ខេត្តរតនគិរី៖ក្រុមឈ្មួញកំពុងសុខស្រួលក្នុងការរកស៊ីដឹកជញ្ជូនឈើខុសច្បាប់ផ្ទុយពីបទបញ្ជារបស់រាជរដ្ឋាភិបាលនៅលើទឹកដីខេត្តរតនគិរីគេមិនដែលឃើញមន្រ្តីជំនាញរដ្ឋបាលព្រៃឈើខេត្តរតនគិរី ៖ ក្រុមឈ្មួញកំពុងសុខស្រួល ក្នុងការរកស៊ីដឹកជញ្ជូនឈើខុសច្បាប់ ផ្ទុយពីបទបញ្ជារបស់រាជរដ្ឋាភិបាល នៅលើទឹកដីខេត្តរតនគិរី គេមិនដែលឃើញ មន្រ្តីជំនាញរដ្ឋបាលព្រៃឈើ របស់លោក វង្ស សុកសិរី និងសមត្ថកិច្ចពាក់ព័ន្ធ ចាត់វិធានការទប់ស្កាត់ ឲ្យមានប្រសិទ្ធភាពម្តងណាឡើយ។ ថ្មីៗនេះមានសេចក្តីរាយការណ៍មកថា ក្នុងបរិវេណសាខាគយ នៅក្នុងភូមិ១ សង្កាត់កាចាញ ក្រុងបានឡុង ខេត្តរតនគិរី បានក្លាយជាកន្លែងលួចលាក់ ស្តុកឈើប្រណីតខុសច្បាប់ យ៉ាងអនាធិបតេយ្យបំផុត តែគេមិនច្បាស់ទេថា តើលោក ជួប ចំរើន ជាប្រធានសាខាគយ និងរដ្ឋាករខេត្តរតនគិរី បានលួចលាក់រកស៊ីដឹកជញ្ជូនឈើប្រណីត ឬឈើទាំងនោះត្រូវបាន ក្រុមឈ្មួញយកមកផ្ញើទុក ឬក៏យ៉ាងណានោះទេ ដូច្នេះសូមលោកអភិបាលខេត្តរតនគិរី មេត្តាពិនិត្យមើលបញ្ហានេះឡើងវិញផង។
ប្រជាពលរដ្ឋនៅក្រុងបានឡុង បានបង្ហើបឲ្យដឹងថា ជារៀងរាល់ថ្ងៃ មានរ៉ឺម៉ក និងរថយន្តទំនើបៗ ដឹកជញ្ជូនឈើប្រណីតចេញចូល ទីតាំងសាខាគយខេត្តរតនគិរី យ៉ាងគគ្រឹកគគ្រេង មិនដែលមាននរណាហ៊ានសួរនាំទេ ហើយគេមិនដឹងថាឈើទាំងនោះ ដឹកជញ្ជូនមកពីណាប្រភពណានោះទេ គ្រាន់តែដឹងថាវាជាឈើខុសច្បាប់ គ្មានលិខិតស្នាមសម្រាប់ ដឹកជញ្ជូនឡើយ។ ទន្ទឹមពេលដែលខេត្តរតនគិរី ក្លាយជាទីផ្សារដឹកជញ្ជូនឈើ ឆ្លងកាត់យ៉ាងអនាធិបតេយ្យ ចេញទៅស្រុកយួន តាមច្រកអូរយ៉ាដាវ និងច្រករបៀងមួយចំនួនទៀត គេសង្កេតឃើញមន្ត្រីជំនាញ រដ្ឋបាលព្រៃឈើរបស់លោក វង្ស សុកសិរី និងសមត្ថកិច្ចពាក់ព័ន្ធដទៃទៀត កំពុងតែសុខស្រួល ក្នុងការប្រមូលលុយពី ជំនួញឈើខុសច្បាប់យកទៅ ច្រកហោប៉ៅធ្វើមានធ្វើបានផ្ទាល់ខ្លួន។
រឿងដែលក្រុមឈ្មួញ បានដឹកជញ្ជូនឈើយកទៅស្តុកទុក នៅក្នុងបរិវេណ សាខាគយនិងរដ្ឋាករប្រចាំខេត្តរតនគិរី ក្រោមការគ្រប់គ្រងរបស់លោក ជួប ចំរើន ហើយប្រភេទឈើប្រណីត ដែលដឹកតាមរ៉ឺម៉ក និងតាមរថយន្តទំនើបៗ សុទ្ធសឹងជាប្រភេទឈើ ត្រូវប៉ាន់មានតម្លៃខ្ពស់ នៅស្រុកយួន។ ការដឹកជញ្ជូនឈើយ៉ាងអនាធិបតេយ្យ ចេញចូលបរិវេណស្នាក់ការ សាខាគយនៅក្នុងខេត្តរតនគិរី នាំឲ្យមន្ត្រីមួយចំនួនគិតឃើញថា លោក ជួប ចំរើន បានលួចលាក់ប្រកប ជំនួញឈើខុសច្បាប់ ឬឃុបឃិតឲ្យក្រុមឈ្មួញ ប្រើប្រាស់បរិវេណសាខាគយខេត្តរតនគិរី សម្រាប់ការស្តុកឈើខុសច្បាប់ ព្រោះទីតាំងនោះជាកន្លែងដ៏មានសុវត្ថិភាព គ្មាននរណាហ៊ានចូល ទៅឆែកឆេរឬសួរនាំអ្វីទាំងអស់ ហើយលោក វង្ស សុកសិរី ជានាយខណ្ឌរដ្ឋបាលព្រៃឈើ ខេត្តរតនគិរី ក៏រក្សាភាពស្ងៀមស្ងាត់ ទំនងជាទទួលបាន ផលប្រយោជន៍ច្រើនក្រាស់ក្រែល ផងដែរហើយមើលទៅ។
នៅច្រកអន្តរជាតិអូរយ៉ាដាវ ដែលកំពុងមានសកម្មភាព ដឹកជញ្ជូនឈើខុសច្បាប់ ចេញទៅស្រុកយួនទាំងតាមរថយន្តតូចនិងរថយន្តធំ គេសង្កេតឃើញលោក ជួប ចំរើន គឺជាអ្នកបោះមេដ៏ធំមួយ ហើយឈ្មួញរកស៊ីដឹកជញ្ជូនឈើ គ្រប់ប្រភេទត្រូវតែទំនាក់ទំនង យកចិត្តយកថ្លើមលោក ជួប ចំរើន ទើបការដឹកជញ្ជូនឈើរបស់ពួកគេ អាចដំណើរការដោយរលូនល្អ។ ពេលខ្លះគេឃើញរថយន្ត របស់ជំនាញគយក៏មានលួចលាក់ ដឹកឈើខុសច្បាប់ផងដែរ ធ្លាប់ត្រូវបានក្រុមអ្នកកាសែត តាមប្រមាញ់សឹងរាប់ភ្លេចទៅហើយ ប៉ុន្តែលោក ជួប ចំរើន មិនដែលហ៊ានឮមាត់ឮក ព្រមានមន្ត្រីគយទាំងនោះម្តងណាឡើយ ធ្វើឲ្យគេសង្ស័យថា ជំនួញឈើខុសច្បាប់ទាំងនោះ មានពាក់ព័ន្ធយ៉ាងស៊ីជម្រៅ ជាមួយលោក ជួប ចំរើន តែម្តង។
យ៉ាងណាក៏ដោយគេចង់ឃើញ អគ្គនាយកគយនិងរដ្ឋាករ ជាពិសេសអង្គភាព ប្រឆាំងអំពើពុករលួយមេត្តាស៊ើបអង្កេតឲ្យបានស៊ីជម្រៅ ពីតួនាទីរបស់លោក ជួប ចំរើន ដែលល្បីក្នុងរឿង ប្រព្រឹត្តអំពើពុករលួយយកលុយ ពីការដឹកជញ្ជូនឈើខុសច្បាប់ ឆ្លងកាត់ច្រកព្រំដែនអូរយ៉ាដាវ និងច្រករបៀងនៅក្បែរៗនោះ ហើយការបែកធ្លាយរឿងអាស្រូវ ដែលរ៉ឺម៉ក និងរថយន្តទំនើបៗ ដឹកឈើប្រណីតចេញចូល បរិវេណសាខាគយ និងរដ្ឋាករខេត្តរតនគិរី បានធ្វើឲ្យប្រជាពលរដ្ឋ មើលឃើញកាន់តែច្បាស់ថា លោកមេគយខេត្តរតនគិរី មានទំនាក់ទំនងយ៉ាងអាថ៌កំបាំង ជាមួយការរកស៊ី ដឹកជញ្ជូនឈើខុសច្បាប់។ ប្រសិនបើអ្វីដែលប្រជាពលរដ្ឋ សង្ស័យជារឿងពិត អាចបញ្ជាក់បានថា លោក ជួប ចំរើន មិនត្រឹមតែមានតួនាទី ជាប្រធានសាខាគយខេត្តរតនគិរី និងជាប្រធាន ការិយាល័យគយប្រចាំ ច្រកអន្តរជាតិអូរយ៉ាដាវ ប៉ុណ្ណោះទេ គាត់ក៏មានតួនាទីខាងដឹកជញ្ជូន ឈើប្រណីតយ៉ាងសកម្ម គ្មាននរណាហ៊ានប៉ះពាល់ផងដែរ៕
Source from: watphnom-news.com
Loading...
Post a Comment