តុលាការសម្រេចតម្កល់រឿងទុកឥតចាត់ការលើបណ្តឹងប្រធានសហជីពដែលប្តឹងស្នងការប៉ូលិសខេត្តកំពង់ស្ពឺ
ស្ថាប័នអយ្យការអមសាលាដំបូងខេត្តកំពង់ស្ពឺ ដែលមានលោក កែវ សុធា ជាព្រះរាជអាជ្ញា និងជាចៅក្រមអយ្យការទទួលបន្ទុកសំណុំរឿងព្រហ្មទណ្ឌលេខ៨១ ចុះថ្ងៃទី០៥ ខែកុម្ភៈ ឆ្នាំ២០១៤ របស់អយ្យការអមសាលាដំបូងខេត្តកំពង់ស្ពឺនោះ បានចេញដីកាសម្រេចលេខ១២៧៩ ចុះថ្ងៃទី២៤ ខែមិថុនា ឆ្នាំ២០១៤ ដោយសម្រេចតម្កល់រឿងទុកឥតចាត់ការ នៅលើបណ្តឹងរបស់លោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា ដែលបានប្តឹងលោកឧត្តមសេនីយ៍ កែវ ពិសី ស្នងការនគរបាលខេត្តកំពង់ស្ពឺ និងគូកន ពីបទធ្វើឲ្យខូចខាតដោយចេតនា ប្រព្រឹត្តនៅខេត្តកំពង់ស្ពឺ នាថ្ងៃទី០៣ ខែមិថុនា ឆ្នាំ២០១៣កន្លងមក ខណៈដែលលិខិតជូនដំណឹងអំពីដីកាសម្រេចតម្កល់រឿងទុកឥតចាត់ការរបស់អយ្យការអមសាលាដំបូងខេត្តកំពង់ស្ពឺនោះ លោកមេធាវីតំណាងដោយអាណត្តិ និងការបារក្តីឲ្យលោក ជា មុនី ជាដើមបណ្តឹងរដ្ឋប្បវេណី ទើបតែទទួលបាននៅថ្ងៃទី០៥ ខែសីហា ឆ្នាំ២០១៤នេះប៉ុណ្ណោះ បន្ទាប់ពីលោក ជា មុនី បានដាក់ពាក្យបណ្តឹងនាថ្ងៃទី៣០ ខែកក្កដា ឆ្នាំ២០១៤ គោរពជូនឯកឧត្តមអគ្គព្រះរាជអាជ្ញាអមសាលាឧទ្ធរណ៍សុំអន្តរាគមន៍ទៅលោកព្រះរាជអាជ្ញាអមសាលាដំបូងខេត្តកំពង់ស្ពឺ ឲ្យចាត់ការលើរឿងក្តី ហើយត្រូវបានឯកឧត្តម អ៊ុក សាវុធ អគ្គព្រះរាជអាជ្ញាអមសាលាឧទ្ធរណ៍ធ្វើចំណារចុះថ្ងៃទី៣១ ខែកក្កដា ឆ្នាំ២០១៤ មានខ្លឹមសារថា "បានឃើញ ជូនលោកព្រះរាជអាជ្ញាចាត់ការជាសមត្ថកិច្ច" រួចមក ។
សូមបញ្ជាក់ជូនថា កាលពីថ្ងៃទី២៨ ខែមករា ឆ្នាំ២០១៤ លោក ជា មុនី ប្រធានសហជីពសេរីកម្មករនែព្រះរាជាណាចក្រកម្ពុជា បានដាក់ពាក្យបណ្តឹងមួយច្បាប់គោរពជូនលោកព្រះរាជអាជ្ញាអមសាលាដំបូងខេត្តកំពង់ស្ពឺ ដោយប្តឹងលោកស្នងការនគរបាលខេត្តកំពង់ស្ពឺ និងមន្ត្រីនគរបាលយុត្តិធម៌ពាក់ព័ន្ធឯទៀតពីបទធ្វើឲ្យខូចខាតដោយចេតនា ប្រព្រឹត្តនៅខេត្តកំពង់ស្ពឺនាថ្ងៃទី០៣ ខែមិថុនា ឆ្នាំ២០១៣ បង្កើតបានជាសំណុំរឿងព្រហ្មទណ្ឌលេខ៨១ ចុះថ្ងៃទី០៥ ខែកុម្ភៈ ឆ្នាំ២០១៤ របស់អយ្យការអមសាលាដំបូងខេត្តកំពង់ស្ពឺ ។
ដំណើររឿងហេតុដែលនាំឲ្យលោក ជា មុនី ដាក់ពាក្យប្តឹងលោកស្នងការនគរបាលខេត្តកំពង់ស្ពឺ និងគូកន ពីបទធ្វើឲ្យខូចខាតដោយចេតនានោះ គឺមកពីកាលពីថ្ងៃទី០៣ ខែមិថុនា ឆ្នាំ២០១៣ កងកម្លាំងនគរបាលនៃស្នងការដ្ឋាននគរបាលខេត្តកំពង់ស្ពឺ បានចាប់យករថយន្តរបស់សហជីពសេរីកម្មករនៃព្រះរាជាណាចក្រកម្ពុជាចំនួន១គ្រឿង ម៉ាកតាកូម៉ា ដោយចាត់ទុកជាវត្ថុតាងក្នុងហេតុការណ៍កម្មករ កម្មការិនីរោងចក្រសាប្រ៊ីណា មានទីតាំងឋិតនៅភូមិត្រពាំងឫស្សី ឃុំសំបូរ ស្រុកសំរោងទង ខេត្តកំពង់ស្ពឺ នាំគ្នាធ្វើកូដកម្មទាមទារលក្ខខណ្ឌការងារល្អប្រសើរ ហើយក៏កើតមានអំពើហិង្សាប៉ះទង្គិចគ្នារវាងកងកម្លាំងសមត្ថកិច្ច និងបុគ្គលិកសហជីព ព្រមទាំងកម្មករ កម្មការិនីរោងចក្រ ។ ក្រោយមក ចៅក្រមស៊ើបសួរសាលាដំបូងខេត្តគំពង់ស្ពឺបានចេញដីកាសម្រេចលេខ២៨៤៤ ចុះថ្ងៃទី២៥ ខែវិច្ឆិកា ឆ្នាំ២០១៣ ប្រគល់វត្ថុតាងដែលចាប់យកនោះឲ្យម្ចាស់ដើមវិញ ខណៈដែលសមត្ថកិច្ចនគរបាលក្នុងដំណាក់កាលដំបូងមិនបានបញ្ជូនវត្ថុចាប់យកប្រគល់ឲ្យស្ថាប័នតុលាការភ្លាមៗឡើយ គឺទើបតែនៅថ្ងៃទី០៣ ខែមករា ឆ្នាំ២០១៤ បានសមត្ថកិច្ចនគរបាលធ្វើការប្រគល់វត្ថុចាប់យកមកឲ្យស្ថាប័នតុលាការរក្សាទុក បន្ទាប់ពីបានដឹងថា ចៅក្រមស៊ើបសួរសាលាដំបូងខេត្តកំពង់ស្ពឺសម្រេចប្រគល់វត្ថុដែលចាប់យកឲ្យម្ចាស់ដើមវិញ ហើយក៏ត្រូវបានលោក ជា មុនី ជាម្ចាស់រថយន្តពិនិត្យឃើញថា រថយន្តមានការខូចខាតយ៉ាងច្រើនខុសពីស្ថានភាពដើម មិនអាចទទួលយកបាន ។
ពាក្យបណ្តឹងរបស់លោក ជា មុនី បានទាមទារឲ្យស្ថាប័នតុលាការធ្វើការផ្តន្ទាទោសទៅលើលោកស្នងការនគរបាលខេត្តកំពង់ស្ពឺ និងគូកនពីបទធ្វើឲ្យខូចខាតដោយចេតនាតាមនីតិវិធីនៃច្បាប់ និងឲ្យជនប្រព្រឹត្តរ៉ាប់រងចេញថ្លៃសងការខូចខាតរថយន្តដែលចាប់យកពីសហជីពសេរីកម្មករនៃព្រះរាជាណាចក្រកម្ពុជានោះ ។
ប្រភពព័ត៌មានដែលស្និទ្ធនឹងស្ថាប័នតុលាការខេត្តកំពង់ស្ពឺ បានប្រាប់ឲ្យដឹងថា ក្នុងនាមជាមន្ត្រីរាជការដូចគ្នា ពឹងគ្នាទៅវិញទៅមក ត្រូវតែមានមនោសញ្ចេតនាជួយគ្នា និងម្យ៉ាងទៀត បម្រើការងារឲ្យគណបក្សប្រជាជនកម្ពុជាតែមួយដូចគ្នាផង ដូច្នេះ លោក កែវ សុធា ជាព្រះរាជអាជ្ញាអមសាលាដំបូងខេត្តកំពង់ស្ពឺ ត្រូវតែសម្រេចតម្កល់រឿងទុកឥតចាត់ការ ក្នុងសំណុំរឿងក្តីព្រហ្មទណ្ឌលោក ជា មុនី ប្តឹងប្រឆាំងទៅលើលោកស្នងការនគរបាលខេត្តកំពង់ស្ពឺ និងគូកនអ៊ីចឹងហើយ ។
លោក ជា មុនី ជាដើមបណ្តឹងរដ្ឋប្បវេណី បានមានប្រសាសន៍ប្រាប់គេហទំព័រសារព័ត៌មានដើមត្នោតនារសៀលថ្ងៃទី០៥ ខែសីហា ឆ្នាំ២០១៤នេះថា លោកមិនអាចទទួលយកបានឡើយនូវការសម្រេចតម្កល់រឿងទុកឥតចាត់ការរបស់លោកព្រះរាជអាជ្ញាអមសាលាដំបូងខេត្តកំពង់ស្ពឺ លើពាក្យបណ្តឹងរបស់លោកដែលលោកបានប្តឹងប្រឆាំងនឹងលោកស្នងការនគរបាលខេត្តកំពង់ស្ពឺ និងគូកន ពីបទធ្វើឲ្យខូចខាតដោយចេតនានោះ ហើយលោកនឹងប្តឹងឧទ្ធរណ៍នឹងដីកាសម្រេចតម្កល់រឿងទុកឥតចាត់ការរបស់អយ្យការអមសាលាដំបូងខេត្តកំពង់ស្ពឺនេះ តាមនីតិវិធីនៃច្បាប់ ដើម្បីស្វែងរកយុត្តិធម៌ពិតប្រាកដ ៕
Source from: www.dtn7.com
Loading...
Post a Comment