ខេត្តមណ្ឌលគិរី ៖ ចាប់តាំងពីពេលដែល អង្គភាពប្រឆាំងអំពើពុករលួយ បានបំបែកសំណុំរឿងដ៏ធំមួយ ក្នុងអង្គភាពអគ្គិសនី ខេត្តមណ្ឌលគិរី ដោយមានការចាប់ឃាត់ខ្លួន មនុស្សចំនួន ២នាក់ ក្នុងករណីក្លែងបន្លំឯកសារ កិបកេងលុយរបស់អង្គភាព ប្រមាណ ៤០០លានរៀល ប្រហាក់ប្រហែល ១០ម៉ឺនដុល្លារអាមេរិក មន្ត្រីតូចតាចជាច្រើន បានទម្លាយឲ្យដឹងថា ករណីពុករលួយនេះ អាចមានជាប់ពាក់ព័ន្ធ ជាមួយប្រធានរដ្ឋបាល ជាពិសេសគឺលោក ជិន សុឃុន ហៅសែ ជាអតីតប្រធាន អគ្គិសនីខេត្តមណ្ឌលគិរី ដែលឥឡូវនេះ បានផ្ទេរទៅធ្វើជាប្រធាន អគ្គិសនីខេត្តរតនគិរី ដូច្នេះទាមទារឲ្យមានការ ស៊ើបអង្កេតឲ្យបានស៊ីជម្រៅ ថាតើមន្ត្រីថ្នាក់ណាខ្លះដែលត្រូវ នាំទៅផ្តន្ទាទោសតាមច្បាប់ ពាក់ព័ន្ធនៅក្នុងសំណុំរឿង ពុករលួយដ៏ធំមួយនេះ។
ប្រភពព័ត៌មានពីមន្ត្រីមួយចំនួន បានបង្ហើបឲ្យដឹងថា នៅចំពោះមុខអាជ្ញាធរ មានសមត្ថកិច្ច ឈ្មោះ សួត សារឹម មានតួនាទីជា មន្ត្រីផ្នែកអាជីវកម្ម និងឈ្មោះ នី សុពណ៌ មានតួនាទីជាបេឡា ដែលជាជនត្រូវចោទក្នុង សំណុំរឿងពុករលួយ កិបកេងលុយអង្គភាព ១០ម៉ឺនដុល្លារអាមេរិក ពួកគេបំភ្លឺថា រឿងរ៉ាវដែលកើតឡើង គឺពាក់ព័ន្ធជាមួយលោក ជិន សុឃុន ហៅសែ ព្រោះក្នុងឋានៈជាបេឡា ជាអ្នកកាន់លុយមិនអាចចាយវាយ ដោយខ្លួនឯងបានទេ ទាល់តែមានចំណារឯកភាព លើប័ណ្ណចំណាយ ពីប្រធានអង្គភាព។ សូមបញ្ជាក់ថា អំឡុងពេលលោក ជិន សុឃុន ធ្វើជាប្រធានអគ្គិសនី ខេត្តមណ្ឌលគិរី គាត់បានបង្កើតឲ្យមានរឿងអាស្រូវ ពុករលួយ តាមរយៈការឃុបឃិត ជាមួយផ្នែកអាជីវកម្ម និងផ្នែកបេឡា ដើម្បីរៀបចំឯកសារក្លែងបន្លំ យកលុយអង្គភាព ទៅច្រកហោប៉ៅធ្វើមានធ្វើបានផ្ទាល់ខ្លួន ហើយក្រោយមករឿងនេះ ត្រូវបានបែកធ្លាយ បន្ទាប់ពីមានការផ្ទេរតំណែងលោក ជិន សុឃុន មកធ្វើជាប្រធានអគ្គិសនី ខេត្តរតនគិរី ក៏មានការសើរើរឿងរ៉ាវចាស់ បែកធ្លាយរឿងពុករលួយ ដ៏ធំមួយនេះតែម្តង។
អង្គភាពប្រឆាំងអំពើពុករលួយ បានស៊ើបអង្កេតយ៉ាងស៊ីជម្រៅ លើករណីក្លែងឯកសារ ដើម្បីកិបកេងលុយអង្គភាពចំនួន ១០ម៉ឺនដុល្លារអាមេរិក ហើយគេរកឃើញ ជនសង្ស័យចំនួន ២នាក់ ត្រូវបាននាំទៅសួរចម្លើយ និងឃុំខ្លួនបណ្តោះអាសន្ន ហើយពួកគេក៏បាន សារភាពនូវរឿងរ៉ាវជាច្រើន ដែលមានពាក់ព័ន្ធជាមួយលោក ជិន សុឃុន ហៅសែ។ ជាគោលការណ៍ អ្វីដែលជនសង្ស័យទាំង ២នាក់បានឆ្លើយបំភ្លឺ មានភស្តុតាងស៊ីសង្វាក់ និងមានបន្ទុកគ្រប់គ្រាន់ ដែលតុលាការខេត្តមណ្ឌលគិរី អាចកោះហៅលោក ជិន សុឃុន ហៅសែ ទៅសួរនាំ ប៉ុន្តែមិនទាន់មាន ចំណាត់ការអ្វីជាចំហទេ ទន្ទឹមពេលដែលមន្ត្រីតូចតាចមួយចំនួន បានបង្ហើបឲ្យដឹងថា លោក ជិន សុឃុន ហៅសែ កំពុងភ័យបារម្ភ និងចាយលុយរត់ការខ្វែងដៃខ្វែងជើង ដើម្បីរួចផុតពីការចោទប្រកាន់ ពីបទពុករលួយ។
យ៉ាងណាក៏ដោយ គេចង់ឃើញអង្គភាព ប្រឆាំងអំពើពុករលួយ និងស្ថាប័នតុលាការខេត្តមណ្ឌលគិរី ធ្វើការស៊ើបអង្កេតស្រាវជ្រាវ សំណុំរឿងពុករលួយដ៏ធំមួយនេះ ប្រកបដោយតម្លាភាព ដើម្បីនាំយកជនពុករលួយពិតប្រាកដ ទៅផ្តន្ទាទោសតាមច្បាប់ ហើយគេមិនចង់ឃើញលោក ជិន សុឃុន ហៅសែ ដែលគេសង្ស័យថា ជាមេគំនិតបង្កើតឲ្យមាន ការក្លែងឯកសារ ឈានដល់ការកេងបន្លំ លុយក្នុងអង្គភាពអគ្គិសនី យកទៅច្រកហោប៉ៅធ្វើមានធ្វើបានផ្ទាល់ខ្លួន រួចផុតពីទោសពៃរ៍នោះទេ។ ដើម្បីលុបបំបាត់មន្ទិលសង្ស័យទាំងនេះ គប្បីមានការស៊ើបអង្កេត ស្រាវជ្រាវជាចំហ មានតម្លាភាពជាការរួមចំណែក អនុវត្តន៍ការប្តេជ្ញាចិត្តរបស់សម្តេច ហ៊ុន សែន ក្នុងការគាស់កកាយរំលើងប្ញស នៃអំពើពុករលួយកុំឲ្យកើតមានពេញបន្ទុក នៅក្នុងសង្គមខ្មែរតទៅទៀត។
ប្រជាពលរដ្ឋនៅទូទាំង ខេត្តមណ្ឌលគិរី បានអបអរសាទរចំពោះ ចំណាត់ការបំបែកសំណុំរឿង ពុករលួយដ៏ធំមួយនេះ និងឈានដល់ការឃាត់ខ្លួន មន្ត្រីអគ្គិសនីចំនួន ២នាក់ទៅសួរនាំ និងឃុំខ្លួនបណ្តោះអាសន្ន ដើម្បីរង់ចាំការជំនុំជម្រះទោស ប៉ុន្តែជឿថា រឿងអាស្រូវដ៏ធំដែលជា បន្ទុកចោទប្រកាន់លើពួកគេ មានជាប់ពាក់ព័ន្ធជាមួយលោក ជិន សុឃុន ហៅសែ ដែលជាប្រធានអង្គភាព ហើយប្រសិនបើមានការស៊ើបអង្កេត ដោយតម្លាភាព ឈរលើមូលដ្ឋានការពិត ច្បាស់ណាស់ដែលថា រឿងអាស្រូវពុករលួយដ៏ធំមួយនេះ អាចនាំមន្ត្រីពាក់ព័ន្ធ ដែលបានប្រព្រឹត្តអំពើពុករលួយ ទៅដាក់ទោសជា។ យ៉ាងណាក៏ដោយ ប្រធានរដ្ឋបាល ជាពិសេសលោក ជិន សុឃុន ហៅសែ ជាអតីតប្រធានអគ្គិសនី ខេត្តមណ្ឌលគិរី នៅតែជនមានតម្រុយ សម្រាប់ការកោះហៅ ទៅសួរនាំក្នុងសំណុំរឿង ពុករលួយមួយនេះចៀសមិនផុតឡើយ ហើយប្រជារាស្ត្រ នៅទូទាំងខេត្តមណ្ឌលគិរី ចង់ឃើញមន្ត្រីធំៗ ទទួលទោសតាមច្បាប់ ដែលយ៉ាងហោចណាស់ ជាការសម្រាលកុំឲ្យមន្ត្រីតូចតាច ជាអ្នកទទួលរងថ្មបាក់៕
Source from: watphnom-news.com
Loading...
Post a Comment