អំពើពុករលួយនៅក្នុងជួរមន្ត្រីធំៗក្នុងគណបក្សប្រជាជនកម្ពុជា ដែលជាគណបក្សនយោបាយកាន់កាប់អំណាចដុះស្លែលើស្ថាប័នរដ្ឋទាំងមូល តែងត្រូវបានលើកឡើងជារឿយៗដោយមន្ត្រីគណបក្សសង្គ្រោះជាតិ ដែលជាគណប្សនយោបាយប្រឆាំងដ៏ធំនៅកម្ពុជា ហើយក៏ក្លាយជាមុខសញ្ញាវាយប្រហាររបស់គណបក្សប្រឆាំងទៅលើគណបក្សកាន់អំណាចដែរ ។
ជាមួយគ្នានេះ គណបក្សប្រឆាំងគ្រោងនឹងទម្លាយអំពើពុករលួយ និងអត្រាការប្រាក់ខ្ពស់ក្នុងការប្រើប្រាស់ជំនួយរបស់អង្គការមូលនិធិរូបិយវត្ថុអន្តរជាតិ "IMF" នៅកម្ពុជាជូនប្រធាន IMF ទៀតផង ខណៈដែលប្រទេសកម្ពុជាត្រូវបានអង្គការតម្លាភាពអន្តរជាតិវាយតម្លៃថា ប្រទេសកម្ពុជាជាប់ចំណាត់ថ្នាក់លេខ១៦០ក្នុងចំណោម១៧៧ប្រទេស ខាងប្រព្រឹត្តអំពើពុករលួយ នៅពេលដែលប្រទេសមីយ៉ាន់ម៉ាជាប់លេខ១៥៧ និងប្រទេសឡាវជាប់លេខ១៤០ ។
ដើមខែធ្នូ ឆ្នាំ២០១៣នេះ បណ្តាញឃោសនាដែលដង្ហែគាំទ្រគណបក្សកាន់អំណាច បានធ្វើការចុះផ្សាយនូវព័ត៌មានដ៏រសើបមួយថា មានការបាត់លុយមូលនិធិសង្គ្រោះជាតិប្រមាណ១០ម៉ឺនដុល្លារអាមេរិកដោយមិនដឹងមូលហេតុ ហើយធ្វើឲ្យផ្ទៃក្នុងគណបក្សសង្គ្រោះជាតិរង្គោះរង្គើបែកបាក់ ដោយសារថវិកាមូលនិធិសង្គ្រោះជាតិបានមកពីសប្បុរសជននានា ត្រូវបានចាយវាយនិងប្រើប្រាស់មិនចំគោលដៅ ។
ដោយសារមានព័ត៌មានចុះផ្សាយដោយបណ្តាញឃោសនាដង្ហែគាំទ្រគណបក្សនយោបាយកាន់អំណាច ទម្លាយចេញរឿងបាត់លុយមូលនិធិសង្គ្រោះជាតិ គ្រប់គ្រងដោយគណបក្សសង្គ្រោះជាតិដូចនេះ ទើបធ្វើឲ្យមន្ត្រីគណបក្សកាន់អំណាចចំអកឲ្យទៅគណបក្សប្រឆាំងវិញថា "ខ្លួនជាចោរ បែរជាស្រែកឲ្យគេជួយចាប់ចោរ" ។
ទោះយ៉ាងណាក៏ដោយ ព័ត៌មានដែលរថា មានអំពើពុករលួយធ្វើឲ្យបាត់លុយមូលនិធិសង្គ្រោះជាតិបានមកពីសប្បុរសជននានាចំនួនប្រមាណ១០ម៉ឺនដុល្លារអាមេរិក គ្រប់គ្រងដោយមន្ត្រីគណបក្សសង្គ្រោះជាតិនោះ ត្រូវបានច្រានចោលដោយឯកឧត្តម គី វណ្ណដារ៉ា អគ្គនាយកហិរញ្ញវត្ថុគណបក្សសង្គ្រោះជាតិ និងជាអ្នកតំណាងរាស្ត្រជាប់ឆ្នោតនៅមណ្ឌលខេត្តកំពង់ឆ្នាំងរួចហើយ ដោយឯកឧត្តមអះអាងថា ជាព័ត៌មានមានចេតនានយោបាយរបស់គណបក្សកាន់អំណាច ដើម្បីបំបាក់ស្មារតី និងបំភ័ន្តភ្នែកអ្នកគាំទ្រគណបក្សនយោបាយប្រឆាំងប៉ុណ្ណោះ ។
មជ្ឈដ្ឋានអ្នកច្បាប់និងអ្នកវិភាគកិច្ចការសង្គមនៅកម្ពុជា បានលើកឡើងថា រាល់ការលើកឡើងអំពីអំពើពុករលួយរបស់គណបក្សនយោបាយដែលមានអាសនៈនៅក្នុងរដ្ឋសភាទាំង២ ទាំងគណបក្សកាន់អំណាច ទាំងគណបក្សប្រឆាំង គួរតែបង្ហាញនូវហេតុផលនិងព័ស្តុតាងអាចទទួលយកបានផង ប្រសើរជាងលើកឡើងក្នុងគោលបំណងវាយប្រហារគ្នាក្នុងល្បែងនយោបាយ ។ ម្យ៉ាងទៀត ការបង្ហាញនូវព័ស្តុតាងដើម្បីរកឲ្យឃើញថា តើនរណាជា"ចោរ"ពិតប្រាកដ ? និងដើម្បីកុំឲ្យប្រជាពលរដ្ឋជាម្ចាស់ឆ្នោតវាយតម្លៃថា ជា"ចោរដូចគ្នា" ៕
Source from: www.dtn7.com
Loading...
Post a Comment