ព័ស្តុតាងមួយក្នុងចំណោមព័ស្តុតាងច្រើនទៀតបង្ហាញថាបុរសខ្លាំងប្រព្រឹត្តអំពើរំលោភបំពានច្បាប់ធ្ងន់ធ្ងរ
ប្រិយមិត្តអ្នកអានអាចនៅចងចាំបានទេ អំពីករណីបុរសជនជាតិថៃម្នាក់ឈ្មោះ ស៊ីវ៉ារ៉ាក់ ជុធិពុង(Siwarak Chutipong) វិស្វករក្រុមហ៊ុន Cambodia Air Traffic Services(CATS) ត្រូវបានអាជ្ញាធរកម្ពុជាចាប់ខ្លួននាថ្ងៃទី១២ ខែវិច្ឆិកា ឆ្នាំ២០០៩ ពីបទផ្តល់ព័ត៌មាន(បណ្ណាសារសាធារណៈ) ទាក់ទងនឹងសន្តិសុខជាតិ ប្រព្រឹត្តនៅក្រុមហ៊ុន CATS ។ វិស្វករអាយុ៣១ឆ្នាំ ជាជនជាតិថៃរូបនេះក៏ត្រូវបានស្ថាប័នតុលាការសាលាដំបូងរាជធានីភ្នំពេញសម្រេចផ្តន្ទាទោសដាក់ពន្ធនាគារកំណត់៧ឆ្នាំ និងពិន័យជាប្រាក់ចំនួន១០លានរៀល តាមអំណាចសាលក្រមព្រហ្មទណ្ឌលេខ១៦៤"ក្រ១" ចុះថ្ងៃទី០៨ ខែធ្នូ ឆ្នាំ២០០៩ ។
ក្រោយមក ដោយមានការអន្តរាគមន៍យ៉ាងសកម្មពីថ្នាក់ដឹកនាំគណបក្សភឿថៃ និងជាពិសេសពីសំណាក់លោក ថាក់ស៊ីន ស៊ីណាវ៉ាត្រា (Thaksin Shinawatra) អតីតនាយករដ្ឋមន្ត្រីថៃ ជាមិត្តភក្តិជិតស្និទ្ធរបស់សម្តេចអគ្គមហាសេនាបតីតេជោ ហ៊ុន សែន ហៅបុរសខ្លាំងជានាយករដ្ឋមន្ត្រីនៃព្រះរាជាណាចក្រកម្ពុជា និងជាអតីតជាទីប្រឹក្សារបស់បុរសខ្លាំង និងជាទីប្រឹក្សារាជរដ្ឋាភិបាលកម្ពុជា ទទួលបន្ទុកសេដ្ឋកិច្ចនោះ ជនជាប់ចោទឈ្មោះ ស៊ីវ៉ារ៉ាក់ ជុធិពុង ក៏ត្រូវបានព្រះមហាក្សត្រនៃព្រះរាជាណាចក្រកម្ពុជាទ្រង់ត្រាស់បង្គាប់លើកលែងទោសវិញ តាមសេចក្តីក្រាបបង្គំទូលថ្វាយរបស់បុរសខ្លាំងជានាយករដ្ឋមន្ត្រី ដោយព្រះរាជក្រឹត្យលេខនស/រកត/១២០៩/១១៤៨ ចុះថ្ងៃទី១១ ខែធ្នូ ឆ្នាំ២០០៩(រយៈពេល៣ថ្ងៃក្រោយសាលក្រមតុលាការសម្រេចផ្តន្ទាទោស) ខណៈដែលជនជាប់ចោទរូបនេះជាប់ឃុំបានរយៈពេលមួយខែ និងមិនទាន់មានឈ្មោះជាទណ្ឌិត(នៅមានរយៈពេលនៃការប្តឹងឧទ្ធរណ៍ប្រឆាំងនឹងសាលក្រមព្រហ្មទណ្ឌរបស់សាលាដំបូងរាជធានីភ្នំពេញ) ។
នីតិវិធីនៃការលើកលែងទោសឲ្យបុរសជាជនជាប់ចោទឈ្មោះ ស៊ីវ៉ារ៉ាក់ ជុធិពុង គឺបានយោងទៅលើក្រឹត្យលេខ២៨ក្រ ចុះថ្ងៃទី២០ ខែមិថុនា ឆ្នាំ១៩៨៨ របស់អតីតក្រុមប្រឹក្សារដ្ឋនៃសាធារណរដ្ឋប្រជាមានិតកម្ពុជា ស្តីពីការលើកលែងទោស និងបន្ធូរបន្ថយទោស ។
មាត្រា២នៃក្រឹត្យលេខ២៨ក្រ ចុះថ្ងៃទី២០ ខែមិថុនា ឆ្នាំ១៩៨៨ របស់អតីតក្រុមប្រឹក្សារដ្ឋនៃសាធារណរដ្ឋប្រជាមានិតកម្ពុជា ស្តីពីការលើកលែងទោស និងបន្ធូរបន្ថយទោសដែលនៅប្រើប្រាស់ជាធរមាននោះ បានចែងថា "ទណ្ឌិតទាំងឡាយណាអាចនឹងត្រូវលើកលែងទោសបាន លុះត្រាតែទណ្ឌិតទាំងនោះបានទទួលរងទោស២ភាគ៣នៃទោសដាក់ពន្ធនាគារមានកំណត់…" ។
អនុលោមតាមមាត្រា២នៃក្រឹត្យលេខ២៨ក្រ ចុះថ្ងៃទី២០ ខែមិថុនា ឆ្នាំ១៩៨៨ ស្តីពីការលើកលែងទោស និងបន្ធូរបន្ថយទោសខាងលើ គឺបុរសជនជាតិថៃជាជនជាប់ចោទឈ្មោះ ស៊ីវ៉ារ៉ាក់ ជុធិពុង អាចទទួលការលើកលែងទោសបាន លុះត្រាតែមានឈ្មោះជាទណ្ឌិតសិន(សាលក្រមព្រហ្មទណ្ឌរបស់សាលាដំបូងរាជធានីភ្នំពេញចូលជាស្ថាពរ) និងទទួលរងទោសចំនួនជាង៤ឆ្នាំសិន ។ ផ្ទុយទៅវិញករណីជនជាប់ចោទឈ្មោះ ស៊ីវ៉ារ៉ាក់ ជុធិពុង មិនទាន់មានឈ្មោះជាទណ្ឌិតផង និងមិនទាន់ទទួលរងទោសគ្រប់ចំនួនផង (រងទោសបានត្រឹមចំនួន១ខែសោះ) បែរជាទទួលបានការលើកលែងទោសបាត់ទៅហើយ តាមសេចក្តីក្រាបបង្គំទូលថ្វាយរបស់បុរសខ្លាំងជានាយករដ្ឋមន្ត្រី ។ មិនតែប៉ុណ្ណោះ ក្រោយទទួលបានការលើកលែងទោសភ្លាមៗ បុរសជនជាតិថៃឈ្មោះ ស៊ីវ៉ារ៉ាក់ ជុធិពុង ត្រូវបុរសខ្លាំងផ្តល់កិត្តិយសឲ្យចូលជួបសម្តែងការគួរសមយ៉ាងស្និទ្ធស្នាលនៅឯភូមិគ្រឹះក្រុងតាខ្មៅ ខេត្តកណ្តាល ទៀតផង ។
នេះគឺជាព័ស្តុតាងមួយក្នុងចំណោមព័ស្តុតាងជាច្រើនទៀតដែលបង្ហាញឲ្យឃើញថា បុរសខ្លាំងក្នុងនាមជានាយករដ្ឋមន្ត្រីដុះស្លែ បានប្រព្រឹត្តអំពើរំលោភបំពានច្បាប់យ៉ាងធ្ងន់ធ្ងរ និងក៏បានឆ្លុះបញ្ចាំងឲ្យឃើញដែរថា ច្បាប់ទាំងឡាយមិនមានឥទ្ធិពលទៅលើបុរសខ្លាំងឡើយ ប៉ុន្តែបុរសខ្លាំងទៅវិញទេទើបមានអំណាចធំជាងច្បាប់ ។ មានន័យថា ច្បាប់ទាំងឡាយរបស់ព្រះរាជាណាចក្រកម្ពុជាទី២ គឺឋិតនៅលើបបូរមាត់ និងកណ្តាប់ដៃរបស់បុរសខ្លាំងតែម្នាក់គត់ ៕
Source from: www.dtn7.com
Loading...
Post a Comment