តាមការប្រកាសជូនដំណឹងនៅថ្ងៃទី១៣ ខែធ្នូ ឆ្នាំ២០១៣នេះ បានឲ្យដឹងថា ក្រុមយុវជន យុវតីខ្មែរមកពីគ្រប់និន្នាការ រួមទាំងអតិថិជនអ្នកប្រើប្រាស់ទូរស័ព្ទ ដែលភាគច្រើនជាអ្នកលេង Facebok គ្រោងនឹងធ្វើការជួបជុំគ្នាតវ៉ាប្រឆាំងនឹងប្រកាសអន្តរក្រសួងលេខ២៣២សហវ.បទ ចុះថ្ងៃទី០៧ ខែធ្នូ ឆ្នាំ២០០៩ ស្តីពីការកំណត់ថ្លៃអប្បបរមានៃសេវាទូរស័ព្ទចល័ត អចល័ត និងថ្លៃតភ្ជាប់បណ្តាញ នៅថ្ងៃស្អែកទី១៤ ខែធ្នូ ឆ្នាំ២០១៣ វេលាម៉ោង០៨ព្រឹក នៅរមណីយដ្ឋានវត្តភ្នំ ដើម្បីទាមទារឲ្យរាជរដ្ឋាភិបាល តាមរយៈក្រសួងប្រៃសណីយ៍និងទូរគមនាគមន៍ "MPTC" បញ្ឈប់ការលូកដៃចូលទៅក្នុងការប្រកបមុខរបរជំនួញរបស់ក្រុមហ៊ុនទូរស័ព្ទឯកជន ក្នុងក្របខ័ណ្ឌទីផ្សារសេរី ដែលនាំឲ្យមានការប៉ះពាល់ដល់ជីវភាពរស់នៅរបស់ប្រជារាស្ត្រ ។
ក្រុមយុវជន និងអតិថិជនទូរស័ព្ទទាំងនោះ បានប្រកាសតាមបណ្តាញសង្គម Facebook ដ៏ពេញនិយមនៅកម្ពុជា "ដើម្បីការពារផលប្រយោជន៍របស់យើងទាំងអស់គ្នា សូមបងប្អូនមេត្តាចូលរួមឲ្យបានច្រើនកុះករ" ។
សូមបញ្ជាក់ជូនថា កាលពីថ្ងៃទី១២ ខែធ្នូ ឆ្នាំ២០១៣ម្សិលមិញនេះ ក្រុមយុវជនបានប្រកាសជូនដំណឹងតាមបណ្តាញសង្គម Facebook ថា ក្នុងករណីរាជរដ្ឋាភិបាលគ្មានការដោះស្រាយសមស្របលើការកំណត់ថ្លៃអប្បបរមានៃសេវាទូរស័ព្ទចល័ត អចល័តពេលនោះ គឺក្រុមយុវជននឹងធ្វើការជួបជុំគ្នាតវ៉ាប្រឆាំងប្រកាសអន្តរក្រសួងលេខ២៣២ លុះត្រាតែមានដំណោះស្រាយសមស្របអាចទទួលយកបាន ។
ប្រតិកម្មបានកើតមានយ៉ាងខ្លាំងក្លាពីមជ្ឈដ្ឋានអតិថិជនអ្នកប្រើប្រាស់ទូរស័ព្ទ ជាពិសេសក្រុមយុវជនអ្នកលេង Facebook ដែលពួកគេធ្លាប់ទទួលបានផលប្រយោជន៍ពីការគិតតម្លៃសេវាទូរស័ព្ទថោកសមល្មម ផ្តល់ដោយក្រុមហ៊ុនទូរស័ព្ទ Smart បន្ទាប់ពីរាជរដ្ឋាភិបាលបានសម្រេចតាមស្មារតីលិខិតលេខ១៨៨៨សជណ ចុះថ្ងៃទី២១ ខែវិច្ឆិកា ឆ្នាំ២០១៣ របស់ទីស្តីការគណៈរដ្ឋមន្ត្រី បង្គាប់ឲ្យរដ្ឋមន្ត្រីក្រសួង MPTC និងក្រសួងសេដ្ឋកិច្ចនិងហិរញ្ញវត្ថុ "MEF" បន្តអនុវត្តន៍ឲ្យបានម៉ឺងម៉ាត់ដាច់ខាតនូវប្រកាសអន្តរក្រសួងលេខ២៣២សហវ.បទ ចុះថ្ងៃទី០៧ ខែធ្នូ ឆ្នាំ២០០៩ រវាងក្រសួង MPTC និងក្រសួង MEF ស្តីពីការកំណត់ថ្លៃអប្បបរមានៃសេវាទូរស័ព្ទចល័ត អចល័ត និងថ្លៃតភ្ជាប់បណ្តាញ ដោយរាជរដ្ឋាភិបាលអះអាងថា ដើម្បីបង្កើនចំណូលថវិការដ្ឋ និងទប់ស្កាត់ភាពអនាធិបតេយ្យនៃការប្រកួតប្រជែងក្នុងទីផ្សារទូរគមនាគមន៍ ។
ចំណុចសំខាន់ៗចំនួន៤នៃប្រកាសអន្តរក្រសួងលេខ២៣២សហវ.បទ ចុះថ្ងៃទី០៧ ខែធ្នូ ឆ្នាំ២០០៩ រវាងក្រសួងប្រៃសណីយ៍និងទូរគមនាគមន៍ និងក្រសួងសេដ្ឋកិច្ចនិងហិរញ្ញវត្ថុ ស្តីអំពីការកំណត់ថ្លៃអប្បបរមានៃសេវាទូរស័ព្ទចល័ត អចល័ត និងថ្លៃតភ្ជាប់បណ្តាញ គឺ ៖
១-ការកំណត់ថ្លៃអប្បបរមានៃសេវាទូរស័ព្ទចល័តហៅក្នុងបណ្តាញតែមួយចំនួន៤,៥សេនដុល្លារអាមេរិកក្នុង១នាទី "ដោយពុំទាន់គិតអាករលើតម្លៃបន្ថែម និងអាករពិសេស" ។
២-ការកំណត់ថ្លៃសេវាអប្បបរមាក្នុងការហៅឆ្លងកាត់បណ្តាញចំនួន៥,៩៥សេនដុល្លារអាមេរិកក្នុង១នាទី "ដោយពុំទាន់គិតអាករលើតម្លៃបន្ថែម និងអាករពិសេស" ។
៣-ការគិតតម្លៃសេវាជាវិនាទីជំនួសការគិតជានាទី ។
៤-ការទាក់ទាញអតិថិជនដោយរូបភាពបញ្ចុះថ្លៃ ការផ្តល់ជាប្រាក់ ជានាទី ឬរូបភាពផ្សេងៗទៀតតាមរយៈការឃោសនាពាណិជ្ជកម្មនៃប្រតិបត្តិករទាំងអស់ ត្រូវមានការអនុញ្ញាតជាមុនពីក្រសួងប្រៃសណីយ៍និងទូរគមនាគមន៍ ខ្លឹមសារនិងរូបភាពនៃការឃោសនាពាណិជ្ជកម្មនីមួយៗតាមគ្រប់បណ្តាញឃោសនា គ្រប់ទីសាធារណៈមិនត្រូវលើសពីរយៈពេល៣០ថ្ងៃ គិតចាប់ពីថ្ងៃទទួលបានការអនុញ្ញាតពីក្រសួង និងការឃោសនាពាណិជ្ជកម្មអំពីថ្លៃតភ្ជាប់ទូរស័ព្ទចល័តក្នុងបណ្តាញតែមួយ មិនត្រូវទាបជាង៥០%នៃថ្លៃសេវាអប្បបរមាចំនួន៤,៥សេនដុល្លារអាមេរិកក្នុង១នាទី ។
ទាក់ទងនឹងការកំណត់ថ្លៃអប្បបរមានៃសេវាទូរស័ព្ទដោយរាជរដ្ឋាភិបាលនេះ ទោះបីរដ្ឋមន្ត្រីក្រសួង MPTC ធ្វើការបកស្រាយយ៉ាងណាក៏ដោយ ក៏ត្រូវបានក្រុមយុវជននិងអតិថិជនអ្នកប្រើប្រាស់ទូរស័ព្ទនៅកម្ពុជាសម្តែងនូវការមិនពេញចិត្ត និងមិនអាចទទួលយកបានឡើយ ដោយធ្វើការរិះគន់ និងចោទប្រកាន់ថា រាជរដ្ឋាភិបាលបានលូកដៃចូលទៅក្នុងការប្រកបមុខរបរជំនួញរបស់ក្រុមហ៊ុនទូរស័ព្ទឯកជន ធ្វើឲ្យប៉ះពាល់ដល់ទីផ្សារសេរី និងប៉ះពាល់ដល់ជីវភាពរស់នៅរបស់ប្រជារាស្ត្រ ៕
Source from: www.dtn7.com
Loading...
Post a Comment