នាអាណត្តិទី៤កន្លងមកប្រមុខរាជរដ្ឋាភិបាលគឺសម្តេចអគ្កមហាសេនាបតីតេជោហ៊ុនសែនបានក្រាបបង្គំទូលថ្វាយព្រះមហាក្សត្រឲ្យមានការត្រាស់បង្គាប់ចេញព្រះរាជក្រឹត្យតែងតាំងអភិបាលនៃគណៈអភិបាលរាជធានី-ខេត្តទាំង២៤ធ្វើជាទីប្រឹក្សាផ្ទាល់របស់ខ្លួនជានាយករដ្ឋមន្ត្រីនាអាណត្តិទី៤កន្លងមក ប្រមុខរាជរដ្ឋាភិបាល គឺសម្តេចអគ្កមហាសេនាបតីតេជោ ហ៊ុន សែន បានក្រាបបង្គំទូលថ្វាយព្រះមហាក្សត្រឲ្យមានការត្រាស់បង្គាប់ចេញព្រះរាជក្រឹត្យតែងតាំងអភិបាលនៃគណៈអភិបាលរាជធានី-ខេត្តទាំង២៤ ធ្វើជាទីប្រឹក្សាផ្ទាល់របស់ខ្លួនជានាយករដ្ឋមន្ត្រី មានឋានៈស្មើរដ្ឋមន្ត្រីគ្រប់ៗគ្នា ។
លើសពីនេះមានអភិបាលរងរាជធានី-ខេត្តមួយចំនួន ក៏ត្រូវបានតែងតាំងឲ្យធ្វើជាទីប្រឹក្សាផ្ទាល់នាយករដ្ឋមន្ត្រីផងដែរ ដែលមានឋានៈស្មើរដ្ឋលេខាធិការ ។
អនុលោមតាមច្បាប់ស្តីពីការបង្កើតក្រសួងមហាផ្ទៃ និងអនុក្រឹត្យស្តីពីការរៀបចំនិងការប្រព្រឹត្តទៅនៃក្រសួងមហាផ្ទៃ គឺអភិបាលនៃគណៈអភិបាលរាជធានី-ខេត្ត ទាំង២៤ត្រូវឋិតនៅក្រោមខ្សែបណ្តោយគ្រប់គ្រងផ្ទាល់របស់ក្រសួងមហាផ្ទៃ ។ ក្នុងករណីមានភាពមិនប្រក្រតីឬមានពាក្យបណ្តឹងទាក់ទងនឹងភាពអសកម្មលើការបំពេញមុខងាររបស់អភិបាលនៃគណៈអភិបាលរាជធានី-ខេត្តណាមួយនោះ គឺក្រសួងមហាផ្ទៃ អាចចាត់ឲ្យមន្ត្រីនៃអគ្គាធិការដ្ឋានកិច្ចការនយោបាយ រដ្ឋបាល និងនគរបាលក្រសួងចុះធ្វើអធិការកិច្ចស៊ើបអង្កេត ។
ដោយអភិបាលនៃគណៈអភិបាលរាជធានី-ខេត្តទាំង២៤ ត្រូវបានតែងតាំងឲ្យធ្វើជាទីប្រឹក្សាផ្ទាល់នាយករដ្ឋមន្ត្រី មានឋានៈស្មើរដ្ឋមន្ត្រីនោះ គឺបានបង្ហាញឲ្យឃើញថា អភិបាលនៃគណៈអភិបាលរាជធានី-ខេត្ត មានឋានៈធំជាងអគ្គាធិការនៃអគ្គាធិការដ្ឋានកិច្ចការនយោបាយ រដ្ឋបាល និងនគរបាលក្រសួងមហាផ្ទៃ ដែលចុះស៊ើបអង្កេតលើខ្លួនទៅទៀត ។ មានន័យថា អ្នកស៊ើបអង្កេត គេមានឋានៈតូចជាងអ្នកដែលត្រូវគេស៊ើបអង្កេត ដែលជាបច្ច័យអាក្រក់បំផុតនៅក្នុងដំណើរការស៊ើបអង្កេត ។ ឬអាចនិយាយបានទៀតថា អភិបាលនៃគណៈអភិបាលរាជធានី-ខេត្ត ទាំង២៤ ដែលបានធ្វើជាទីប្រឹក្សាផ្ទាល់នាយករដ្ឋមន្ត្រីនោះ មានឋានៈធំជាងរដ្ឋលេខាធិការក្រសួងមហាផ្ទៃ ដែលជាសមាជិករាជរដ្ឋាភិបាល ។
មជ្ឈដ្ឋានអ្នកវិភាគផ្នែកច្បាប់និងព្រឹត្តិការណ៍នយោបាយនៅកម្ពុជា បានលើកឡើងថា ការតែងតាំងចៅហ្វាយខេត្ត-រាជធានី ឲ្យធ្វើជាទីប្រឹក្សានាយករដ្ឋមន្ត្រីមានឋានៈស្មើរដ្ឋមន្ត្រីនោះ គឺធ្វើឲ្យមានភាពប្រទាំងប្រទើស ឬច្របូកច្របល់ ក្នុងប្រព័ន្ធគ្រប់គ្រងរបស់ក្រសួងមហាផ្ទៃទៅលើមូលដ្ឋានខេត្ត-រាជធានី ដែលជាខ្សែបណ្តោយរបស់ក្រសួងមហាផ្ទៃ ។
ក្រមអ្នករិះគន់មាត់ដាចខ្លះបាននិយាយថា ការតែងតាំងចៅហ្វាយខេត្ត-រាជធានី ឲ្យធ្វើជាទីប្រឹក្សានាយករដ្ឋមន្ត្រីមានឋានៈស្មើរដ្ឋមន្ត្រីគ្រប់ៗគ្នា គឺសម្តេចអគ្គមហាសេនាបតីតេជោ ហ៊ុន សែន ចង់ពង្រឹងនិងពង្រីកអំណាចផ្ទាល់របស់សម្តេចតាមវិធីសាស្ត្រ«កាត់ដៃកាត់ជើង» ឬ «បន្ថយអំណាច » របស់ឯកឧត្តម ស ខេង ដែលជាឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ។
ឈានចូលមកដល់អាណត្តិទី៥នេះ តាមការកត់សម្គាលជាបឋមបានបង្ហាញថា មិនទាន់ឃើញមានការតែងតាំងចៅហ្វាយខេត្ត-រាជធានី ឲ្យធ្វើជាទីប្រឹក្សានាយករដ្ឋមន្ត្រីដូចអាណត្តិទី៤នៅឡើយទេ ដែលធ្វើឲ្យមជ្ឈដ្ឋាននានាមានការចាប់អារម្មណ៍ពោរពេញទៅដោយការអបអរសាទរ ។
អ្នកវិភាគនយោបាយឯករាជ្យនៅកម្ពុជា បានលើកឡើងថា ដើម្បីធ្វើឲ្យមានអភិបាលកិច្ចល្អក្នុងប្រព័ន្ធគ្រប់គ្រង គឺប្រមុខរាជរដ្ឋាភិបាលគួរតែបញ្ឈប់ការតែងតាំងអភិបាលនៃគណៈអភិបាលរាជធានី-ខេត្តឲ្យធ្វើជាទីប្រឹក្សារបស់ខ្លួនចាប់ពីពេលនេះតទៅ បើពុំនោះសោតទេដំណើរការកែទម្រង់នឹងបរាជ័យ ហើយប្រព័ន្ធគ្រប់គ្រងរបស់ក្រសួងមហាផ្ទៃនឹងបន្តច្របូកច្របល់ជាក់ជាមិនខាន ៕
Source from: www.dtn7.com
Loading...
Post a Comment