រឿងអាស្រូវទំនាស់ដីធ្លីពាក់ព័ន្ធនឹងឧកញ៉ា ជៀម ផែន ថៅកែស្រាបៀរលីអូកប់បាត់ស្ងាត់ឈឹងក្នុងដៃឧបនាយករដ្ឋមន្ត្រី ប៊ិន ឈិន ?
រឿងរ៉ាវទំនាស់ដីធ្លីទំហំ៣៥២ហិកតា ឋិតនៅភូមិកែវផុស ឃុំទំនប់រលក ស្រុកស្ទឹងហាវ ខេត្តព្រះសីហនុ (អតីតឃុំជ្រោយស្វាយ ស្រុកស្រែអំបិល ខេត្តកោះកុង) រវាងក្រុមប្រជាជនចំនួន៤៩គ្រួសារ និងលោកឧកញ៉ា ជៀម ផែន ដែលគេស្គាល់ថាជាថៅកែក្រុមហ៊ុនស្រាបៀរលីអូ (Leo Beer) រ៉ាំរ៉ៃអស់រយៈពេលជិត១០ឆ្នាំ និងនាំឲ្យមានការសម្រេចពីសំណាក់រាជរដ្ឋាភិបាលត្រឡប់ត្រឡិនសាចុះសាឡើង(ម្តងប្រគល់ដីទំនាស់ឲ្យក្រុមប្រជាជន៤៩គ្រួសារ និងម្តងទៀតប្រគល់ដីទំនាស់ឲ្យលោកឧកញ៉ា ជៀម ផែន)ចំនួនជិត១០ដងនោះ ត្រូវបានបញ្ចប់ត្រឹមសម្រេចប្រគល់ដីទំនាស់ទៅឲ្យក្រុមប្រជាជន៤៩គ្រួសារកាន់កាប់ជាកម្មសិទ្ធិ តាមស្មារតីលិខិតលេខ៤៩៦សជណ ចុះថ្ងៃទី១៩ ខែមីនា ឆ្នាំ២០១៣ របស់ទីស្តីការគណៈរដ្ឋមន្ត្រី ។
ទន្ទឹមនឹងរាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន ហៅបុរសខ្លាំងជានាយករដ្ឋមន្ត្រី បិទបញ្ចប់សំណុំរឿងទំនាស់ដីធ្លីដ៏រ៉ាំរ៉ៃនេះ ដោយសម្រេចប្រគល់ដីទំនាស់ឲ្យទៅក្រុមប្រជាជន៤៩គ្រួសារកាន់កាប់ជាកម្មសិទ្ធិតាមស្មារតីលិខិតលេខ៤៩៦សជណ ចុះថ្ងៃទី១៩ ខែមីនា ឆ្នាំ២០១៣ របស់ទីស្តីការគណៈរដ្ឋមន្ត្រីនោះ គឺរាជរដ្ឋាភិបាលបានបង្គាប់ឲ្យឯកឧត្តម ប៊ិន ឈិន ឧបនាយករដ្ឋមន្ត្រី ទទួលបន្ទុកជាប្រធានអាជ្ញាធរជាតិដោះស្រាយទំនាស់ដីធ្លី បើកការស្រាវជ្រាវពីដើមរហូតដល់ចប់ចំពោះភាគីលោក ជៀម ផែន ដើម្បីរកឲ្យឃើញនូវការទទួលខុសត្រូវចំពោះអំពើរបស់គាត់ ដោយការស្រាវជ្រាវនេះត្រូវយករបាយការណ៍របស់ឯកឧត្តម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃធ្វើជាមូលដ្ឋាន ជាពិសេសលិខិតលេខ០៣០របក ចុះថ្ងៃទី១២ ខែមិថុនា ឆ្នាំ២០០៨ របស់ក្រសួងមហាផ្ទៃ ដែលមានចំណារឯកភាពចុះថ្ងៃទី១៧ ខែមិថុនា ឆ្នាំ២០០៨ របស់បុរសខ្លាំងជានាយករដ្ឋមន្ត្រី ។
លិខិតលេខ០៣០របក ចុះថ្ងៃទី១២ ខែមិថុនា ឆ្នាំ២០០៨ របស់ក្រសួងមហាផ្ទៃ ដែលបានធ្វើរបាយការណ៍គោរពរាយការណ៍ជូនបុរសខ្លាំងជានាយករដ្ឋមន្ត្រីនោះ នៅត្រង់ចំណុចទី២ បានបញ្ជាក់ថា "ចំពោះលោក ជៀម ផែន និងបក្ខពួកដែលបានកាប់បំផ្លិចបំផ្លាញផលដំណាំ ទ្រព្យសម្បត្តិរបស់ប្រជាពលរដ្ឋនោះ ទុកលទ្ធភាពជូនប្រជាពលរដ្ឋប្តឹងទៅតុលាការ ដើម្បីទាមទារសំណងវិញ ។ ដោយឡែក បើលោក ជៀម ផែន នៅតែបន្តប្រើប្រាស់លិខិត ឬឯកសារក្លែងក្លាយតទៅទៀត គួរមានវិធានការអនុវត្តន៍តាមច្បាប់ព្រហ្មទណ្ឌ" ។ មានន័យថា ក្រសួងមហាផ្ទៃបានស្រាវជ្រាវរកឃើញលោកឧកញ៉ា ជៀម ផែន បានប្រើប្រាស់លិខិត និងឯកសារក្លែងក្លាយ ដើម្បីប្តឹងដណ្តើមទាមទារយកដីធ្លីពីប្រជាពលរដ្ឋចំនួន៤៩គ្រួសារ ។
ព័ស្តុតាងជាក់ស្តែងបានបង្ហាញថា លោកឧកញ៉ា ជៀម ផែន ថៅកែក្រុមហ៊ុនស្រាបៀរលីអូបានប្រើប្រាស់លិខិត និងឯកសារក្លែងក្លាយដែលក្រសួងមហាផ្ទៃស្រាវជ្រាវរកឃើញនោះ រហូតមកដល់ឆ្នាំ២០១១ ដើម្បីបំភ័ន្តភ្នែក និងខួរក្បាលឯកឧត្តម ប៊ិន ឈិន ឧបនាយករដ្ឋមន្ត្រី ទទួលបន្ទុកជាប្រធានអាជ្ញាធរជាតិដោះស្រាយទំនាស់ដីធ្លី ធ្វើរបាយការណ៍គោរពរាយការណ៍ជូនបុរសខ្លាំងជានាយករដ្ឋមន្ត្រី សម្រេចប្រគល់ដីទំនាស់ឲ្យទៅលោកឧកញ៉ា ជៀម ផែន គ្រប់គ្រងជាកម្មសិទ្ធិ តាមស្មារតីលិខិតលេខ៦៦៩សជណ ចុះថ្ងៃទី០៧ ខែមិថុនា ឆ្នាំ២០១១ របស់ទីស្តីការគណៈរដ្ឋមន្ត្រី (យោងចំណារចុះថ្ងៃទី២៤ ខែឧសភា ឆ្នាំ២០១១ របស់បុរសខ្លាំងនៅលើរបាយការណ៍ចុះថ្ងៃទី១០ ខែឧសភា ឆ្នាំ២០១១ របស់ឯកឧត្តម ប៊ិន ឈិន) ដោយមិនខ្ចីខ្វល់ពិនិត្យពិចារណាលើរបាយការណ៍របស់ឯកឧត្តម ស ខេង ម្តងជាពីរដងទាល់តែសោះ ។
គិតចាប់ពីថ្ងៃដែលរាជរដ្ឋាភិបាលកម្ពុជាបានសម្រេចឲ្យបើកការស្រាវជ្រាវស៊ើបអង្កេតទៅលើអំពើជាកំហុសឆ្គងរបស់លោកឧកញ៉ា ជៀម ផែន ពាក់ព័ន្ធនឹងការប្រើប្រាស់ឯកសារ និងលិខិតក្លែងក្លាយ ដើម្បីរំលោភបំពានយកដីធ្លីប្រជាពលរដ្ឋចំនួន៤៩គ្រួសារ រហូតបង្កឲ្យមានប្រជាពលរដ្ឋខ្លះជាប់គុកច្រវាក់ និងខ្លះទៀតរត់ចោលផ្ទះសម្បែងព្រោះខ្លាចសមត្ថកិច្ចចាប់ខ្លួនតាមដីកាតុលាការនោះ គឺមានរយៈពេលជាង១ឆ្នាំហើយ ប៉ុន្តែបែរជាស្ងាត់ឈឹងដូចចោរលួចសេះ មិនឃើញឯកឧត្តម ប៊ិន ឈិន ចាត់ការអ្វីទេ ដូចទុកឱកាសធ្វើឲ្យលោកឧកញ៉ា ជៀម ផែន ជាអ្នកមានទ្រព្យសម្បត្តិលុយកាក់ បានរួចខ្លួនផុតពីសំណាញ់ច្បាប់កម្ពុជា និងនាំឲ្យការសម្រេចរបស់បុរសខ្លាំងក្លាយជាគ្មានតម្លៃ ។
ប្រភពព័ត៌មានមួយចំនួនពីអ្នកជំនួញនៅកម្ពុជា បានបង្ហើបប្រាប់ឲ្យដឹងថា លោកឧកញ៉ា ជៀម ផែន មានបណ្តាញខ្សែបក្ខពួកជាមន្ត្រីធំនៅទីស្តីការគណៈរដ្ឋមន្ត្រី ទើបអាចក្តីក្តាំមានប្រៀបឈ្នះទៅលើក្រុមប្រជាពលរដ្ឋក្រីក្រចំនួន៤៩គ្រួសារនាពេលកន្លងមកនោះ ហើយដំណើរការស្រាវជ្រាវទៅលើកំហុសឆ្គងរបស់លោកឧកញ៉ា ជៀម ផែន ទំនងជាមិនអាចទៅរួចទេ គឺការសម្រេចរបស់រាជរដ្ឋាភិបាល និងបុរសខ្លាំងជានាយករដ្ឋមន្ត្រីប្រហែលជាអាចមានត្រឹមតែលើក្រដាស ឬបបូរមាត់ប៉ុណ្ណោះ ៕
Source from: www.dtn7.com
Loading...
Post a Comment