ខេត្តបាត់ដំបង៖យ៉ាងហោចណាស់ទ្រព្យសម្បត្តិសរុបជាទឹកប្រាក់ប្រហែល៦ម៉ឺនដុល្លារត្រូវបានបំផ្លាញក្នុងគ្រោះអគ្គិភ័យខេត្តបាត់ដំបង ៖ យ៉ាងហោចណាស់ ទ្រព្យសម្បត្តិសរុប ជាទឹកប្រាក់ប្រហែល ៦ម៉ឺនដុល្លារ ត្រូវបានបំផ្លាញ ក្នុងគ្រោះអគ្គិភ័យ ដែលបានបំផ្លិចបំផ្លាញ ផ្ទះលក់ចាហួយនិងចានឆ្នាំង ២ខ្នង ដោយសារទុស្សេខ្សែភ្លើង ពេលម្ចាស់ផ្ទះដេកលក់និងម្ចាស់ផ្ទះមួយទៀតមិននៅ កាលពីវេលាម៉ោង ៤និង៣០ នាទីភ្លឺព្រឹកថ្ងៃទី២០ ខែធ្នូ ឆ្នាំ២០១៣ ចំណុចក្រុមទី០៤ ភូមិថ្មគោល ឃុំតាម៉ឺន ស្រុកថ្មគោល ខេត្តបាត់ដំបង។
សមត្ថកិច្ច ព្រមទាំងរថយន្តដឹកទឹកឯកជនចំនួន ៧រថយន្ត បានជួយអន្តរាគមន៍ពន្លត់ រីឯរថយន្តពន្លត់អគ្គិភ័យខេត្ត ចុះទៅរកកន្លែង កើតហេតុមិនឃើញ ទំរាំរកឃើញភ្លើងឆេះផ្ទះអស់ គ្មានសេសសល់អ្វីឡើយ។ សមត្ថកិច្ចបានអោយដឹងថា ម្ចាស់ផ្ទះទី១ មានឈ្មោះ ផៃ សុផល ប្រុស អាយុ ៤៦ឆ្នាំនិងប្រពន្ធឈ្មោះ ថាយ វ៉ា អាយុ ៣៥ឆ្នាំ ជាម្ចាស់ផ្ទះលក់ចានឆ្នាំង សង់ពីថ្មក្រោមឈើលើទំហំ ៤,៥ ម៉ែត្រគុណ ២៦ម៉ែត្រខូចខាតទ្រព្យសម្បត្តិ ប្រហែល ២ម៉ឺនដុល្លារនិងតួផ្ទះទើបសាងសង់តម្លៃ ១៧០០០ដុល្លារ។
ផ្ទះទី២ឈ្មោះ ឃ្វៀង វ៉ាន់យុង អាយុ ៥៣ឆ្នាំមានប្រពន្ធឈ្មោះ លន់ លៀប អាយុ ៤៩ឆ្នាំ ជាម្ចាស់ផ្ទះលក់គ្រឿងចាហួយ សង់ពីថ្មក្រោមឈើលើទំហំ ៤,៥ ម៉ែត្រគុណ ២៦ម៉ែត្រខូចខាតទ្រព្យសម្បត្តិ ប្រហែល ២ម៉ឺនដុល្លារ ម្ចាស់មិននៅចាក់សោរចោល។ សមត្ថកិច្ចបានសន្និដ្ឋានថា ករណីឆេះផ្ទះ ២ខ្នងនេះ គឺដោយសារទុស្សេខ្សែភ្លើង ចាប់ផ្តើមឆេះពីផ្ទះឈ្មោះ ថាយ វ៉ា ជាប្រពន្ធឈ្មោះ ផៃ សុផល ផ្ទះលក់ចានឆ្នាំងរាលមកផ្ទះទី២ តែម្តង ហើយសមត្ថកិច្ចមូលដ្ឋាន បានជួយអន្តរាគមន៍ ដោយប្រើឡានទឹក ឯកជនអស់ ៧ រថយន្ត ទើបមិនរាលដាល ទៅផ្ទះផ្សេងៗទៀត។
ឈ្មោះ ថាយ វ៉ា ជាប្រពន្ធឈ្មោះ ផៃ សុផល ផ្ទះលក់ចានឆ្នាំង បានប្រាប់សមត្ថកិច្ចថា ពីយប់មិនមានភ្លើងធូប នៅសេសល់ទេ មុនពួកខ្លួនចូលដេក បានពន្លត់អស់ហើយ តែមុនពេលកើតហេតុ ខ្លួនជាប្រពន្ធបានឮសំឡេងចាន ធ្លាក់ប្រាវៗស្មានតែសត្វឆ្មាលោតជាន់ ចានឆ្នាំងក៏ងើបមើល ពេលនោះស្រាប់តែឃើញភ្លើងឆេះ ក៏ស្រែកអោយគេជួយ និងរាយការណ៍ជូនសមត្ថកិច្ចតែម្តង។ ប្រធានការិយាល័យ ពន្លត់និងបង្ការគ្រោះអគ្គិភ័យ បានអោយដឹងថា ក្រោយពីទទួលបានដំណឹងភ្លាម រថយន្តបានទៅដល់ ស្រុកថ្មគោល តែរកទីតាំងកើតហេតុមិនឃើញ ដោយសារអ្នករាយការណ៍មិនច្បាស់លាស់ ទំរាំតែរកឃើញគឺហួសពេល ជួយអន្តរាគមន៍ ដោយត្រៀមចាំបាញ់ទឹក ខ្លាចវាឆាបឆេះម្តងទៀត៕ ដោយ សុខជា
Source from: watphnom-news.com
Loading...
Post a Comment