កាលពីថ្ងៃទី១២ ខែធ្នូ ឆ្នាំ២០១៣ម្សិលមិញនេះ យុវជនអ្នកលេង Facebook បានធ្វើការប្រកាសជូនដំណឹងផ្ញើសារមួយជូនទៅក្រសួងប្រៃសណីយ៍និងទូរគមនាគមន៍ ដែលមានឯកឧត្តម នាយឧត្តមសេនីយ៍ផ្កាយមាស៤ ប្រាក់ សុខុន ជារដ្ឋមន្ត្រី ដោយបានចោទប្រកាន់ថា រាជរដ្ឋាភិបាលតាមរយៈក្រសួងប្រៃសណីយ៍ និងទូរគមនាគមន៍ ធ្វើការលូកដៃចូលទៅក្នុងមុខរបរការប្រកបអាជីវកម្មរបស់ក្រុមហ៊ុនទូរស័ព្ទឯកជន ប៉ះពាល់ដល់ទីផ្សារសេរី និងជីវភាពប្រជារាស្ត្រ ។ លើសពីនេះ ក្រុមយុវជនអ្នកលេង Facebook បានប្រកាសឲ្យដឹងទៀតថា នៅពេលខាងមុខឆាប់ៗ ពួកគេនឹងរួបរួមគ្នាធ្វើការតវ៉ាទៅនឹងការកំណត់ថ្លៃសេវាទូរស័ព្ទរបស់ក្រុមហ៊ុនទូរស័ព្ទដោយក្រសួងប្រៃសណីយ៍និងទូរគមនាគមន៍ ប្រសិនបើក្រសួងមិនព្រមធ្វើការដោះស្រាយឲ្យមានភាពសមស្របទេនោះ ។
ប្រតិកម្មរបស់អតិថិជនអ្នកប្រើប្រាស់សេវាទូរស័ព្ទ ជាពិសេសក្រុមអ្នកលេង Facebook បានចាប់ផ្តើមកើតមានឡើង បន្ទាប់ពីរាជរដ្ឋាភិបាលបានសម្រេចតាមស្មារតីលិខិតលេខ១៨៨៨សជណ ចុះថ្ងៃទី២១ ខែវិច្ឆិកា ឆ្នាំ២០១៣ របស់ទីស្តីការគណៈរដ្ឋមន្ត្រី បង្គាប់ឲ្យក្រសួងប្រៃសណីយ៍និងទូរគមនាគមន៍អនុវត្តន៍ឲ្យបានម៉ឺងម៉ាត់នូវប្រកាសអន្តរក្រសួងលេខ២៣២សហវ.បទ ចុះថ្ងៃទី០៧ ខែធ្នូ ឆ្នាំ២០០៩ ស្តីពីការកំណត់ថ្លៃអប្បបរមានៃសេវាទូរស័ព្ទចល័ត អចល័ត និងថ្លៃតភ្ជាប់បណ្តាញ ដែលបានកំណត់ឲ្យក្រុមហ៊ុនទូរស័ព្ទទាំងអស់គិតថ្លៃសេវាអប្បបរមានៃសេវាទូរស័ព្ទចល័តហៅក្នុងបណ្តាតែមួយមិនឲ្យទាបជាង៤,៥សេនដុល្លារអាមេរិកក្នុង១នាទី "ដោយពុំទាន់គិតអាករលើតម្លៃបន្ថែមនិងអាករពិសេស" និងបានកំណត់ការឃោសនាពាណិជ្ជកម្មអំពីថ្លៃតភ្ជាប់ទូរស័ព្ទចល័តក្នុងបណ្តាញតែមួយ មិនត្រូវឲ្យជាបជាង៥០%នៃថ្លៃសេវាអប្បបរមាចំនួន៤,៥សេនដុល្លារអាមេរិកក្នុង១នាទី ។
ការកំណត់ថ្លៃអប្បបរមានៃសេវាទូរស័ព្ទចល័តនៅក្នុងប្រទេសកម្ពុជា ដោយរាជរដ្ឋាភិបាលត្រូវបានក្រុមយុវជនអ្នកលេង Facebook ចោទប្រកាន់ថា ជាការលូកដៃរបស់រាជរដ្ឋាភិបាលទៅក្នុងការប្រកបមុខជំនួញរបស់ក្រុមហ៊ុនទូរស័ព្ទ ដែលប៉ះពាល់ដល់ទីផ្សារសេរី និងជីវភាពរបស់ប្រជារាស្ត្រ ហើយពួកគេបានសម្តែងនូវប្រតិកម្មយ៉ាងខ្លាំងក្លា ចាប់តាំងពីមានការសម្រេចរបស់រាជរដ្ឋាភិបាលនោះរួចមក ។
ទោះយ៉ាងណា ក្នុងសន្និសីទសារព័ត៌មានកាលពីថ្ងៃទី០៩ ខែធ្នូ ឆ្នាំ២០១៣កន្លងមក រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានបញ្ជាក់ថា ក្រសួងត្រូវអនុវត្តន៍តាមការសម្រេចរបស់រាជរដ្ឋាភិបាល ក្នុងការអនុវត្តឲ្យបានម៉ឺងម៉ាត់ដាច់ខាតនូវប្រកាសអន្តរក្រសួងលេខ២៣២សហវ.បទ ចុះថ្ងៃទី០៧ ខែធ្នូ ឆ្នាំ២០០៩ ស្តីពីការកំណត់ថ្លៃអប្បបរមានៃសេវាទូរស័ព្ទចល័ត អចល័ត និងថ្លៃតភ្ជាប់បណ្តាញ ដើម្បីទប់ស្កាត់ភាពអនាធិបតេយ្យនៃការប្រកួតប្រជែងក្នុងទីផ្សារទូរគមនាគមន៍ និងបង្កើនចំណូលថវិការដ្ឋ ៕
Source from: www.dtn7.com
Loading...
Post a Comment