មានរឿងអាថ៌កំបាំងដែលអភិបាលខេត្តប៉ៃលិន ស្វែងរកមុខមន្ត្រីដែលទម្លាយ រឿងពុករលួយរបស់លោក អ៊ុក វណ្ណច័ន្ទ និងលោក លឹម សម្បត្តិ
រាជធានីភ្នំពេញ៖ជារឿងមួយគួរឲ្យចាប់អារម្មណ៍បំផុតនៅពេលដែលលោកអ៊ីឈានអភិបាលខេត្តប៉ៃលិនបានដាក់បញ្ជារាជធានីភ្នំពេញ ៖ ជារឿងមួយគួរឲ្យចាប់អារម្មណ៍បំផុត នៅពេលដែលលោក អ៊ី ឈាន អភិបាលខេត្តប៉ៃលិន បានដាក់បញ្ជា អោយមន្ត្រីក្រោមឱវាទ តាមវែកមុខមន្ត្រីគយ ដែលរាយការណ៍ប្រាប់ អ្នកសារព័ត៌មាន ទាក់ទិនរឿងដែល មន្ត្រីគយតូចតាច ប្តឹងលោក អ៊ុក វណ្ណច័ន្ទ ជាប្រធានសាខាគយ ខេត្តប៉ៃលិន និងលោក លឹម សម្បត្តិ ជាប្រធានការិយាល័យគយច្រកព្រំ ពីបទពុករលួយ អស់រយៈពេល ២សប្តាហ៍ មកហើយនៅតែរកមិនឃើញ ហើយគេឆ្ងល់ថា តើរឿងអាស្រូវពុករលួយរបស់លោក អ៊ុក វណ្ណច័ន្ទ និងលោក លឹម សម្បត្តិ មានអ្វីពាក់ព័ន្ធជាមួយលោក អ៊ី ឈាន ទើបលោកអភិបាលខេត្តឆេះដុំ តាមវែកមុខអ្នកផ្តល់ព័ត៌មាន ឲ្យអ្នកកាសែត។
មន្ត្រីមួយចំនួនបានបង្ហើបឲ្យដឹងថា កាលពីខែធ្នូ ឆ្នាំ២០១៣ មានដំណឹងពាក់ព័ន្ធ មន្ត្រីគយតូចតាច ប្តឹងលោក អ៊ុក វណ្ណច័ន្ទ និងលោក លឹម សម្បត្តិ ទៅកាន់អគ្គនាយកដ្ឋានគយ ក្រសួងសេដ្ឋកិច្ច និងហិរញ្ញវត្ថុ និងអង្គភាពប្រឆាំងអំពើពុករលួយ ទាក់ទិនករណី ឃុបឃិតឲ្យមានការ ហូរចូលទំនិញ បង់ពន្ធមិនគ្រប់ និងការដឹកជញ្ជូនឈើគ្រញូង មកពីស្រុកថៃ យ៉ាងគគ្រឹកគគ្រេង។ ក្រោយមកលោក អ៊ី ឈាន អភិបាលខេត្តប៉ៃលិន បានកោះហៅមន្ត្រីគយទាំងអស់ មកប្រជុំជាសំងាត់ តែដោយសារមិនអស់ចិត្ត លោកអភិបាលខេត្ត បានចាត់អោយមន្ត្រីក្រោមឱវាទ តាមស៊ើបសួរ ស្វែងរកឈ្មោះនិងមុខ មន្ត្រីគយពិតប្រាកដ ដែលបានលួចទម្លាយ រឿងអាស្រូវពុករលួយរបស់លោក អ៊ុក វណ្ណច័ន្ទ និងលោក លឹម សម្បត្តិ ។
តាមប្រភពមន្ត្រីគយច្រកព្រំម្នាក់ បានអោយដឹងថា លោក អ៊ី ឈាន បានចាត់ចែងអោយស៊ើប រកមុខអ្នកទម្លាយរឿងពុករលួយ អស់រយៈពេល ២សប្តាហ៍មកហើយ ដោយប្រកាសជូនរង្វាន់ ចំពោះអ្នកដែលផ្តល់សាវតាគយ ដែលបានរាយការណ៍ ជូនអ្នកសារព័ត៌មានទៀតផង។ ក្នុងនោះលោក អ៊ី ឈាន បានដាក់ការសង្ស័យ លើមន្ត្រីគយចំនួន ៥នាក់ក្នុងចំណោម ៣៧នាក់ ថាបានចូលរួម ជាមួយបក្សប្រឆាំង តែលោកអភិបាល នៅតែចង់ឃើញមុខ និងសាវតាពិត តើមានឈ្មោះអ្វី ចំនួនប៉ុន្មាននាក់ ហើយមិនយកទោសពៃរ៍អ្វីឡើយ គ្រាន់តែចង់ស្គាល់ និងហៅមកអប់រំ ស្ងាត់ៗប៉ុណ្ណោះ។
មន្ត្រីមួយចំនួនបានបង្ហើបឲ្យដឹងថា សមត្ថកិច្ចមិនបន្ទោស ការចុះផ្សាយរបស់ សារព័ត៌មានឡើយ តែខឹងអ្នកដែលរាយការណ៍ថា នៅច្រកព្រំមានលោកជំទាវ បាន ស្រីមុំ តំណាងរាស្ត្រនិងឧញ៉ា សៅ សុខ ចេញឈើគ្រញូងនោះ វាមិនត្រឹមត្រូវទេ រីឯពាក្យថា ស្ថិតក្នុងគំនាបលោក អ៊ី ឈាន នោះវាជារឿងធម្មតាទេ ព្រោះយើងជាសមត្ថកិច្ចក្រោមឱវាទ គឺត្រូវស្ថិតក្រោមបញ្ជា របស់ថ្នាក់ដឹកនាំខេត្ត បែបនេះឯង។ យ៉ាងណាក៏ដោយមន្ត្រីជាច្រើន បានរិះគន់ថា ការស្វែងរកប្រភព អ្នកផ្តល់ព័ត៌មាន គឺធ្វើអោយមនុស្សបាក់ស្បាត មិនហ៊ានចេញមុខ មិនដឹងរកមកអប់រំ ឬស្គាល់មុខ លបធ្វើឃាតចោលក៏មិនដឹង ហើយគេយល់ថា វិធានការបែបនេះ មិនអាចលាក់បាំង រឿងអាស្រូវពុករលួយរបស់លោក អ៊ុក វណ្ណច័ន្ទ និងលោក លឹម សម្បត្តិ បានទេ ព្រោះការពិត នៅតែជាការពិត។
មានការបញ្ជាក់ផងដែរថា ចាប់តាំងពីការប្រកាសកែទម្រង់ គេសង្កេតឃើញលោក អ៊ុក វណ្ណច័ន្ទ ហាក់ដូចជាព្រងើយកន្តើយ មិនយកចិត្តទុកដាក់ ឆ្លុះកញ្ចក់ ងូតទឹក ដុះក្អែលខ្លួនឯង ឲ្យស្របតាមគោលការណ៍ណែនាំ របស់សម្តេច ហ៊ុន សែន នោះទេ គឺលោក អ៊ុក វណ្ណច័ន្ទ បានឃុបឃិតជាមួយលោក លឹម សម្បត្តិ ក្នុងការកេងបន្លំចំណូលពន្ធ យកទៅច្រកហោប៉ៅផ្ទាល់ខ្លួន។ ពេលខ្លះលោក អ៊ុក វណ្ណច័ន្ទ បានលើកឡើងក្នុងអង្គប្រជុំ ដោយសុំឲ្យជំនាញគយ ក្រោមឱវាទទាំងអស់ រឹតបន្តឹងការប្រមូលពន្ធ ប៉ុន្តែសម្រាប់ក្រុមឈ្មួញធំៗ ដែលមានភាពជិតដិត និងទំនាក់ទំនងល្អ ត្រូវបានលោក អ៊ុក វណ្ណច័ន្ទ ខ្សឹបខ្សៀវជាមួយលោក លឹម សម្បត្តិ ឲ្យនាំចូលទំនិញគ្រប់ប្រភេទ តាមរបៀបក្លែងភេទទំនិញ ឬបំបាត់ចំណូលពន្ធទៅតាមបច្ចេកទេស យ៉ាងស្ងៀមស្ងាត់បំផុត។
មានការពន្យល់អំពីការបំបាត់ចំណូលពន្ធ ដែលប្រព្រឹត្តដោយលោក អ៊ុក វណ្ណច័ន្ទ និងលោក លឹម សម្បត្តិ ដូចជាករណីបើកភ្លើងខៀវ ឲ្យក្រុមឈ្មួញមានលុយ មានអំណាចដឹកឈើគ្រញូង មកពីស្រុកសៀម ចូលប្រទេសកម្ពុជាតាមច្រកព្រំ និងច្រករបៀង ២កន្លែងទៀត ដែលនៅអមសងខាងច្រកព្រំ ហើយបើទោះបីជា ឈើគ្រញូងមិនស្ថិតក្នុង ប្រភេទទំនិញបង់ពន្ធក៏ដោយ ប៉ុន្តែក្រុមឈ្មួញត្រូវតែបង់លុយចូលហោប៉ៅ របស់លោក អ៊ុក វណ្ណច័ន្ទ និងលោក លឹម សម្បត្តិ បើមិនដូច្នេះទេ កុំសង្ឃឹមថាអាចដឹកជញ្ជូនឈើគ្រញូង ចូលតាមច្រកព្រំឲ្យសោះ។ ជាធម្មតា ឈើគ្រញូងរាប់សិបតោន ក្នុងមួយថ្ងៃៗ ត្រូវបានក្រុមឈ្មួញ ដឹកជញ្ជូនចូលតាមច្រកព្រំ ឡើងតាមផ្លូវជាតិលេខ៥ មកកាន់ភ្នំពេញ ឬឆ្លងស្ពានព្រែកក្តាម ទៅស្រុកយួនតាមខេត្តកំពង់ចាម យ៉ាងរលូនល្អ ហើយជាប្រភពចំណូល ធំបំផុតរបស់លោក អ៊ុក វណ្ណច័ន្ទ និងលោក លឹម សម្បត្តិ។
មានការបង្ហើបឲ្យដឹងផងដែរថា សម្រាប់ទំនិញគ្រប់ប្រភេទ ដែលត្រូវបានដឹកជញ្ជូន តាមច្រកអន្តរជាតិព្រំ លោក លឹម សម្បត្តិ បានប្រើប្រាស់ សិទ្ធិអំណាចរបស់ខ្លួន រៀបចំឯកសារបំបាត់ចំណូលពន្ធ តាមបច្ចេកទេស តាមរយៈការក្លែងភេទទំនិញ និងបំបាត់បរិមាណទំនិញជាដើម ហើយទង្វើរបស់លោក លឹម សម្បត្តិ ក៏មានការគាំទ្រពីលោក អ៊ុក វណ្ណច័ន្ទ ដែលជាប្រធាន សាខាគយ ខេត្តប៉ៃលិនផងដែរ។ រឿងហេតុដែលលោក អ៊ុក វណ្ណច័ន្ទ និងលោក លឹម សម្បត្តិ សមគំនិតគ្នាកិបកេង បំបាត់ចំណូលពន្ធ តាមបច្ចេកទេស នឹងក្លាយជាប្រធានបទ ដ៏សំខាន់មួយដើម្បីសាកល្បង ការប្តេជ្ញាចិត្តរបស់សម្តេច ហ៊ុន សែន អំពីចំណាត់ការកែទម្រង់ លើការប្រមូលពន្ធគយ ហើយគេចង់ឃើញ អង្គភាពប្រឆាំងអំពើពុករលួយ ចូលរួមស៊ើបអង្កេតស្រាវជ្រាវ ពីភាពមានបានរបស់ លោក អ៊ុក វណ្ណច័ន្ទ និងលោក លឹម សម្បត្តិ ឡើងវិញផង៕
Source from: watphnom-news.com
Loading...
Post a Comment