សិស្ស​ស្ទាវ​ថ្នាក់​ទី​១០​ពីរ​នាក់​ឆក់​កាបូប​ស្រី​ស្អាត​ជា​និស្សិត​ច្បាប់​ឆ្នាំ​ទី​៤​និង​ជា​អ្នក​បង្ហាញ​ម៉ូដ​ម្នាក់ត្រូវ​ប្រជាជន​ព័ទ្ធចាប់​បានប្រគល់​ឲ្យ​សមត្ថកិច្ច​

6/14/2014 06:01:00 AM

សិស្សស្ទាវថ្នាក់ទី១០ពីរនាក់ឆក់កាបូបស្រីស្អាតជានិស្សិតច្បាប់ឆ្នាំទី៤និងជាអ្នកបង្ហាញម៉ូដម្នាក់ត្រូវប្រជាជនព័ទ្ធចាប់បានប្រគល់ឲ្យសមត្ថកិច្ច

កាលពីវេលាម៉ោង១៤រសៀលថ្ងៃទី១៣ ខែមិថុនា ឆ្នាំ២០១៤ ម្សិលមិញនេះ សិស្សសាលាស្ទាវៗរៀនថ្នាក់ទី១០ នៃវិទ្យាល័យប៊ុនរ៉ានី ហ៊ុន សែន វត្តភ្នំ បាននាំគ្នាធ្វើសកម្មភាពឆក់កាបូបនិស្សិតស្រីឆ្នាំទី៤ និងជាអ្នកបង្ហាញម៉ូដម្នាក់ ខណៈមេឃកំពុងភ្លៀង ឋិតនៅផ្លូវលេខ៥១ កែងផ្លូវលេខ៣៧០ សង្កាត់បឹងកេងកងទី១ ខណ្ឌចំការមន រាជធានីភ្នំពេញ បានសម្រេចហើយប៉ុន្តែជួបរឿងអកុសល ពេលសិស្សស្ទាវៗទាំង២នាក់ បម្រុងជិះទោចក្រយានយន្តបំណងគេចខ្លួននោះ ក៏ស្រាប់តែ ភ្លាត់ស្នៀតរអិលដួលដោយខ្លួនឯងត្រូវប្រជាពលរដ្ឋនៅជិតកន្លែងកើតហេតុព័ទ្ធចាប់ខ្លួនបានប្រគល់ឲ្យសមត្ថកិច្ចតែម្តង ។

សាក្សីនៅកន្លែងកើតហេតុបានឲ្យដឹងថា មុនពេលកើតហេតុមានស្ត្រីម្នាក់ជិះទោចក្រយានយន្តម៉ាកIcon ពណ៌ផ្កាឈូក ពាក់ស្លាកលេខភ្នំពេញ 1AB-9646 ធ្វើដំណើរតាមផ្លូវលេខ៥១ ពីត្បូងទៅជើង ។ លុះមកដល់កែងផ្លូវ៣៧០ ស្រាប់តែមានយុវជន២នាក់ជិះទោចក្រយានយន្ត១គ្រឿងម៉ាក Suzuki Let´s ពណ៌ផ្កាឈូក ពាក់ស្លាកលេខភ្នំពេញ 1CC-8833 មកអែបនាងរួចធ្វើសកម្មភាពឆក់កាបូបពីស្ត្រីរងគ្រោះ។ បន្ទាប់ពីធ្វើសកម្មភាពឆក់កាបូបស្ត្រីរងគ្រោះរួចហើយ ជនសង្ស័យទាំង២នាក់ក៏ជិះទោចក្រយានយន្តគេចខ្លួន ប៉ុន្តែជាអកុសលដោយសារមានភ្លៀងផ្លូវរអិលធ្វើឲ្យទោចក្រយានយន្តជនសង្ស័យដួល និងភ្លាមៗនោះ ក្រុមប្រជាពលរដ្ឋដែលឋិតនៅជិតកន្លែងកើតហេតុក៏នាំគ្នាព័ទ្ធចាប់ជនសង្ស័យបានទាំង២នាក់ ប្រគល់ឲ្យសមត្ថកិច្ចនគរបាលប៉ុស្តិ៍ បឹងកេងកងទី១ ។

សមត្ថកិច្ចនគរបាលមូលដ្ឋានបានឲ្យដឹងថា យុវជនដែលធ្វើសកម្មភាពឆក់កាបូបតាមផ្លូវសាធារណៈនោះ មានឈ្មោះ សុខ លី អាយុ១៧ឆ្នាំ ស្នាក់នៅផ្ទះលេខ៦ ផ្លូវលេខ៧៥ សង្កាត់ស្រះចក ខណ្ឌដូនពេញ រាជធានីភ្នំពេញ និងម្នាក់ទៀតឈ្មោះ សុច សុភា អាយុ១៦ឆ្នាំ ស្នាក់នៅសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ដែលយុវជនទាំង២នាក់ ជាសិស្សសាលារៀនថ្នាក់ទី១០ នៃវិទ្យាល័យប៊ុនរ៉ានី ហ៊ុន សែន វត្តភ្នំ ។ រីឯនារីរងគ្រោះមានឈ្មោះ ហង្ស ផារ៉ាឌី អាយុ២២ឆ្នាំ ជានិស្សិតច្បាប់ឆ្នាំទី៤ និងមានអាជីពជាអ្នកបង្ហាញម៉ូដផងដែរ ស្នាក់នៅភូមិត្នោត ឃុំគគីរ ស្រុកកៀនស្វាយ ខេត្តកណ្តាល ។

មន្ត្រីនគរបាលបានឲ្យដឹងដែរថា កាបូបរបស់ស្ត្រីរងគ្រោះ ត្រូវបានប្រគល់ឲ្យនាងជាម្ចាស់វិញហើយ ក្នុងនោះមានប្រាក់ចំនួន១០ម៉ឺនរៀល និងទូរស័ព្ទដៃ ម៉ាកiPhone5 មួយគ្រឿងមិនមានការបាត់បង់អ្វីទេ ខណៈដែលជនសង្ស័យទាំង២នាក់ ជាសិស្សសាលានិងវត្ថុតាងប្រព្រឹត្តល្មើសត្រូវសមត្ថកិច្ចមូលដ្ឋានបញ្ជូនទៅអធិការដ្ឋាន នគរបាលខណ្ឌចំការមន កសាងសំណុំរឿងឲ្យស្ថាប័នតុលាការចាត់ការបន្តតាមនីតិវិធីនៃច្បាប់ ។

មជ្ឈដ្ឋានប្រជាពលរដ្ឋបាននិយាយពេញៗមាត់ថា ស្ថានភាពសង្គមបច្ចុប្បន្ន ក្នុងស្រទាប់យុវជនជាសិស្សសាលាមួយចំនួនមិនត្រឹមចេះសូកប៉ាន់គ្រូបង្រៀនដើម្បីបានឡើងថ្នាក់នោះទេ គឺពួកគេ ចេះធ្វើបងតូចបងធំ ចេះសេពគ្រឿងញៀន ចេះវាយតប់ និងចេះធ្វើចោរប្លន់-ឆក់ថែមទៀត…។ល។ ដែលទាមទារឲ្យប្រមុខរាជរដ្ឋាភិបាលនិងឪពុកម្តាយ អាណាព្យាបាលសិស្សចាប់អារម្មណ៍គិតគូរ និងមានវិធានការក្នុងរឿងអសកម្មនេះផង៕

368299795_n

562245325_n