មជ្ឈដ្ឋានអ្នកច្បាប់និងអ្នកតាមដានកិច្ចកំណែទម្រង់ច្បាប់និងប្រព័ន្ធយុត្តិធម៌នៅកម្ពុជាបានសម្តែងនូវការចាប់អារម្មណ៍យ៉ាងខ្លាំងទៅនឹងមុខតំណែងដ៏សំពីងសំពោងរបស់ឯកឧត្តមជីវកេងប្រធានសាលាដំបូងរាជធានីភ្នំពេញមជ្ឈដ្ឋានអ្នកច្បាប់ និងអ្នកតាមដានកិច្ចកំណែទម្រង់ច្បាប់ និងប្រព័ន្ធយុត្តិធម៌នៅកម្ពុជា បានសម្តែងនូវការចាប់អារម្មណ៍យ៉ាងខ្លាំងទៅនឹងមុខតំណែងដ៏សំពីងសំពោងរបស់ឯកឧត្តម ជីវ កេង ប្រធានសាលាដំបូងរាជធានីភ្នំពេញ ដ៏មានឥទ្ធិពល ខណៈដែលឯកឧត្តមរូបនេះ ដល់អាយុត្រូវចូលនិវត្តន៍ ប៉ុន្តែមិនត្រូវបានដាក់ឲ្យចូលនិវត្តន៍នៅក្នុងក្របខ័ណ្ឌចៅក្រមឡើយ។
ក្រុមអ្នកច្បាប់ឯករាជ្យនៅកម្ពុជា បានលើកឡើងថា ឥទ្ធិពលដ៏មហិមារបស់ឯកឧត្តមជីវ កេង មិនមែនត្រឹមពឹងផ្អែកលើឋានៈជាប្រធានសាលាដំបូងរាជធានីភ្នំពេញតែមួយមុខនោះទេ គឺឯកឧត្តមរូបនេះ ពាក់អាវក្រោះជាទីប្រឹក្សាឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី ជាសមាជិកឧត្តមក្រុមប្រឹក្សានៃអង្គចៅក្រម ជាប្រធានអង្គភាពអធិការកិច្ចនៃក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រម «អ.ក.វ» និងជាសមាជិកក្រុមប្រឹក្សាជាតិប្រឆាំងអំពើពុករលួយទៀតផង។
ឯកឧត្តមជីវ កេង កើតនៅថ្ងៃទី២៨ ខែមីនា ឆ្នាំ១៩៩៥១ នៅស្រុកប្រាសាទសំបូរ ខេត្តកំពង់ធំ។ មានន័យថា ឯកឧត្តមជីវ កេង មានអាយុជិត៦៣ឆ្នាំហើយៗត្រូវដាក់ឲ្យចូលនិវត្តន៍ បើយោងតាមស្មារតីព្រះរាជក្រឹត្យលេខនស/រកត/០៩០៥/៤០៣ ចុះថ្ងៃទី០៣ ខែកញ្ញា ឆ្នាំ២០០៥ ត្រង់មាត្រា១ ដែលបានចែងថា «ត្រូវបានដាក់ឲ្យចូលនិវត្តន៍ចៅក្រម និងព្រះរាជអាជ្ញាដែលមានអាយុចាប់ពី៦០ឆ្នាំឡើងទៅ។»។ ប៉ុន្តែឯកឧត្តមចៅក្រមរូបនេះ មិនត្រូវបានដាក់ឲ្យចូលនិវត្តន៍ទេ គឺត្រូវបានអនុញ្ញាតឲ្យនៅបន្តបម្រើការងារតទៅទៀត ដោយព្រះរាជក្រឹត្យលេខនស/រកត/០៧១១/៦៩៤ ចុះថ្ងៃទី២៥ ខែកក្កដា ឆ្នាំ២០១១ «គ្មានចែងអំពីការកំណត់ពេលវេលាឲ្យនៅបន្តបម្រើការងារតទៅទៀតទេ»។
លើសពីនេះ ឯកឧត្តម ជីវ កេង ត្រូវបានតែងតាំងឲ្យធ្វើជាប្រធានសាលាដំបូងរាជធានីភ្នំពេញ ដោយព្រះរាជក្រឹត្យលេខនស/រកត/១០០៥/៤១៧ ចុះថ្ងៃទី០៧ ខែតុលា ឆ្នាំ២០០៥ ពោលគឺមកទល់បច្ចុប្បន្នមានរយៈពេលចំនួន៨ឆ្នាំហើយ ប៉ុន្តែមិនត្រូវបានផ្លាស់ប្តូរប៉ុស្តិ៍ធ្វើការទៅកន្លែងផ្សេងតាមរបៀបវិលជុំដូចចៅក្រមបម្រើការងារក្នុងសាលាជម្រះក្តីដទៃទៀតនោះទេ។
កាលពីថ្ងៃទី០៨ ខែតុលា ឆ្នាំ២០១២កន្លងទៅនេះ ឯកឧត្តមជីវ កេង ដែលមានមុខងារក្នុងក្របខ័ណ្ឌជាចៅក្រម ត្រូវបានគណៈមេធាវីនៃព្រះរាជាណាចក្រកម្ពុជាសម្រេចអនុញ្ញាតឲ្យធ្វើសច្ចាប្រណិធានចូលប្រកបវិជ្ជាជីវៈជាមេធាវីដែលមានអត្តលេខ៨៤៨។ ពោលគឺឯកឧត្តមរូបនេះមានឈ្មោះជាមេធាវី តែដោយសារមានវិសមិតភាពការងារទើបឯកឧត្តមជីវ កេង សុំឋិតនៅជាមេធាវីសុំមិនប្រកបវិជ្ជាជីវៈមេធាវីវិញ។
ក្រៅអំពីការងារក្នុងក្របខ័ណ្ឌគណបក្សប្រជាជនកម្ពុជា ចុះជួយពង្រឹងនៅស្រុកគិរីរង់ ខេត្តតាកែវ ដង្ហែតាមឯកឧត្តមបណ្ឌិតសភាចារ្យ សុខ អាន នោះ ឯកឧត្តមបណ្ឌិតជីវ កេង «ទទួលបានសញ្ញាបត្របណ្ឌិតពីសាលាចំរើនពហុបច្ចេកវិជ្ជា-CUP» បាននឹងកំពុងកាន់កាប់តួនាទីមុខតំណែងដ៏ច្រើនគគោកដូចខាងក្រោម៖
១- ប្រធានសាលាដំបូងរាជធានីភ្នំពេញ «មានរយៈពេល៨ឆ្នាំហើយ»។
២- ទីប្រឹក្សាឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី មានឋានៈស្មើរដ្ឋមន្ត្រី។
៣- ប្រធានអង្គភាពអធិការកិច្ចនៃក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រម «អ.ក.វ»។
៤- សមាជិកឧត្តមក្រុមប្រឹក្សានៃអង្គចៅក្រម «ក្រោមរូបភាពចាត់តាំង» មានរយៈពេល៦ឆ្នាំមកហើយ។
៥- សមាជិកក្រុមប្រឹក្សាជាតិប្រឆាំងអំពើពុករលួយ មានឋានៈស្មើរដ្ឋមន្ត្រី។
៦- សមាជិកក្រុមប្រឹក្សាកំណែទម្រង់ច្បាប់ និងប្រព័ន្ធយុត្តិធម៌។
៧- សមាជិកក្រុមប្រឹក្សាភិបាលនៃរាជបណ្ឌិត្យសភាវិជ្ជាជីវៈតុលាការ។
៨- សមាជិកគណៈមេធាវីនៃព្រះរាជាណាចក្រកម្ពុជា មានអត្តលេខ៨៤៨។
មន្ត្រីក្របខ័ណ្ឌចៅក្រមភាគច្រើនឬសឹងតែទាំងអស់ដែលកំពុងបំពេញការងារតាមសាលាជម្រះក្តីតែងមានអារម្មណ៍ខ្លបខ្លាចនឹងអំណាចដ៏មហិមារបស់ឯកឧត្តម ជីវ កេង សម្បើមណាស់ ដ្បិតឯកឧត្តមរូបនេះមានឋានៈជាទីប្រឹក្សាឯកឧត្តមបណ្ឌិតសភាចារ្យ សុខ អាន ផង ជាសមាជិកឧត្តមក្រុមប្រឹក្សានៃអង្គចៅក្រមផង ជាប្រធានអង្គភាពអធិការកិច្ច «អ.ក.វ» ផង និងជាសមាជិកក្រុមប្រឹក្សាជាតិប្រឆាំងអំពើពុករលួយផង សឹងមានមហិទ្ធិឫទ្ធិខ្លាំងជាងព្រះនារាយណ៍ទៅទៀត។
រួមសេចក្តីមក ឯកឧត្តមជីវ កេង គឺជាកំពូលមន្ត្រីក្របខ័ណ្ឌចៅក្រមតែម្នាក់គត់ដែលមានឋានៈតួនាទីច្រើនគគោក និងសំពីងសំពោង ព្រមទាំងមានអំណាចខ្លាំងលើសលប់ក្នុងស្ថាប័នតុលាការកម្ពុជា ដែលឋិតនៅក្រោមរូបភាព «ជាអាជ្ញាកណ្តាលផ្លុំកញ្ចែផង និងជាកីឡាករផង»។
សូមសម្តេចអគ្គមហាសេនាបតីតេជោ នាយឧត្តមសេនីយ៍ផុតលេខផ្កាយមាស៥ បណ្ឌិតសភាចារ្យ មេធាវី ហ៊ុន សែន មេត្តាត្រួតពិនិត្យមើលក្នុងករណីនេះផង ពីព្រោះអាចជាបច្ច័យអាក្រក់បំផុតដែលធ្វើឲ្យនយោបាយកំណែទម្រង់ច្បាប់ និងប្រព័ន្ធយុត្តិធម៌ ព្រមទាំងតុលាការរបស់សម្តេចអាចទទួលរងនូវភាពបរាជ័យ៕
Source from: www.dtn7.com
Loading...
Post a Comment