យុវជនអ្នកលេងបណ្តាញសង្គម Faceboo ដ៏សកម្មនៅកម្ពុជាម្នាក់ឈ្មោះ ផែ សុវណ្ណារិទ្ធ មាន Page ផ្ទាល់ខ្លួនឈ្មោះ Phe Sovannarith និងមានអ្នក Like Page ចំនួន158K "ជិត១៦ម៉ឺននាក់" ព្រមទាំងជាពលទាហាននៃកងយោធពលខេមរភូមិន្ទ អត្តលេខ០៧៨៩៩០ផងនោះ ធ្លាប់ទទួលរងនូវការជេរប្រមាថ និងការរិះគន់យ៉ាងខ្លាំងពីអ្នកលេង Facebook ជាពិសេសពីអ្នកគាំទ្រគណបក្សនយោបាយប្រឆាំងកន្លងមក រហូតដល់អ្នកលេង Facebook ចាប់ផ្តើមប្រកាសតៗគ្នាឲ្យប្រុងប្រយ័ត្នទៅនឹងអំពើរបស់ឈ្មោះ ផែ សុវណ្ណារិទ្ធ នេះទៀតផង ។
ប៉ុន្តែរយៈពេលបន្តបន្ទាប់មក ក្រោយការធ្វើសកម្មភាពដុតទង់ជាតិថៃ បញ្ចេញកំហឹងដែលថៃធ្លាប់ដុតទង់ជាតិខ្មែរមុន ដុតរូបថតលោកឧត្តមសេនីយ៍ឯក ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ និងដុតរូបថតសម្តេចអគ្គមហាសេនាបតីតេជោ នាយឧត្តមេសនីយ៍ផុតលេខផ្កាយមាស៥ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងបណ្តាញសង្គម Facebook យុវជនរូបនេះបានប្រកាសថា ឈប់គាំទ្រគណបក្សប្រជាជនកម្ពុជាហើយៗសម្រេចចិត្តសាជាថ្មីថា នឹងធ្វើអ្វីៗដែលខ្លួនគប្បីត្រូវធ្វើវិញ ។
ក្នុងក្របខ័ណ្ឌជាអង្គការសារព័ត៌មានមួយឯករាជ្យ និងមិនមានទស្សនៈចង្អៀតចង្អល់នោះ គេហទំព័រសារព័ត៌មានដើមត្នោត សូមធ្វើការដកស្រង់នូវទស្សនៈមតិមួយចំនួនរបស់យុវជន Facebook ឈ្មោះ ផែ សុវណ្ណារិទ្ធ យកមកចុះផ្សាយជូនប្រិយមិត្តអ្នកអានទុកគ្រាន់ពិចារណា ដូចតទៅ ៖
"ពេលខ្ញុំរិះគន់គណបក្សសង្គ្រោះជាតិ-CNRP គេថាខ្ញុំឆ្កែគណបក្សប្រជាជនកម្ពុជា-CPP ពេលខ្ញុំរិះគន់ CPP គេថាខ្ញុំឆ្កែCPPទៀត ។ អ្នកខ្លះមិនគិតអ្វីសោះ គិតតែជេរខ្ញុំឆ្កែ យួន អាចម៍ ឆ្កួត ឡប់ ។ គ្រប់គ្នាជេរខ្ញុំ ខ្ញុំមិនខឹងទេ ព្រោះគ្រប់គ្នាមិនយល់ពីខ្ញុំ តែគ្រប់គ្នាត្រូវចាំថា ក្នុងខ្លួនអ្នកនិងខ្ញុំមានឈាមដូចគ្នា ។ ជេរខ្ញុំបាន តែកុំមើលងាយឧត្តមគតិជាតិរបស់ខ្ញុំ ។" ។
"អរគុណដល់បងប្អូនយុវជនទាំងអស់ដែលបានជេររិះគន់ខ្ញុំ ធ្វើឲ្យខ្ញុំមានចិត្តកាន់តែស្រឡាញ់ជាតិរឹតតែខ្លាំង ។ ខ្ញុំនឹងចងចាំពាក្យជេររបស់អ្នក ដើម្បីពង្រឹងឆន្ទៈខ្លួនឯង ។ " ។
"កម្ពុជាព្រះរាជាអច្ឆរិយៈ ។ អត់ចេះខ្មាសគេ ទីក្រុងសំរាម រមណីយដ្ឋានបរទេស សេវាពុករលួយ ។ ទីក្រុងសំរាម ទឹកលិច ចោរលួច ប្លន់ ពុករលួយ ពេញផ្លូវ ស្ទះចរាចរណ៍ព្រឹកល្ងាច លូ ផ្លូវធ្វើជាប់រហូត ឆ្នេរទឺកស្អុយ ប្រាសាទដាក់លក់ ឈើដឹកកណ្តាលយប់ ដីវិនិយោគ៩៩ឆ្នាំ គុណភាពការងាររដ្ឋបាលសូន្យ រាស្ត្ររត់ចោលស្រុក ប្លន់ដីរាស្ត្រស្របច្បាប់…។ " ។
"ជាតិ សាសនា ព្រះមហាក្សត្រ ៖ បាវចនាជាតិខ្មែរកំពុងរលាយ ជាតិ ៖ ពុករលួយពីលើដល់ក្រោម សាសនា ៖ វាយដំដូចសត្វឆ្កែ ព្រះមហាក្សត្រ ៖ តុក្កតា ? ហត្ថលេខាឡើងចុះ ដកព្រះឆាយាលក្ខណ៍ ដាក់រូបថតសែន" ។
"បួនចំណុចបញ្ជាក់ថា កំណែទម្រង់ស៊ីជម្រៅ ស៊ីជម្រៅជាងមុន ៖ ១-កំណែទម្រង់ជាពាក្យឥតប្រយោជន៍អាណត្តិមុន, ២-ប៉ូលិសវាយបាតុករសាហាវជាងមុន, ៣-អំពើពុករលួយស៊ីស្ងាត់ជាងមុន ច្រើនជាងមុន, ៤-ដំឡើងអំណាចកូន និងបក្ខពួកខ្ពស់ជាងមុន ។" ។
"យុទ្ធសាស្ត្រចតុកោណអាណត្តិទី៥វគ្គបង្ហើយ ៖ ១-ព្រៃឈើនៅសល់តិចតួចកាប់បង្ហើយ, ២-ដីសម្បទានសល់តិចតួចជួលបង្ហើយ, ៣-សម្អាតផ្ទៃក្នុងមិនមែនជាបក្ខពួកខ្លួនបង្ហើយ, ៤-ពុករលួយស៊ីឲ្យជ្រៅ ខ្ចីគេឲ្យច្រើនត្រៀម២០១៨ ។" ។
"វិស័យទាំង៤ សេដ្ឋកិច្ចកម្ពុជាមានភាពរីកចម្រើនខ្លាំង ៖ ១-កសិកម្ម ៖ ស្រូវលក់បានថ្លៃ ជីកសិកម្មបរទេសក៏ថ្លៃ…កសិករខ្ចីលុយធនាគារច្រើន លក់ដីស្រែក៏ច្រើន ។ ២-សំណង ៖ ប្លង់ដីបានច្រើន អ្នកវិនិយោគរត់ចោលក៏ច្រើន…មានកម្មករសំណង់ជាច្រើនរត់ទៅធ្វើការក្រៅប្រទេស ។ ៣-ទេសចរណ៍ ៖ លក់តំបន់ទេសចរណ៍ឲ្យបរទេសបានច្រើន និង៤-កាត់ដេរ ៖ កម្មករបាតុកម្មច្រើន ហិង្សាក៏ច្រើន ស្លាប់ក៏ច្រើន ។ " ។
យុវជនអ្នកលេង Facebook ផែ សុវណ្ណារិទ្ធ ធ្លាប់បានប្រកាសថា ក្របខ័ណ្ឌជាពលទាហាននៃកងយោធពលខេមភូមិន្ទរបស់ខ្លួនត្រូវបានគេលុបចោលបាត់ទៅហើយ ។
ក.ក.ន ៖ គួរទុកពេលវេលាឲ្យយុវជន ផែ សុវណ្ណារិទ្ធ ពិចារណានូវអំពើរបស់ខ្លួន ដើម្បីឲ្យយុវជនរូបនេះគិតគូរអំពីជាតិតាមវិធីផ្ទាល់ខ្លួនរបស់លោក ពីព្រោះការជេរប្រទេចទៅលើយុវជន ផែ សុវណ្ណារិទ្ធ ក៏គ្មានផ្តល់នូវផលប្រយោជន៍អ្វីសម្រាប់ជាតិខ្មែរដែរ គឺមានតែនាំឲ្យខ្មែរកសាងនូវវប្បធម៌ជេរ និងលាបពណ៌គ្នាប៉ុណ្ណោះ ៕
Source from: www.dtn7.com
Loading...
Post a Comment