ខេត្តបន្ទាយមានជ័យ៖យុវជនដៃឆៅម្នាក់បានកាប់ម្តាយមីងបណ្តាលឲ្យរងរបួសសុះសាច់ហើយក្មួយប្រុសអាយុមួយខួបក៏ត្រូវបានកាប់ចិញ្ច្រាំជាច្រើនកាំបិតបណ្តាលឲ្យស្លាប់ ខេត្តបន្ទាយមានជ័យ ៖ យុវជនដៃឆៅម្នាក់បានកាប់ម្តាយមីង បណ្តាលឲ្យរងរបួសសុះសាច់ ហើយក្មួយប្រុស អាយុមួយខួប ក៏ត្រូវបានកាប់ចិញ្ច្រាំជាច្រើនកាំបិត បណ្តាលឲ្យស្លាប់ ក្នុងថ្លុកឈាម កាលពីវេលាម៉ោង៦ ល្ងាចព្រលប់ថ្ងៃទី១០ ខែវិច្ឆិកា ឆ្នាំ២០១៣នៅភូមិគោកលុន ឃុំជប់វ៉ារី ស្រុកព្រះនេតព្រះ ខេត្តបន្ទាយមានជ័យ ក៏ត្រូវសមត្ថកិច្ចឃាត់ខ្លួន ដើម្បីកសាងសំណុំរឿង បញ្ជូនទៅតុលាការ។
ជនសង្ស័យមានឈ្មោះ មិល ឆេង ភេទប្រុស អាយុ ២៨ឆ្នាំ រីឯជនរងគ្រោះឈ្មោះ ច្រឹប សាន្ត ភេទស្រី អាយុ ៥៤ឆ្នាំ ជាម្តាយមីងរបស់ជនសង្ស័យ និងឈ្មោះ ណាង យូកូ ភេទប្រុស អាយុ ១ ខួបត្រូវជាក្មួយ ជនល្មើស សព្វថ្ងៃរស់នៅក្នុងភូមិឃុំកើត ហេតុខាងលើ ។ ប្រជាពលរដ្ឋបានសំដែង ក្តីរន្ធត់គ្រប់ៗគ្នា ចំពោះហេតុការណ៍ កាប់សម្លាប់មនុស្ស ដោយមិនញញើតដៃ។
មុនពេលកើតហេតុជនឈ្មោះ មិល ឆេង បានកាន់កាំបិតប៉័ងតោដើរកាប់នេះកាប់នោះ រួចបានកាប់កុមាររងគ្រោះ ណាង យូកូ ជាច្រើនកាំបិត បណ្តាលឲ្យស្លាប់ភ្លាមៗក្នុងថ្លុកឈាម ឃើញដូច្នោះ ស្ត្រីឈ្មោះ ច្រឹប សាន្ត ត្រូវជាម្តាយមីងបានរត់ទៅឃាត់ ស្រាប់តែត្រូវជនសង្ស័យ កាប់ជាច្រើនកាំបិត បណ្តាលឲ្យរបួសសុះសាច់ ត្រូវបានសាច់ញាតិ បញ្ជូនទៅសង្គ្រោះនៅមន្ទីរពេទ្យ។
ក្រោយមកជនសង្ស័យ ទំនងជាភ័យរន្ធត់ខ្លាំងពេក ក៏បានកាប់ខ្លួនឯងជាច្រើនកាំបិត ហើយមានមតិមួយ ចំនួនបាននិយាយថា ជនសង្ស័យ មិល ឆេង មានជម្ងឺវិកលចរិត ។ យ៉ាងណាក៏ដោយក្រោយពេលបង្កហេតុរួច ជនសង្ស័យត្រូវបានសមត្ថកិច្ចមូលដ្ឋានឃាត់ខ្លួន និងបញ្ជូនបន្តទៅអធិការដ្ឋាន នគរបាលស្រុកព្រះនេត្រព្រះ ដើម្បីចាត់ការតាមនីតិវិធី ៕
Source from: watphnom-news.com
Loading...
Post a Comment