សមត្ថកិច្ច​កំណត់​មុខសញ្ញា​ថា ជនសង្ស័យ​អាយុ​១៦​ឆ្នាំ បាញ់សម្លាប់​ឪពុក​ហើយ​រំលោភ​កូនស្រី​អាយុ​១៤​ឆ្នាំ​នៅ​បន្ទាយមានជ័យ​

10/27/2013 12:55:00 PM

ក្មេងប្រុសស្ទាវចិត្តស្លុយម្នាក់បានប្រព្រឹត្តអំពើឃោរឃៅមួយគឺបានបាញ់សម្លាប់បុរស់ម្នាក់និងបានរំលោភក្មេងស្រីជាកូនរបស់ជនរងគ្រោះកាលពីវេលាម៉ោងប្រមាណ១រំលងអធ្រាត្រឈានចូលព្រឹកថ្ងៃទី២៤ខែតុលាឆ្នាំ២០១៣នៅចំណុចអូរថៅកែយ៉ភូមិអូរអំពិលឃុំទួលពង្រស្រុកម៉ាឡៃ

ក្មេងប្រុសស្ទាវចិត្តស្លុយម្នាក់បានប្រព្រឹត្តអំពើឃោរឃៅមួយគឺបានបាញ់សម្លាប់បុរស់ម្នាក់និងបានរំលោភក្មេងស្រីជាកូនរបស់ជនរងគ្រោះកាលពីវេលាម៉ោងប្រមាណ១រំលងអធ្រាត្រឈានចូលព្រឹកថ្ងៃទី២៤ ខែតុលា ឆ្នាំ២០១៣ នៅចំណុចអូរថៅកែយ៉ ភូមិអូរអំពិល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ រួចហើយជនសង្ស័យរត់គេចខ្លួនបាត់។

ជនរងគ្រោះដែលស្លាប់បាត់បង់ជីវិតក្នុងហេតុការណ៍បាញ់សម្លាប់យ៉ាងឃោរឃៅនោះ មានឈ្មោះ នេត សល់ អាយុ៤៣ឆ្នាំ មានទីលំនៅភូមិចម្ការចេក ឃុំរហាត់ទឹក ស្រុកមង្គលបុរី ខេត្តបន្ទាយមានជ័យ ដោយបាននាំកូនស្រីរបស់ខ្លួនចំនួន២នាក់ កូនស្រីបង អាយុ១៤ឆ្នាំ កូនស្រីប្អូនអាយុ១០ឆ្នាំ មកដេកចាំចម្ការនៅចំណុចកើតហេតុ ហើយក្មេងស្រីដែលទទួលរងាការំលោភបានសម្រេចនោះគឺជាកូនស្រីបងឈ្មោះ ន.រ.ស។

ក្មេងស្រីរងគ្រោះបានរៀបរាប់ប្រាប់សមត្ថកិច្ចថា នៅវេលាព្រឹកមុនពេលកើតហេតុ ជនសង្ស័យបានជូនជនរងគ្រោះពីខ្ទមចាំចម្ការរបស់ខ្លួនមកខ្ទមចាំចម្ការរបស់ជនរងគ្រោះ។

បន្ទាប់មកជនសង្ស័យបានយកកាំភ្លើងមួយដើមចាកចេញទៅដើរបាញ់សត្វ លុះត្រឡប់មកវិញក៏នាំគ្នាហូបបាយពេលល្ងាចតាមធម្មតា។ ពេលយប់ជនរងគ្រោះបានអង្គុយជក់កញ្ឆា និងនិយាយជជែកគ្នាលេងជាមួយជនសង្ស័យ ចំណែកក្មេងស្រីទាំងពីរជាកូនជនរងគ្រោះដេកនៅលើគ្រែក្នុងខ្ទម។

ក្មេងស្រីរងគ្រោះបានរៀបរាប់ឲ្យដឹងទៀតថា ពេលនាងភ្ញាក់ឡើងឃើញជនសង្ស័យមកដេកឱប និងចាប់រំលោភនាងបានសម្រេចរួចទៅហើយៗនាងក៏បានស្រែកឲ្យឪពុកជួយ តែក្រឡេកទៅមើលក្នុងអង្រឹងឃើញឪពុកនាងត្រូវជនសង្ស័យបាញ់ស្លាប់បាត់មិនដឹងតាំងពីពេលណា។ លុះដល់ព្រឹកឡើងជនសង្ស័យក៏បាននាំក្មេងស្រីរងគ្រោះឲ្យទៅហៅអ៊ុំប្រុសម្នាក់នៅចាំចម្ការក្បែរនោះឲ្យមកទទួលសពឪពុកនាង។ រីឯជនសង្ស័យបានរត់គេចខ្លួនបាត់ដោយយកទាំងកាំភ្លើងទៅជាមួយផង។

ការត្រួតពិនិត្យសាកសពត្រូវបានសមត្ថកិច្ចវាយតម្លៃថា ជនរងគ្រោះត្រូវបានជនសង្ស័យបាញ់ចំក្បាលមួយគ្រាប់ពីខាងក្រោយធ្លាយមកមុខ ដោយបន្សល់ទុកនូវសម្បកគ្រាប់ចំនួន១គ្រាប់នៅក្បែរកន្លែងកើតហេតុ។

ប្រភពព័ត៌មានពីនគរបាលស្រុកមាឡៃបានឲ្យដឹងថា ជនសង្ស័យត្រូវបានសមត្ថកិច្ចកំណត់មុខសញ្ញាបានហើយ គឺឈ្មោះ សន នី ភេទប្រុស អាយុ១៦ឆ្នាំ ដែលជាមនុស្សធ្លាប់រាប់អានគ្នាជាមួយជនរងគ្រោះ។

ឥឡូវសមត្ថកិច្ចកំពុងពង្រាយកម្លាំងហ៊ុំព័ទ្ធព្រៃនៅក្បែរកន្លែងកើតហេតុ ដើម្បីស្វែងរកចាប់ខ្លួនជនសង្ស័យ ដោយសមត្ថកិច្ចសន្និដ្ឋានថា ជនសង្ស័យកំពុងសម្ងំលាក់ខ្លួននៅក្នុងព្រៃនោះនៅឡើយ មិនទាន់ធ្វើដំណើរទៅទីណាឆ្ងាយទេ៕