុខន មានការពាក់ព័ន្ធ ជាមួយការប្រមូលទិញឈើ ពីប្រជាពលរដ្ឋដែលចូលទៅកាប់បំផ្លាញ តាមដែនជម្រកសត្វព្រៃ យ៉ាងអនាធិបតេយ្យ មិនខ្វល់ពីច្បាប់អ្វីឡើយ។

សកម្មភាពបំផ្លាញព្រៃឈើរបស់លោក សាំង ចន្ថា និងមេឈ្មួញជាឧកញ៉ា នៅក្នុងដែនជម្រកសត្វព្រៃលំផាត់ មានទ្រង់ទ្រាយធំខ្លាំងណាស់ គឺក្នុងមួយថ្ងៃៗមានការដឹកជញ្ជូន ឈើប្រណីតចេញពីព្រៃការពារ មិនតិចជាង ២រថយន្តច្នៃនោះទេ ហើយបូករួមជាមួយឈើ ដែលប្រមូលទិញដោយខុសច្បាប់ ពីប្រជាពលរដ្ឋ ឃើញថាសកម្មភាពនៃការ បំផ្លាញឈើប្រណីតនៅតំបន់នោះ គួរឲ្យព្រួយបារម្ភបំផុត។ លោក សាំង ចន្ថា បានចាត់ចែងប្រមូលទិញ ឈើប្រណីតដឹកយកទៅលក់ នៅវៀតណាមយ៉ាងអនាធិបតេយ្យ មិនខ្វល់ពីបទបញ្ជារបស់ រាជរដ្ឋាភិបាលនោះទេ ហើយសកម្មភាពនាំចេញ ឈើប្រណីតទៅលក់នៅក្រៅប្រទេស បានជ្រកក្រោមអាជ្ញាប័ណ្ណ ដឹកជញ្ជូនឈើអារប្រភេទលេខ២ ជារឿងខុសច្បាប់។

មានការបញ្ជាក់ផងដែរថា លោក សាំង ចន្ថា បានកាប់បំផ្លាញព្រៃឈើ ក្នុងតំបន់ដីសម្បទានរបស់ខ្លួន ហើយធ្វើសកម្មភាព ដឹកជញ្ជូនលើសពីចំនួនកំណត់ ដែលមានចែងក្នុងលិខិតប៉េសេ ដូចជាសម្រាប់រថយន្តមួយគ្រឿង ជំនាញរដ្ឋបាលព្រៃឈើចេញ លិខិតអនុញ្ញាតឲ្យដឹកជញ្ជូន ឈើប្រមាណ ១៧ម៉ែត្រត្រីគុណប៉ុណ្ណោះ ប៉ុន្តែលោក សាំង ចន្ថា បានលួចដឹកជញ្ជូន និងបង្កប់ឈើប្រណីតដល់ទៅ ៣០ឬ៤០ម៉ែត្រត្រីគុណ។ ជាគោលការណ៍ ឈើដែលត្រូវបានកាប់បំផ្លាញ នៅក្នុងដីព្រៃសម្បទាន យកមកកែច្នៃសម្រាប់លក់ចែកចាយក្នុងស្រុក ត្រូវបង់ពន្ធជូនរដ្ឋ ប៉ុន្តែលោក សាំង ចន្ថា បានឃុបឃិតជាមួយជំនាញរដ្ឋបាលព្រៃឈើ និងសមត្ថកិច្ចពាក់ព័ន្ធ ធ្វើអាជីវកម្មដឹកជញ្ជូនឈើ ដោយមិនបានបង់ពន្ធត្រឹមត្រូវនោះទេ នាំឲ្យខាតបង់ចំណូល ថវិកាជាតិច្រើនសន្ធឹកសន្ធាប់។

សកម្មភាពដឹកជញ្ជូនឈើខុសច្បាប់ ផ្ទុកលើសពីលិខិតអនុញ្ញាតិ ដែលបានកំណត់ នាំឲ្យមានការបំផ្លាញផ្លូវស្ពានជាច្រើន នៅក្នុងខេត្តរតនគិរី ជាពិសេសនៅ ក្នុងស្រុកអូរយ៉ាដាវ នេះតែម្តង ផ្តើមចេញពីអំពើពុករលួយ របស់មន្ត្រីជំនាញរដ្ឋបាលព្រៃឈើ ដែលឃុបឃិតជាមួយលោក សាំង ចន្ថា និងឧកញ៉ា ដែលមានលុយច្រើនហូរហៀរ និងជ្រកក្រោមស្លាកសម្បទាន ធ្វើសកម្មភាពបំផ្លាញ ព្រៃឈើយ៉ាងវិនាសហិនហោច ក្នុងតំបន់ជម្រកសត្វព្រៃលំផាត់។ គេចង់ឃើញផ្នែកពាក់ព័ន្ធ ពិនិត្យមើលភាពអនាធិបតេយ្យ ដែលកំពុងបង្កឡើងដោយក្រុមហ៊ុន ស៊ីអឌី ដែលមានលោក សាំង ចន្ថា ជាមេការ និងក្រុមហ៊ុន ហេង ប្រាឌ័រ របស់លោកឧកញ៉ា រ័ត្ន សុខន ឡើងវិញជាបន្ទាន់ ដែលយ៉ាងហោចណាស់ ត្រូវរៀបចំឲ្យមានការគោរពច្បាប់ទម្លាប់ ដូចមានចែងក្នុងកិច្ចព្រមព្រៀង។

សូមបញ្ជាក់ថា ក្រុមហ៊ុន ស៊ីអឌី និងក្រុមហ៊ុន ហេង ប្រាឌ័រ របស់លោកឧកញ៉ា រ័ត្ន សុខន មិនទាន់បានបំពេញកាតព្វកិច្ច ដូចមានចែងក្នុងកិច្ចព្រមព្រៀងនោះទេ ឃើញតែកាប់បំផ្លាញព្រៃឈើ ធ្វើអាជីវកម្មនិងប្រមូលទិញឈើខុសច្បាប់ យកទៅលក់នៅវៀតណាម សុទ្ធសឹងជាប្រភេទឈើប្រណីត មានតម្លៃខ្ពស់ ហើយការកាប់បំផ្លាញព្រៃឈើ លក់ចែកចាយក្នុងស្រុក ក៏មិនបានបង់ពន្ធ ជូនរដ្ឋឲ្យបានត្រឹមត្រូវ តាមគោលការណ៍នោះទេ។ សម្តេច ហ៊ុន សែន ធ្លាប់បានព្រមានជារឿយៗថា ត្រូវដកហូតអាជ្ញាប័ណ្ណពីក្រុមហ៊ុនសម្បទាន ដែលបំពានច្បាប់ ឬកាប់បំផ្លាញព្រៃឈើ យ៉ាងអនាធិបតេយ្យ ដូច្នេះករណីក្រុមហ៊ុន ស៊ី អ ឌី របស់លោក សាំង ចន្ថា និងក្រុមហ៊ុន ហេង ប្រាឌ័ររបស់លោកឧកញ៉ា រ័ត្ន សុខន គួរតែជាកម្មវត្ថុដ៏សំខាន់មួយដែលរាជរដ្ឋាភិបាលត្រូវពិចារណាឡើងវិញ៕