ឧកញ៉ាម្នាក់ទទួលរងការចោទប្រកាន់ថារំលោភបំពានយកដីវត្តកោះពោធិវង្សទុកជាប្រយោជន៍ផ្ទាល់ខ្លួន
កាលពីថ្ងៃទី១៥ ខែមិថុនា ឆ្នាំ២០១៤ម្សិលមិញនេះ ព្រះទេវសត្ថា ពឿយ មេត្តា ជាព្រះចៅអធិការ ព្រមទាំងព្រះសង្ឃ អាចារ្យ គណៈកម្មការ និងព្រះពុទ្ធបរិស័ទចំណុះជើងវត្តកោះពោធិវង្ស ឋិតនៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ បានដាក់ពាក្យបណ្តឹងមួយច្បាប់ចម្រើនពរ និងគោរពជូនសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ភរិយានាយករដ្ឋមន្ត្រី ដោយប្តឹងចោទប្រកាន់លោកឧកញ៉ាម្នាក់ថាបានសមគំនិតជាមួយលោកអភិបាលរងខណ្ឌសែនសុខម្នាក់ទៀត រំលោភបំពានយកដីកម្មសិទ្ធិរបស់វត្ថកោះពោធិវង្ស ទំហំទទឹងប្រវែង៣០ម៉ែត្រ និងបណ្តោយប្រវែង១៧០ម៉ែត្រ មកសាងសង់ធ្វើជាបុរីសម្រាប់លក់ដូរបំពេញឲ្យផលប្រយោជន៍ផ្ទាល់ខ្លួន ។
លោកឧកញ៉ា និងលោកអភិបាលរងខណ្ឌសែនសុខដែលទទួលរងការប្តឹងចោទប្រកាន់ពីសំណាក់ព្រះចៅអធិការ ព្រមទាំងព្រះសង្ឃ អាចារ្យ គណៈកម្មការ និងពុទ្ធបរិស័ទចំណុះជើងវត្តកោះពោធិវង្សថា រំលោភបំពានយកដីកម្មសិទ្ធិរបស់វត្តធ្វើជាប្រយោជន៍ផ្ទាល់ខ្លួននោះ មានឈ្មោះ ឧកញ៉ា ឈាង ប៉ាក់សួរ និងលោក ជា ខេមា អភិបាលរងខណ្ឌសែនសុខ ។ ពាក្យបណ្តឹងរបស់ព្រះចៅអធិការវត្តកោះពោធិវង្ស ចុះថ្ងៃទី១៥ ខែមិថុនា ឆ្នាំ២០១៤ បានសំណូមពរចំពោះប្រមុខរាជរដ្ឋាភិបាល មេត្តាជួយពិនិត្យនិងដោះស្រាយយកដីវត្តដែលលោកឧកញ៉ា ឈាង ប៉ាក់សួរ បានរំលោភបំពាននោះមករក្សាទុកជាទ្រព្យសម្បត្តិវត្តព្រះពុទ្ធសាសនាវិញ ។
អភិបាលរងខណ្ឌព្រែកព្នៅបច្ចុប្បន្ន គឺលោក ជា ខេមា បានអះអាងថា ក្នុងនាមលោកជាអាជ្ញាធរ ធ្លាប់បានជួយសម្របសម្រួល និងដោះស្រាយករណីវិវាទនេះជូនភាគីទាំង២ គឺមិនមានការជាប់ពាក់ព័ន្ធ ឬចូលដៃសមគំនិតជាមួយភាគីលោកឧកញ៉ា ឈាង ប៉ាក់សួរ នោះឡើយ ។
គិតត្រឹមថ្ងៃទី១៦ ខែមិថុនា ឆ្នាំ២០១៤នេះ គេហទំព័រសារព័ត៌មានដើមត្នោត មិនទាន់អាចសុំការបំភ្លឺបញ្ជាក់ពីលោកឧកញ៉ា ឈាង ប៉ាក់សួរ ទាក់ទងនឹងការប្តឹងចោទប្រកាន់ពីសំណាក់ព្រះចៅអធិការវត្តកោះពោធិវង្សនៅឡើយទេ ខណៈដែលពុទ្ធបរិស័ទចំណុះជើងវត្តកោះពោធិវង្សបាននាំគ្នាវាយកម្ទេចរបងក្រុមហ៊ុនបុរី ប៉េង ហួត ដែលរងចោទប្រកាន់ថា បានរំលោភយកដីវត្តកាលពីថ្ងៃម្សិលមិញ ៕ 
Source from: www.dtn7.com
Loading...
Post a Comment