រាជធានីភ្នំពេញ៖បុរសម្នាក់ដែលថ្លើមធំហ៊ានក្លែងត្រាចៅសង្កាត់ទៅខ្ចីលុយធនាគារបាន៨ពាន់ដុល្លារម្តងហើយព្យាយាមសាកល្បងម្តងទៀតរាជធានីភ្នំពេញ ៖ បុរសម្នាក់ដែលថ្លើមធំ ហ៊ានក្លែងត្រាចៅសង្កាត់ ទៅខ្ចីលុយធនាគារបាន ៨ពាន់ដុល្លារ ម្តងហើយ ព្យាយាមសាកល្បងម្តងទៀត ក៏ត្រូវសមត្ថកិច្ចឃាត់ខ្លួន កាលពីថ្ងៃទី១២ ខែធ្នូ ឆ្នាំ២០១៣ វេលាម៉ោង២ រសៀលនៅក្នុងសង្កាត់ចោមចៅ ខណ្ឌពោធិ៍សែនជ័យ ដោយម្ចាស់ធនាគារ បានសហការជាមួយសមត្ថកិច្ច ចាប់ជនសង្ស័យខណៈដែល ចូលទៅខ្ចីលុយពីធនាគារ ។
ជនសង្ស័យឈ្មោះ ខន គឹមហេង ហៅឆន ភេទប្រុស អាយុ ៣២ឆ្នាំ មានមុខរបរជា អ្នកម៉ៅការសំណង់ ស្នាក់នៅ ភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ និងមានស្រុកកំណើត នៅភូមិព្រៃ ទទឹង ឃុំចន្ដ្រី ស្រុករមាស ខេត្ដស្វាយរៀង ត្រូវចោទប្រកាន់ ពីការបន្លំនិងក្លែងត្រា មេភូមិនិងចៅសង្កាត់ចោមចៅ ដើម្បីយកទៅ ប្រើប្រាស់ដោយខុសផ្លូវច្បាប់ ។
សមត្ថកិច្ចបានឱ្យដឹងថា កាលពីខែវិច្ឆិកា ឆ្នាំ២០១៣ ជនសង្ស័យបាន ធ្វើលិខិតមួយច្បាប់ ស្នើសុំខ្ចីលុយពីធនាគារចំនួន ៨.០០០ដុល្លារ ។ លុះមកដល់ថ្ងៃទី៦ ខែធ្នូ ជនសង្ស័យបានធ្វើលិខិត ស្នើសុំខ្ចីលុយម្ដងទៀត បន្ទាប់មកខាងធនាគារ បានឃើញឈ្មោះធ្លាប់មកខ្ចីម្តងហើយ តែត្រាខុសប្លែកគ្នា ក៏មានការសង្ស័យ រួចក៏ចុះទៅពិនិត្យដល់ កន្លែងស្នាក់នៅ និងប្ដឹងសមត្ថកិច្ច ឱ្យឃាត់ខ្លួនតែម្ដង ។
ត្រាដែលជនសង្ស័យ យកមកក្លែងបន្លំ ដើម្បីបោះនៅលើលិខិតស្នើសុំ ខ្ចីលុយពីធនាគារនោះ គឺមានត្រា របស់លោក រ៉ុង សាន ប្រធានភូមិព្រៃទា លោក វ៉ា ញ៉ ប្រធានភូមិព្រៃព្រីងខាងជើង និងត្រាលោក សុទ្ធ សាត ចៅសង្កាត់ ចោមចៅ ។ នេះអាចចាត់ទុកជារឿង ប្លែកថ្មីមួយទៀត ដែលជនខិលខូច ប្រើស្ទីល ក្លែងបន្លំត្រា តាំងពីថ្នាក់ភូមិ រហូតដល់ថ្នាក់សង្កាត់ ដើម្បីបោកលុយពីធនាគារ តែទង្វើបែបនេះមិនមានលទ្ធផលល្អនោះទេ៕
Source from: watphnom-news.com
Loading...
Post a Comment