ថ្វីដ្បិតមិនទាន់ទទួលបានព្រះរាជក្រឹត្យត្រាស់បង្គាប់តែងតាំងឯកឧត្តម ស៊ុយ សែម អ្នកតំណាងរាស្ត្រមណ្ឌលខេត្តពោធិ៍សាត់ និងជាអតីតរដ្ឋមន្ត្រីក្រសួងឧស្សាហកម្ម រ៉ែ និងថាមពល ឲ្យធ្វើជារដ្ឋមន្ត្រីក្រសួងថ្មីមួយឈ្មោះក្រសួងរ៉ែ និងថាមពល ដែលបំបែកចេញពីក្រសួងឧស្សាហកម្ម រ៉ែ និងថាមពល ក៏ដោយ ក៏គេអាចសន្និដ្ឋានទុកជាមុនរួចហើយថា ឯកឧត្តម ស៊ុយ សែម នឹងត្រូវមកកាន់តំណែងជារដ្ឋមន្ត្រីក្រសួងថ្មីឈ្មោះ ក្រសួងរ៉ែ និងថាមពល នេះនៅពេលខាងមុខឆាប់ៗ ។
ប្រសិនបើឯកឧត្តម ស៊ុយ សែម បច្ចុប្បន្នជាអ្នកតំណាងរាស្ត្រមណ្ឌលខេត្តពោធិ៍សាត់ បានមកកាន់មុខតំណែងជារដ្ឋមន្ត្រីក្រសួងរ៉ែ និងថាមពលវិញពិតប្រាកដមែននោះ គឺមានន័យថា ឯកឧត្តម ស៊ុយ សែម "ទៅហើយមកវិញ" ក៏ព្រោះតែស្តាយស្រណោះនឹងផ្នែករ៉ែ និងថាមពល ដែលឯកឧត្តមធ្លាប់គ្រប់គ្រងអស់រយៈពេលជាង១០ឆ្នាំ ជាពិសេសផ្នែកថាមពល គឺក្រុមហ៊ុនអគ្គិសនីកម្ពុជា "EDC" មានឯកឧត្តម កែវ រតនៈ ជាសាច់ញាតិរបស់ឯកឧត្តម កាន់កាប់អំណាចនៅទីនេះស្រេច ក្នុងនាមជាប្រតិភូរាជរដ្ឋាភិបាលទទួលបន្ទុកជាអគ្គនាយកអគ្គិសនីកម្ពុជា និងជាទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានឋានៈស្មើរដ្ឋលេខាធិការ ។
ដោយឡែក លោកជំទាវ នាយឧត្តមសេនីយ៍ផ្កាយមាស៤ ម៉ែន សំអន ធ្លាប់កាន់កាប់មុខតំណែងជាទេសរដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ហៅកាត់ថា "ក្រសួងអធិការកិច្ច" តែក្រោយមកពេលបង្កើតរាជរដ្ឋាភិបាលនីតិកាលទី៤នៃរដ្ឋសភា លោកជំទាវ ម៉ែន សំអន ត្រូវបានដកហូតមុខតំណែងជារដ្ឋមន្ត្រីក្រសួងអធិការកិច្ចនេះវិញ ដោយឲ្យមកកាន់តួនាទីត្រឹមជាឧបនាយករដ្ឋមន្ត្រីប្រចាំការ "ឧបនាយករដ្ឋមន្ត្រីគ្មានក្រសួងកាន់" ដោយព្រះរាជក្រឹត្យលេខនស/រកត/០៩០៨/១០៥៥ ចុះថ្ងៃទី២៥ ខែកញ្ញា ឆ្នាំ២០០៨ ។ បន្តមកទៀត នៅក្នុងរយៈពេលចុងអាណត្តិរាជរដ្ឋាភិបាលនីតិកាលទី៤នៃរដ្ឋសភា លោកជំទាវ ម៉ែន សំអន ត្រូវបានតែងតាំងឲ្យធ្វើជាឧបនាយករដ្ឋមន្ត្រី រដ្ឋមន្ត្រីក្រសួងអធិការកិច្ចដដែលវិញ ។
បច្ចុប្បន្ន សម្រាប់រាជរដ្ឋាភិបាលនីតិកាលទី៥នៃរដ្ឋសភានេះ លោកជំទាវ នាយឧត្តមសេនីយ៍ផ្កាយមាស៤ ម៉ែន សំអន ដែលមានឋានៈជាអ្នកតំណាងរាស្ត្រមណ្ឌលខេត្តស្វាយរៀងផងនោះ ត្រូវបានតែងតាំងឲ្យធ្វើជាឧបនាយករដ្ឋមន្ត្រី រដ្ឋមន្ត្រីក្រសួងអធិការកិច្ចបន្តទៀត ដោយព្រះរាជក្រឹត្យលេខនស/រកត/០៩១៣/៩០៣ ចុះថ្ងៃទី២៤ ខែកញ្ញា ឆ្នាំ២០១៣ ពោលគឺ "ទៅហើយមកវិញ" ចំពោះមុខតំណែងរបស់លោកជំទាវ ម៉ែន សំអន ។
មជ្ឈដ្ឋានអ្នកតាមដានកិច្ចការសង្គមនៅកម្ពុជា បានលើកឡើងថា ទាក់ទងនឹងការដឹកនាំក្រសួងអធិការកិច្ច និងក្រសួងរ៉ែ និងថាមពល ទំនងជារាជរដ្ឋាភិបាលខ្វះធនធានមនុស្សជាអ្នកចេះធ្វើរដ្ឋមន្ត្រី ដូចលោកជំទាវ ម៉ែន សំអន និងឯកឧត្តម ស៊ុយ សែម ឬ ទើបតែងតាំងឲ្យលោកជំទាវ និងឯកឧត្តម ទាំង២រូបនេះចេញ-ចូលសម្តែងរឿងកាន់កាប់មុខតំណែងរបៀប "ទៅហើយមកវិញ" ដូច្នេះ ឬក៏ក្រសួងទាំង២នេះជាក្រសួងប៉ុស្តិ៍ខ្លាញ់ច្រើន ទើបមន្ត្រីជាន់ខ្ពស់គណបក្សប្រជាជនកម្ពុជាទាំង២រូបមិនអាចដាច់ចិត្តចាកចេញចោលបាន ? ៕
Source from: www.dtn7.com
Loading...
Post a Comment