យុវជន​ និស្សិត​ បញ្ញវន្ត​ និង​ព្រះសង្ឃ​ ស្នើ​ឲ្យ​និរាករណ៍​ប្រកាស​អន្តរក្រសួង​លេខ​២៣២​ស្តី​ពី​ការ​កំណត់​ថ្លៃ​អប្បបរមា​សេវា​ទូរស័ព្ទ​

12/14/2013 05:00:00 AM

នៅវេលាព្រឹកនាថ្ងៃទី១៤ ខែធ្នូ ឆ្នាំ២០១៣នេះ ក្រុមយុវជន និស្សិត បញ្ញវន្ត និងព្រះសង្ឃប្រមាណជាង៥០នាក់-អង្គ បានធ្វើការជួបជុំគ្នានៅរមណីយដ្ឋានវត្តភ្នំ ដើម្បីតវ៉ាទាមទារឲ្យរាជរដ្ឋាភិបាល តាមរយៈក្រសួងប្រៃសណីយ៍និងទូរគមនាគមន៍ ពិចារណានិងសម្រេចនិរាយករណ៍ប្រកាសអន្តរក្រសួងលេខ២៣២សហវ.បទ ចុះថ្ងៃទី០៧ ខែធ្នូ ឆ្នាំ២០០៩ ស្តីពីការកំណត់ថ្លៃអប្បបរមានៃសេវាទូរស័ព្ទចល័ត អចល័ត និងថ្លៃតភ្ជាប់បណ្តាញ ចោលជាអសារបង់ ។

ក្រុមយុវជន និស្សិត និងព្រះសង្ឃ ដែលបានជួបជុំគ្នាធ្វើការតវ៉ាឲ្យមានការនិរាករណ៍ប្រកាសអន្តរក្រសួងលេខ២៣២ រវាងក្រសួងប្រៃសណីយ៍និងទូរគមនាគមន៍ និងក្រសួងសេដ្ឋកិច្ចនិងហិរញ្ញវត្ថុ ស្តីពីការកំណត់ថ្លៃអប្បបរមានៃសេវាទូរស័ព្ទនេះ គឺបានលើកហេតុផលថា ជាការកំណត់ថ្លៃមួយមិនមានគោលការណ៍ច្បាស់លាស់ គ្មានតុល្យភាព និងគ្មានតម្លាភាព ដើម្បីឲ្យមានការប្រកួតប្រជែងដ៏ត្រឹមត្រូវមួយ ស្របតាមសេដ្ឋកិច្ចទីផ្សារសេរី លើវិស័យទូរគមនាគមន៍ ជាហេតុធ្វើឲ្យប៉ះពាល់ដល់ជីវភាពរស់នៅរបស់ប្រជាពលរដ្ឋ ជាពិសេសអ្នកក្រីក្រ តូចតាច ។

សកម្មជនអ្នកតវ៉ាក៏បានបញ្ជាក់បន្ថែមទៀតថា ប្រសិនបើរាជរដ្ឋាភិបាលមិនមានការដោះស្រាយឲ្យបានសមស្របតាមការស្នើសុំនេះទេ គឺក្រុមអ្មកតវ៉ានឹងបន្តទាមទារតទៅទៀត រហូតទាល់តែមានដំណោះស្រាយអាចទទួលយកបាន ៕

1511166_207535489431110_1342278512_n 982 981 998