ខេត្តក្រចេះ៖ក្រុមអ្នករកស៊ីដឹកជញ្ជូនទំនិញនិងអ្នករត់តាក់ស៊ីបាននិយាយអំពីការគ្រប់គ្រងតាមបែបគ្រួសាររបស់លោកម៉ុតខេត្តក្រចេះ ៖ ក្រុមអ្នករកស៊ីដឹកជញ្ជូនទំនិញ និងអ្នករត់តាក់ស៊ីបាននិយាយ អំពីការគ្រប់គ្រង តាមបែបគ្រួសារ របស់លោក ម៉ុត វណ្ណៈ ដែលកំពុងយកស្នាក់ការ សន្តិសុខលេខ៧០៨ ស្ថិតនៅចំណុចភូមិស្រែស្បូវ ឃុំក្បាលដំរី ស្រុកសំបូរខេត្តក្រចេះ ទៅធ្វើជាទីតាំងអាជីវកម្ម ប្រមូលលុយយកទៅ ច្រកហោប៉ៅផ្ទាល់ខ្លួន មិនដែលឃើញបង្ក្រាប សកម្មភាពដឹកជញ្ជូនឈើ ខុសច្បាប់នោះទេ ឃើញតែចាំអង្គុយរាប់ក្បាលឡាន យកលុយយ៉ាងរំភើយ ហើយគេចាំបានថា ឈ្មួញម្នាក់ធ្លាប់បាន ដាក់ពាក្យបណ្តឹងទៅសាលាដំបូងខេត្តក្រចេះ ករណីដែលលោក ម៉ុត វណ្ណៈ បង្ខំឲ្យបង់លុយតាមតែអំពើចិត្ត ជាថ្នូរនៃដោះលែងរថយន្តដឹកឈើ ប៉ុន្តែពាក្យបណ្តឹងនោះ មិនអាចធ្វើអ្វីលោក ម៉ុត វណ្ណៈ បានទេទើបគាត់នៅតែ ក្រអឺតក្រទម ប្រមូលលុយពីឡានដឹកឈើ យ៉ាងអនាធិបតេយ្យ។
ក្រុមអ្នករកស៊ីដឹកជញ្ជូនឈើ មួយចំនួនបានឲ្យដឹងថា តាមការកែទម្រង់ថ្មី ស្នាក់ការសន្តិសុខលេខ ៧០៨ ស្ថិតក្រោមការគ្រប់គ្រង ដោយផ្ទាល់របស់លោក ម៉ុត វណ្ណៈ ច្រើនឆ្នាំមកហើយ ប៉ុន្តែដើម្បីកុំឲ្យមានរឿងអាស្រូវ ពាក់ព័ន្ធនឹងអំពើពុករលួយ លោក ម៉ុត វណ្ណៈ ក៏បានរៀបចំអូសសណ្តោង សាច់ញាតិរបស់គាត់ ឲ្យចូលបម្រើក្របខ័ណ្ឌ អាវុធហត្ថខេត្តក្រចេះ ហើយក៏បានរត់ការឲ្យលោក ចាន់ រដ្ឋា ដែលជាប្អូនថ្លៃ បានឡើងធ្វើជាប្រធានស្នាក់ការ សន្តិសុខលេខ៧០៨ ហើយលោក ម៉ុត វណ្ណៈ ក៏បានជួយអន្តរាគមន៍ឲ្យលោក កែវ សុផល ដែលជាឪពុកក្មេក បានឡើងធ្វើជាអនុប្រធាន ស្នាក់ការផងដែរ។ គ្រប់រថយន្តដែលដឹកជញ្ជូនទំនិញ ឬដឹកឈើខុសច្បាប់ ឆ្លងកាត់ទីតាំងស្នាក់ការ សន្តិសុខលេខ៧០៨ នេះមិនដែលចៀសផុត ពីការចូលបង់លុយឲ្យ មន្ត្រីអាវុធហត្ថដែលប្រចាំការ នៅទីនោះម្តងណាឡើយ។
រាល់ការដឹកជញ្ជូនឈើឆ្លងកាត់ទីតាំងនោះ ត្រូវតែរាយការណ៍ជូនដំណឹងជាមុន បើមិនដូច្នេះទេនឹងត្រូវកូនចៅរបស់លោក ម៉ុត វណ្ណៈ តាមប្រដេញចាប់ស្ទាក់់ ឡានដឹកឈើយកទៅបង់ពិន័យ ហើយដោះលែងស្ងាត់ៗ មិនដែលខ្វល់ពីការបញ្ជូន ឲ្យទៅមន្ត្រីជំនាញនោះទេ។ ក្រុមអ្នករត់តាក់ស៊ីមួយចំនួន ដែលធ្លាប់ឃើញសកម្មភាព របស់មន្ត្រីអាវុធហត្ថ ប្រចាំស្នាក់ការ សន្តិសុខលេខ៧០៨ បានអះអាងថា លោក ចាន់ រដ្ឋា ដែលជាប្រធានស្នាក់ការ មិនសូវមានអំណាចប៉ុន្មានទេ ព្រោះតួនាទីប្រមូលលុយស្ថិតក្រោម ការចាត់ចែងផ្តាច់មុខ របស់លោក កែវ សុផល ជាឪពុកក្មេករបស់លោក ម៉ុត វណ្ណៈ។ ជាធម្មតាលោក កែវ សុផល បានប្រើប្រាស់រថយន្តម៉ាក ហាយឡេនឌ័រ ដ៏ទំនើបរបស់គាត់ល្បាត ប្រដេញតាមឡានដឹកទំនិញ ឬឡានរបស់ប្រជាពលរដ្ឋ ដែលបើកបរឆ្លងកាត់ ទីតាំងស្នាក់ការរបស់គាត់។
ករណីខ្លះក៏មានការឃាត់ ឆែកឆេរឡានរបស់ប្រជាពលរដ្ឋ ដែលមិនមានដឹកអ្វីសោះ បង្កឲ្យមានភាពប្រទាំងប្រទើស និងធ្លាប់មានការក្តៅក្រហាយ ប្តឹងផ្តល់ទៅកាន់មេបញ្ជាការ កងរាជអាវុធហត្ថខេត្តក្រចេះ លោក កែវ ជា សឹងរាប់ភ្លេចទៅហើយ។ ប៉ុន្តែសិទ្ធិអំណាច របស់លោក ម៉ុត វណ្ណៈ ធំណាស់អាចអន្តរាគមន៍ និងការពារឪពុកក្មេក ព្រមទាំងប្អូនថ្លៃ ឲ្យរួចផុតពីការដាក់ពិន័យ ឬការដកបញ្ឈរជើង ហើយរូបភាពនេះ គឺជាការលើកទឹកចិត្តឲ្យលោក ចាន់ រដ្ឋា និងលោក កែវ សុផល ប្រព្រឹត្តអំពើខុសច្បាប់កាន់តែខ្លាំងឡើងៗ គ្មានក្រែងញញើត ពីច្បាប់ទម្លាប់នោះទេ។ ក្រុមអ្នករកស៊ីដឹកជញ្ជូន ទំនិញមួយចំនួន ដែលបង់ពន្ធស្របច្បាប់ ក៏រងនូវការកោសរូស បង្ខំឲ្យបង់លុយ ពីសំណាក់លោក កែវ សុផល ផងដែរមិនខ្វល់ថា រាជរដ្ឋាភិបាលបានកែទម្រង់ លុបបំបាត់ភាពអសកម្មនោះទេ។
សម្រាប់រថយន្តយីឌុបដឹកឈើធំៗ ជារបស់ក្រុមហ៊ុន ឬរបស់ឈ្មួញមានអំណាច ក៏មិនដែលហ៊ានមើលរំលង ពីទីតាំងស្នាក់ការ សន្តិសុខលេខ៧០៨ របស់លោក ម៉ុត វណ្ណៈ នោះដែរ បើមិនបង់លុយឬជូនដំណឹងទេ ច្បាស់ជាជួបរឿងស៊យធំជាមិនខាន ម្ល៉ោះហើយមេការរបស់ក្រុមហ៊ុន ដឹកឈើខុសច្បាប់ទាំងនោះ តែងតែទំនាក់ទំនង យកចិត្តយកថ្លើមលោក កែវ សុផល និងលោក ម៉ុត វណ្ណៈ មិនដែលឲ្យចម្រូងចម្រាសនោះទេ។ លោក កែវ ជា ហាក់ដូចជាស្ងៀមស្ងាត់ ពីភាពអនាធិបតេយ្យ ដែលលោក ម៉ុត វណ្ណៈ បានយកទីស្នាក់ការ សន្តិសុខលេខ៧០៨ ទៅធ្វើអាជីវកម្មប្រមូលលុយ យកទៅធ្វើមានធ្វើបានផ្ទាល់ខ្លួន ទើបសកម្មភាពរបស់កងកម្លាំង ក្នុងស្នាក់ការសន្តិសុខលេខ៧០៨ ទោះជាបង្កភាពក្តៅក្រហាយ ដល់ប្រជាពលរដ្ឋនិងអ្នករកស៊ីដឹកទំនិញ ក៏មិនទាន់ឃើញមានការកែទម្រង់៕
Source from: watphnom-news.com
Loading...
Post a Comment