កូនប្រុសឧត្តមសេនីយ៍យោធាម្នាក់ជាប់ចោទពីបទប្រើប្រាស់ និងចែកចាយគ្រឿងញៀន
កាលពីថ្ងៃទី០៥ ខែឧសភា ឆ្នាំ២០១៤ ម្សិលមិញនេះកូនប្រុសលោកឧត្តមសេនីយ៍យោធាម្នាក់ជាមេបញ្ជាការតំបន់ប្រតិបត្តិការសឹករងខេត្តស្ទឹងត្រែង និងបក្ខពួកចំនួន៤នាក់ទៀតរួមមាន៖ ១-ឈ្មោះ ផាន់ អរុណ ភេទប្រុស អាយុ២៨ ឆ្នាំ មុខរបរមិនពិតប្រាកដ, ២- ឈ្មោះ សោម ហាន ភេទប្រុស អាយុ៣២ឆ្នាំ មុខរបរជាជាងជួសជុលរថយន្ត, ៣- ផូ សុវណ្ណ ហៅស៊ុយ ភេទប្រុស មុខរបរជាមន្ត្រីការិយាល័យនៃព័ត៌មានខេត្តតាកែវ និង ៤- ឈ្មោះ រិទ្ធ អារុណ្ណាទី ភេទប្រុស អាយុ២៩ឆ្នាំ ដែលមានទីលំនៅក្នុងក្រុងដូនកែវទាំងអស់គ្នា ត្រូវបានកងកម្លាំងសមត្ថកិច្ចនគរបាលក្រុងដូនកែវ ខេត្តតាកែវ ចាប់ខ្លួន ខណៈពួកគេកំពុងតែប្រើប្រាស់ និងចែកចាយគ្រឿងញៀននៅផ្ទះរបស់ឈ្មោះ រិទ្ធ អារុណ្ណាទី ជាមួយនឹងវត្ថុតាងជាអាទិ៍៖ ថ្នាំញៀនចំនួន៩កញ្ចប់តូច ទោចក្រយានយន្ត១គ្រឿង ដែកកេះចំនួន៨ ព្រមទាំងសម្ភារៈសម្រាប់ប្រើប្រាស់គ្រឿងញៀនមួយចំនួនទៀត រួចហើយក៏បានបញ្ជូនខ្លួនបន្តទៅការិយាល័យប្រឆាំងការជួញដូរគ្រឿងញៀននៃស្នងការដ្ឋាននគរបាលខេត្តតាកែវ។
កូនប្រុសរបស់លោកឧត្តមសេនីយ៍ត្រី ស្វាយ ញ៉ាន នាយទាហាននៃកងយោធពលខេមរភូមិន្ទ អត្តលេខ០០០៤៣៨ ជាមេបញ្ជាការតំបន់ប្រតិបត្តិការសឹករងខេត្តស្ទឹងត្រែង ដែលជាប់ចោទពីបទប្រើប្រាស់ និងចែកចាយគ្រឿងញៀនជាមួយគូកនចំនួន៤នាក់ទៀតដែលត្រូវសមត្ថកិច្ចបញ្ជូនខ្លួនទៅតុលាការសាលាដំបូងខេត្តតាកែវ ចាត់ការតាមនីតិវិធី នាថ្ងៃទី០៦ ខែឧសភា ឆ្នាំ២០១៤នេះ មានឈ្មោះ ស្វាយ ឧត្តម ហៅ ប៉ង់។
លោក ស្វាយ ញ៉ាន នាយទាហាននៃកងយោធពលខេមរភូមិន្ទត្រូវបានដំឡើងឋានន្តរស័ក្តិថ្នាក់ឧត្តមសេនីយ៍ត្រី (ផ្កាយ១) ដោយព្រះរាជក្រឹត្យលេខនស/រកត/១២០៨/១៤០៦ ចុះថ្ងៃទី២៧ ខែធ្នូ ឆ្នាំ២០០៨។
ប្រភពព័ត៌មានដែលស្និទ្ធនឹងសាលាដំបូងខេត្តតាកែវ បានបង្ហើបប្រាប់ឲ្យដឹងថា ជនសង្ស័យទាំង៥នាក់នោះ គឺជាមុខសញ្ញាចាស់ក្នុងការធ្វើសកម្មភាពប្រើប្រាស់ និងចែកចាយគ្រឿងញៀនយូរឆ្នាំមកហើយ នៅក្នុងភូមិសាស្ត្រក្រុងដូនកែវ ខេត្តតាកែវ។ ដោយឡែកប្រភពព័ត៌មានក្រៅផ្លូវការផ្សេងទៀតក៏បានបង្ហើបឲ្យដឹងដែរថា ក្រុមគ្រួសារលោកឧត្តមសេនីយ៍ ស្វាយ ញ៉ាន កំពុងតែរត់ការខ្វែងដៃខ្វែងជើង សុំអន្តរាគមន៍ឲ្យមានការលើកលែងចោទប្រកាន់ និងដោះលែងកូនប្រុសរបស់ខ្លួនឲ្យរួចផុតពីការជាប់ឃុំក្នុងពន្ធនាគារយ៉ាងសកម្ម៕
Source from: www.dtn7.com
Loading...
Post a Comment