ឈ្លោះប្រកែកគ្នាជាមួយប្តី ស្ត្រីជាប្រពន្ធមានផ្ទៃពោះ៤ខែម្នាក់ចាក់សាំងដុតខ្លួនឯងទាំងរស់
វេលាម៉ោង១៤ និង២៥នាទីរសៀល នាថ្ងៃទី០៦ ខែឧសភា ឆ្នាំ២០១៤នេះ នៅភូមិ៧មករា សង្កាត់ឡាបានសៀក ក្រុងបានលុង ខេត្តរតនគិរី មានហេតុការណ៍ដ៏គួឲ្យភ្ញាក់ផ្អើលមួយបានកើតឡើង គឺស្ត្រីជាប្រពន្ធមានផ្ទៃពោះ៤ខែម្នាក់ ព្រោះតែឈ្លោះប្រកែកគ្នាជាមួយប្តី ក៏ដាច់ចិត្តចាក់សាំងដុតខ្លួនឯងទាំងរស់ ដើម្បីបញ្ចប់សង្ខារទាំងមិនស្តាយស្រណោះខ្លួនមួយជីវិតពីរ ទាល់តែសោះ។
ទោះយ៉ាងណាក៏ដោយ ស្ត្រីជាប្រពន្ធមានផ្ទៃពោះ៤ខែ ដែលចាក់សាំងដុតខ្លួនឯងទាំងរស់ ព្រោះឈ្លោះប្រកែកគ្នាជាមួយប្តីនោះ មិនឈានដល់ការស្លាប់បាត់បង់ជីវិតទេ គឺត្រឹមទទួលរងរបួសធ្ងន់ធ្ងរ ដោយសារបុរសជាប្តីម្នីម្នាចូលទៅជួយទាន់ពេលវេលាបង្កឲ្យខ្លួនឯងក៏រងរបួសស្រាលផងដែរ។
តាមការបញ្ជាក់របស់បុរសជាប្តីឈ្មោះ សួរ ដា អាយុ៣១ឆ្នាំ មុខរបរជាកម្មករសំណង់ បានឲ្យដឹងថា ប្រពន្ធរបស់គាត់ឈ្មោះ អៀន ធាន អាយុ២៩ឆ្នាំ មានស្រុកកំណើតនៅស្រុកត្បូងឃ្មុំ ខេត្តកំពង់ចាម បានមករស់នៅខេត្តរតនគិរី ប្រមាណ២ទៅ៣ឆ្នាំ មានផ្ទៃពោះ៤ខែហើយ។ បុរសជាប្តីបានបញ្ជាក់ទៀតថា តាំងពីរៀបការរួមរស់ជាមួយគ្នាបាន៣ឆ្នាំមក ពួកគាត់មិនសូវចុះសម្រុងគ្នាទេ ដ្បិតប្រពន្ធតែងចោទប្រកាន់ថា គាត់មានស្រីញីនៅក្រៅផ្ទះ។ នៅមុនពេលកើតហេតុ គាត់និងប្រពន្ធបានឈ្លោះប្រកែកគ្នាយ៉ាងខ្លាំងព្រមទាំងជេរបញ្ចោរផ្អើលដល់អ្នកជិតខាង រឿងចោទថា គាត់ផឹកស្រា។ ក្រោយមកប្រពន្ធគាត់ក៏បានយកដបទឹកសុទ្ធបង្ហូរសាំងចេញពីទោចក្រយានយន្តប្រមាណកន្លះលីត្រចាក់ស្រោចពេញលើខ្លួនរួចដុតខ្លួនឯងទាំងរស់ ឆេះរលាកឡើងក្រហមពេញខ្លួន។ ភ្លាមៗនោះ គាត់ក៏បានស្ទុះទៅជួយពន្លត់ភ្លើងដែលកំពុងឆេះលើខ្លួនប្រពន្ធ បណ្តាលឲ្យគាត់ក៏រងរបួសស្រាលដែរ និងប្រពន្ធគាត់ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្តតាកែវ៕
Source from: www.dtn7.com
Loading...
Post a Comment