យុវវ័យ​រិះគន់​ការ​និពន្ធ​បទម្រៀង​ពារ​លើ​បទ​ថ្មី​របស់​លោក ព្រាប សុវត្ថិ

1/20/2014 09:53:00 PM

យុវវ័យមួយចំនួនបានលើកឡើងថា ការរិះគន់ដើម្បីស្ថាបនា ជាការរិះគន់ឱ្យមានការអភិវឌ្ឍជឿនលឿនឈានទៅមុខ ប៉ុន្តែបើនិយាយពីសង្គមសិល្បៈជាពិសេសអ្នកនិពន្ធបទចម្រៀងខ្មែរ ទោះបីជាមានការរិះគន់ចំៗយ៉ាងណា ក៏អ្នកនិពន្ធមួយចំនួននៅតែព្រងើយកន្តើយ។ ផ្ទុយទៅវិញមានតែកើនឡើងការចម្លងពីបរទេស ឬបើមិនដូច្នេះយកបទចាស់ៗមកច្រៀងដដែលៗ។

ក្នុងនោះអ្នកដែលផ្ដល់បទសម្ភាសន៍ជាមួយ nob70 នាពេលថ្មីៗបានធ្វើការរិះគន់លើបទ “ទន្លេឯកា” (និពន្ធទំនុកច្រៀងដោយ សុខ ចាន់ផល ) ច្រៀងដោយលោក ព្រាប សុវត្ថិ ថាគ្មានអ្វីប្លែក ហើយដូចគ្នាស្ទើរទាំងស្រុងនឹងបទ “ជលសាដួងចិត្ត” (និពន្ធទំនុកច្រៀងដោយលោក ជុំ ប៊ុនធឿន) ដោយគ្រាន់តែកែភ្លេងនិងកាយវិការបន្តិចប៉ុណ្ណោះ ។

ដោយមានការហួសចិត្តចំពោះ “ទន្លេឯកា”យុវជន សី បានប្រាប់ ReadKhmer ថា “ហេតុអីការនិពន្ធចម្រៀងស្រុកខ្មែរគ្មានការអភិវឌ្ឍន៍សោះ បើមិនចម្លងពីគេ គឺយកបទចាស់ដដែលៗមកឱ្យច្រៀង។ ម្ចាស់ផលិតកម្មនិងអ្នកនិពន្ធគួរគិតត្រង់ចំណុចនេះ វាគ្មានតម្លៃទេដែលអង្គុយដកខ្យល់ចាំចម្លងពីគេ”។

យុវជន សី បានរៀបរាប់បន្ថែមថា កូនខ្មែរឥឡូវគេចេះគិត ចេះវិភាគ ចេះឱ្យតម្លៃស្នាដៃខ្មែរ មិនដូចសម័យសង្គ្រាមមិនស្គាល់អ្វីសោះនោះទេ។ សី បានសង្កត់ធ្ងន់ថា អ្នកនិពន្ធមួយចំនួនឡើងតាមខ្សែ គ្មានបទពិសោធន៍ គំនិតធ្វើអ្វីថ្មីជារបស់ខ្លួន។ សីបញ្ជាក់ថា ប្អូនមិនបានឱ្យតម្លៃសោះឡើយ ចំពោះស្នាដៃចម្លងគេបែបនេះ។

ចំណែកកញ្ញា Emi និស្សិតនៅវិទ្យាស្ថានភាសាបរទេស IFL បាននិយាយថា “ការយកបទគេ និងបទដដែលៗមកច្រៀង មិនមែនជាអ្វីដែលខ្មែរចង់បាននោះទេ។ អ្នកនិពន្ធខ្មែរគួរមើល ឬដើរតាមអ្នកនិពន្ធសម័យលោកតា ស៊ិន ស៊ីសាមុត និងលោកយាយ ប៉ែនរ៉នជាដើម។ ពួកគាត់ពូកែ គ្រាន់តែអង្គុយឬទៅកន្លែងណាក៏អាចតែងបទចម្រៀងបាន ហើយបទនីមួយៗមានអត្ថន័យខ្លឹមសារល្អដក់ជាប់ក្នុងចិត្តអ្នកស្ដាប់។ រីឯបទអ្នកនិពន្ធបច្ចុប្បន្នខ្ញុំសុំសរសើរដែរ ដោយគ្រាន់តែអង្គុយក្នុងម៉ាស៊ីនត្រជាក់សោះ បានបទចម្រៀងច្រៀងមិនចេះអស់ តែគុណភាពបានតែមួយឆាវៗឬស្លាប់មុនម្ចាស់”។

កញ្ញា Emi បានបន្តទៀតថា ប្អូនមានអារម្មណ៍ខ្មាសគេ ពេលឮសារព័ត៌មានក្នុងស្រុកនិងបរទេសថា ខ្មែរចូលចិត្តចម្លងស្នាដៃអ្នកដទៃ គ្មានគំនិតក្នុងការផលិត និងយកបទចម្រៀងច្រៀងម្ដងហើយ មកឱ្យតារាចម្រៀងច្រៀងឡើងវិញ ដោយគ្រាន់តែកែភ្លេង ឬអ្វីផ្សេងបន្តិចបន្តូចប៉ុណ្ណោះ។ Emi ថាប្អូនចង់ឃើញអ្នកនិពន្ធខ្មែរ មានអ្វីជារបស់ខ្លួនឯង ដើម្បីលើកមុខមាត់ប្រទេស ហើយប្អូនស្រីជឿជាក់ថា កូនខ្មែរមិនមែនអន់ទេ គឺអាចធ្វើអ្វីៗបានខ្លួនឯងមិនចាញ់អ្នកនិពន្ធប្រទេសជិតខាងឡើយ។
ទន្លេឯកា