ទាហាន​ជប៉ុន​ជាង​៣​ម៉ឺន​នាក់​ត្រៀម​ធ្វើ​សមយុទ្ធ​នៅ​ខែវិច្ឆិកា ដើម្បី​បង្កើន​សមត្ថភាព​ធ្វើសង្គ្រាម​ក្នុងករណី​មានការ​វាយប្រហារ​

10/27/2013 12:55:00 PM

រាជរដ្ឋាភិបាលជប៉ុនបានប្រកាសកាលពីថ្ងៃទី២៤ ខែតុលា ឆ្នាំ២០១៣ ម្សិលមិញនេះថា ជប៉ុនមានគម្រោងធ្វើសមយុទ្ធយោធាទ្រង់ទ្រាយធំមួយដោយមានការចូលរួមពីកម្លាំងទាហានជើងអាកាស ទាហានជើងគោក និងទាហានជើងទឹក ចំនួន៣៤.០០០នាក់ នៅដើមខែវិច្ឆិកា ឆ្នាំ២០១៣ ខាងមុខ ដើម្បីការពារដែនសមុទ្រ និងប្រជុំកោះកំពុងមានវិវាទ ។

អ្នកនាំពាក្យក្រសួងការពារជាតិជប៉ុនបានឲ្យដឹងថា សមយុទ្ធនឹងមានរយៈពេលជាង២សប្តាហ៍ ដោយចាប់ផ្តើម ពីថ្ងៃទី០១ ដល់ ថ្ងៃទី១៨ ខែវិច្ឆិកា ឆ្នាំ២០១៣ ដែលកម្លាំងទាហានជើងទឹកវាយឡើងលើគោក នឹងសម្រុកវាយឡើងលើកោះ អូគីដាយជីម៉ា មានចម្ងាយប្រមាណ៤០០គីឡូម៉ែត្រពីកោះ អូគីណាវ៉ា ។ យន្តហោះចម្បាំងF2 និងនាវាចម្បាំង នឹងត្រូវបានយកមកប្រើប្រាស់ក្នុងសមយុទ្ធនេះ ដោយធ្វើការបាញ់គ្រាប់ពិតទៅលើគោលដៅដែលបានគ្រោងទុក ។

មន្ត្រីជាន់ខ្ពស់ក្រសួងការពារជាតិជប៉ុន បានធ្វើការបញ្ជាក់ថា ការធ្វើសមយុទ្ធយោធាទ្រង់ទ្រាយធំនៅខែវិច្ឆិកា ខាងមុខនេះ ក្នុងគោលដៅរក្សានិងបង្កើនសមត្ថភាពធ្វើសង្គ្រាមរបស់កម្លាំងទាហានការពារជប៉ុន ក្នុងករណីមានការវាយប្រហារជាយថាហេតុណាមួយ ។

សូមរម្លឹកជូនថា កាលពីអំឡុងឆ្នាំ២០១១ ជប៉ុនក៏ធ្លាប់បានធ្វើសមយុទ្ធយោធាជាទ្រង់ទ្រាយធំ រួចម្តងមកហើយ ដោយមានកងកម្លាំងទាហានចូលរួមរហូតដល់ទៅ៣៥.០០០នាក់ ប៉ុន្តែសមយុទ្ធយោធានាពេលនោះមិនមានសភាពតានតឹងជាមួយប្រទេសចិនក្នុងរឿងអធិបតេយ្យភាពនិងបូរណភាពដែនកោះឡើយ ។

ទំនាក់ទំនងរវាងទីក្រុងតូក្យូ និងទីក្រុងប៉េកាំងបានប្រឈមមុខដាក់គ្នាយ៉ាងតឹងតែងចាប់តាំងពីខែកញ្ញា ឆ្នាំ២០១២ បន្ទាប់ពីជប៉ុន បានប្រកាសដាក់បញ្ចូលកោះមួយចំនួនឲ្យឋិតនៅក្រោមការគ្រប់គ្រងរបស់រដ្ឋ ជាហេតុធ្វើឲ្យចិនសម្តែងនូវការខឹងសម្បា ដោយចិនតែងបញ្ជូននាវាចម្បាំង នាវាល្បាត និងយន្តហោះចម្បាំង ប្រតិបត្តិការចូលទៅកាន់តំបន់ដែនកោះដែលមានវិវាទ ។

ក្រោយចូលកាន់អំណាចកាលពីចុងឆ្នាំ២០១២ ភ្លាម ឯកឧត្តម Shinzo Abe នាយករដ្ឋមន្ត្រីជប៉ុន បានបង្ហាញនូវជំហរយ៉ាងម៉ឺងម៉ាត់ថា នឹងប្តេជ្ញាមិនបន្ធូរបន្ថយដាច់ខាតក្នុងរឿងវិវាទអធិបតេយ្យភាពនិងបូរណភាពដែនកោះនោះឡើយ ។

ជប៉ុនមានវិវាទអធិបតេយ្យភាពនិងបូរណភាពដែនកោះ មិនត្រឹមតែជាមួយប្រទេសចិនប៉ុណ្ណោះទេ គឺជាមួយប្រទេសកូរ៉េខាងត្បួងថែមទៀតនៅជុំវិញប្រជុំកោះ ដែលកូរ៉េខាងត្បួងហៅថា កោះដុកដូ និងជប៉ុនហៅថា កោះតាកេះទីម៉ា ខណៈដែលកោះនេះបច្ចុប្បន្ន ត្រូវបានកូរ៉េខាងត្បួងកំពុងគ្រប់គ្រង ។

សក្ខីភាពនៃការប្តេជ្ញាចិត្តការពារអធិបតេយ្យភាពនិងបូរណភាពទឹកដីរបស់ជប៉ុននេះ ឯកឧត្តមនាយករដ្ឋមន្ត្រីជប៉ុន បានសម្រេចចំណាយថវិការហូតដល់ទៅ៥២ពាន់លានដុល្លារអាមេរិក ដើម្បីពង្រឹងនិងអភិវឌ្ឍន៍វិស័យយោធាឲ្យរឹតតែទំនើប ។

ស្ថានភាពតានតឹងរវាងប្រទេសមហាអំណាចចិន និងជប៉ុននៅតំបន់អាស៊ី បានជំរុញឲ្យតំបន់ទាំងមូលធ្លាក់ទៅក្នុងដំណាក់កាលនៃការប្រកួតប្រជែងរត់ប្រណាំងសព្វាវុធយ៉ាងស្វិតស្វាញ ងហើយដែលប្រទេសជាច្រើនមានការព្រួយបារម្ភថា ខ្លាចមានការផ្ទុះអាវុធនៅពេលអនាគតប្រសិនបើគ្មានដំណោះស្រាយដោយសន្តិវិធីសមស្រប ៕