ករណីពលករខ្មែរខុសច្បាប់រាប់សែននាក់នៅថៃបង្ហាញពីភាពកម្សោយនិងអាម៉ាស់របស់រាជរដ្ឋាភិបាលបុរសខ្លាំង
កន្លងមករហូតបច្ចុប្បន្ន រាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន ហៅបុរសខ្លាំងជានាយករដ្ឋមន្ត្រី គ្មានវិធានការណាមួយឲ្យមានប្រសិទ្ធភាពដើម្បីកាត់បន្ថយ និងទប់ស្កាត់ចរន្តពលរដ្ឋខ្មែរចូលទៅទឹកដីប្រទេសថៃស្វែងរកការងារធ្វើដោយខុសច្បាប់នោះឡើយ គឺបានត្រឹមតែប្រកាសអំពាវនាវប៉ុណ្ណោះ ទោះបីដឹងថាការទៅស្វែងរកការងារធ្វើដោយខុសច្បាប់របស់ប្រជាពលរដ្ឋកម្ពុជានៅប្រទេសថៃមានភាពប្រថុយប្រថានខ្ពស់ក៏ដោយ ដូចជាការចាញ់បោកគេអស់លុយកាក់ ការទទួលរងទណ្ឌកម្មផ្សេងៗនៅប្រទេសថៃ…។ល។
តាមរយៈការបណ្តេញពលករខ្មែរខុសច្បាប់ដោយរដ្ឋាភិបាលយោធាថៃជាបន្តបន្ទាប់មកនេះ ទើបបង្ហាញឲ្យឃើញជាក់ស្តែងថា អាចមានពលករខ្មែរទៅធ្វើការខុសច្បាប់នៅប្រទេសថៃមិនតិចជាង៣០ម៉ឺន-៤០ម៉ឺននាក់ឡើយ ខណៈដែលគិតត្រឹមថ្ងៃទី១៧ ខែមិថុនា ឆ្នាំ២០១៤ម្សិលមិញនេះ មានពលករខ្មែរខុសច្បាប់ចំនួនប្រមាណជិត២០ម៉ឺននាក់ហើយៗមានពលករខ្មែរខ្លះទទួលរងគ្រោះថ្នាក់ចរាចរណ៍រហូតដល់ថ្នាក់ស្លាប់បាត់បង់ជីវិតថែមទៀត ក្នុងដំណើរការបញ្ជូនពលករខ្មែរមកកាន់មាតុប្រទេសវិញដោយអាជ្ញាធរយោធាថៃ ។
អាជ្ញាធរយោធាថៃតាមរយៈមន្ត្រីក្រសួងការបរទេសរបស់ថៃ បានប្រកាសនៅថ្ងៃទី១៧ ខែមិថុនា ឆ្នាំ២០១៤ម្សិលមិញថា ថៃមានបំណងចង់ឲ្យពលករខ្មែរទាំងអស់ដែលធ្វើការនៅប្រទេសថៃ គឺជាពលករស្របច្បាប់ដើម្បីជៀសវាងមានអំពើការជួញដូរមនុស្ស និងការកេងប្រវ័ញ្ចលើកម្លាំងពលករទាំងនោះ ។
មជ្ឈដ្ឋានអ្នកវិភាគកិច្ចការសង្គមនៅកម្ពុជាបានលើកឡើងថា ការណ៍ដែលធ្វើឲ្យមានពលករចំណាកស្រុកខុសច្បាប់នៅប្រទេសថៃច្រើនគគោកបែបនេះ គឺដោយសារកត្តាមួយចំនួន ដូចជា ៖ ១-ស្ថានភាពទីផ្សារការងារនៅកម្ពុជាមិនប្រសើរឬគ្មាន ។ ២-មន្ត្រីបម្រើការងារនៅច្រកទ្វារ និងច្រករបៀបទទួលលុយកាក់ពីមេខ្យល់នាំពលករខ្មែរទៅថៃ ។ ៣-អាជ្ញាធររាជរដ្ឋាភិបាលកម្ពុជាមិនគិតគូរយកចិត្តទុកដាក់ឲ្យបានក្តៅគគុកដើម្បីធ្វើពីភាពខុសច្បាប់ទៅជាស្របច្បាប់វិញរបស់ពលករខ្មែរតាមការទាមទារពីអាជ្ញាធរថែតាំងពីយូរយារមកហើយ ។
សរុបសេចក្តីមក ករណីពលករខ្មែរខុសច្បាប់រាប់សែននាក់នៅប្រទេសថៃ រហូតដល់ថ្នាក់អាជ្ញាធរថៃបណ្តេញចេញមកវិញយ៉ាងតក់ក្រហល់នោះ គឺបង្ហាញអំពីភាពកម្សោយ និងភាពអាម៉ាស់របស់រាជរដ្ឋាភិបាលបុរសខ្លាំងដែលសម្បូណ៌ដោយមន្ត្រីអែបអប ឡេមឡឺម ដង្ហែបញ្ជោរលើកជើង ដើម្បីផលប្រយោជន៍ផ្ទាល់ខ្លួន ៕ 
Source from: www.dtn7.com
Loading...
Post a Comment